«كەدەرگىسىز كەلەشەك» مۇمكىندىكتەرى
«نۇر وتان» پارتياسىنىڭ مۇمكىندىگى شەكتەۋلى جانداردىڭ وقشاۋ ومىرىنە وزگەرىس اكەلىپ, ولاردىڭ بەلسەندىلىگىن ارتتىرۋعا سەرپىلىس بەرگەن «كەدەرگىسىز كەلەشەك» جوباسى قانات قاقتى.
ول نەگىزىنەن مۇگەدەكتەردى تۇراقتى جۇمىسقا تۇرعىزۋ, مۇمكىندىگى شەكتەۋلى ادامدارعا كەدەرگىسى جوق جاعداي جاساۋ, قوعام مەن بيزنەستىڭ نازارىن مۇگەدەكتەردىڭ ماسەلەسىنە اۋدارۋعا باعىتتالعان اقپاراتتاندىرۋ جۇمىسىن كۇشەيتۋ, مۇگەدەكتەر قۇقىعى اياقاستى بولمايتىنىن قۇقىقتىق الاڭ قۇرۋدى كوزدەيتىن نەگىزگى ءتورت باعىت بويىنشا جۇزەگە اسىرىلادى.
بۇل كۇندە «نۇر وتاننىڭ» العاشقى پارتيالىق ۇيىمدارى قۇرىلعان مەكەمەلەردە 14,5 مىڭعا جۋىق مۇمكىندىگى شەكتەۋلى جاندار ەڭبەك ەتەدى. الداعى ۋاقىتتا ونداعى مۇگەدەكتەردىڭ سانىن بەلگىلەنگەن 3% كۆوتاعا دەيىن جەتكىزۋ جوسپارلانىپ وتىر.
الەۋمەتتىك جانە كولىك ينفراقۇرىلىمداردىڭ 83 پايىزعا (15,5 مىڭ) جۋىعى مۇگەدەكتەرگە قولايلى ەمەس ەكەنى انىقتالدى. «نۇر وتان» پارتياسىنىڭ ايماقتىق فيليالدارى ول جاقتاعى نىسانداردى قۇجاتتاۋ مەن بەيىمدەۋ مونيتورينگى جۇمىسىن باستاپ كەتتى. ەلىمىزدە تۇرىپ جاتقان 630 مىڭعا جۋىق مۇگەدەكتىڭ ەڭبەككە جارامدى جاستاعىلارىنىڭ سانى 405 مىڭ ەكەن. ولاردىڭ 20 پايىزىنان استامى عانا, ياعني 83 مىڭى جۇمىسپەن قامتىلعان. ال 17 مىڭ مۇگەدەكتىڭ جۇمىس ىستەۋگە ىنتاسى بار.
ايگۇل ۋايسوۆا