تۇرعىن ءۇي ينسپەكتسياسى باسقارماسى – قۇرىلعانىنا ونشا كوپ ۋاقىت وتە قويماعان جاڭا مەكەمە. ول تۇرعىن ءۇي قورى مەن كوپ پاتەرلى ءۇي جانە اۋلا اۋماقتارىنداعى پاتەر يەلەرىنىڭ ورتاق مەنشىگىن ماۋسىمدىق پايدالانۋعا قاتىستى شارالار جۇرگىزۋگە, تۇرعىن ۇيلەردەگى ەنەرگيا جانە سۋ رەسۋرستارىن رەتتەۋگە, باقىلاۋ, ەسەپتەۋ قۇرىلعىلارىنىڭ جاي-كۇيىنە مەملەكەتتىك باقىلاۋ جاسايدى. ءبىز وسى تۇرعىدا باسقارما باسشىسىنىڭ مىندەتىن اتقارۋشى رۋستام بەگالينوۆتى اڭگىمەگە تارتتىق.
– اتقارىلعان جۇمىستارعا توقتالساڭىز.
-ءبىرىنشى كەزەكتە قالاداعى ۇيلەردىڭ سانى مەن وعان قىزمەت كورسەتۋشى ۇيىمدار انىقتالدى. استانا قالاسىندا بارلىعى 2231 كوپقاباتتى ءۇي بار دەپ ەسەپتەلەدى. وسى ۇيلەردى جابدىقتاۋدى 363 ۇيىم ءمىندەتىنە الىپ وتىر. ايتۋ كەرەك, 24 ءۇي پايدالانۋعا ءبىرىنشى جارتى جىلدىقتا بەرىلسە, ەكىنشى جارتى جىلدىقتا 21 تۇرعىن ءۇيگە يەلەرىن ۋاقىتىندا قونىستاندىرۋ جوسپارلانعان.
ماسەلەن, كوپ قاباتتى ۇيلەرگە الماتى اۋدانىندا 103 پاتەر يەسى كووپەراتيۆى, 26 جشس, 18 جەكە كاسىپكەر جانە باسقا دا ۇيىمدار, سارىارقا اۋدانىندا 86 پاتەر يەسى كووپەراتيۆى, 1 مەملەكەتتىك كوممۋنالدىق كاسىپورىن, 26 جشس, 9 باستاماشىل توپ, ەسىل اۋدانىندا 19 پاتەر يەسى كووپەراتيۆى, 24 جشس, 4 جەكە كاسىپكەر, 1 اكتسيونەرلىك قوعام قىزمەت كورسەتەدى.
– ولاردىڭ جۇمىسى تۇرعىن ءۇي ينسپەكتسياسىنىڭ باقىلاۋىندا شىعار؟
– قر «مەملەكەتتىك باقىلاۋ مەن قاداعالاۋ تۋرالى» زاڭىنا سايكەس باسقارما 2012 جىلى پاتەر يەلەرى كووپەراتيۆىنە 33 كەزەكتەن تىس تەكسەرۋ جۇرگىزدى. ءناتيجەسىندە, ورىن العان كەمشىلىكتەردى جويۋ جونىندە 30 ۇيعارىم شىعارىلدى. 2013 جىلى 14 كەزەكتەن تىس 25 جوسپارلى تەكسەرىس بەلگىلەنسە, 30 تەكسەرىس ءوتىپ, 4 تەكسەرۋ جۇمىسى ءالى اياقتالعان جوق. وسىعان بايلانىستى جىبەرىلگەن قاتەلىكتەردى جويۋ ءۇشىن 26 ۇيعارىم جاسالدى.
ال, 2013 جىلدىڭ ەكىنشى جارتى جىلدىعىنا ارنالعان جوسپارلى تەكسەرۋ كەستەسى بەكىتىلىپ, ول قر باس پروكۋراتۋراسىنىڭ قۇقىقتىق ستاتيستيكا جانە ارناۋلى ەسەپكە الۋ كوميتەتىندە تىركەلدى.
– كوندومينيۋمعا بايلانىستى قانداي جۇمىستار جۇرگىزىلۋدە؟
– 2012 جىلى تۇرعىن ءۇي ينسپەكتسياسى باسقارماسى جەتى تۇرعىن ءۇي كوندومينيۋمىن العاش رەت تىركەدى. ال بيىل كوندومينيۋمنىڭ 16 نىسانى تىركەلدى. بۇل باعىتتاعى جۇمىستىڭ قارقىندى وركەندەمەي تۇرعانى, پاتەر يەلەرىنىڭ ونشا ءمان بەرمەۋى مەن جەر تەلىمدەرىنە قاجەتتى اكتىلەر جاسالماعاندىعىنان بولىپ وتىر. قازىر ناقتى جۇمىستار ءجۇرگىزىلۋدە.
ءىس-شارالار اياسىندا ۇيلەرگە جىلۋ ەسەپتەگىش قۇرىلعىلار ورناتۋعا بايلانىستى تۇرعىندارمەن جينالىس وتكىزىلىپ, حاتتامالارى «استانا جىلۋترانزيت» اق-عا جىبەرىلدى. جىلۋ ماۋسىمى باستالعانشا 400 جىلۋ ەسەپتەگىش قۇرىلعى ورناتىلعان ەدى. ەندى 519 قۇرىلعىنى جىلدىڭ اياعىنا دەيىن ىسكە قوسۋ جوسپارلانۋدا.
