اپتا سايىن ءار سەنبى, جەكسەنبى كۇنى استانا قالاسى اكىمدىگى الدىنداعى ورتالىق الاڭدا وبلىستار وتكىزىپ جاتقان اۋىل شارۋاشىلىعى جارمەڭكەسىنە قاراپايىم حالىق ءدان ريزا. وتكەن 5-6 قازان كۇنى قالىپتاسقان ءداستۇردى پاۆلودار وبلىسى جالعاستىرىپ, اۋىل شارۋاشىلىعى ءجارمەڭكەسىن وتكىزدى. الدىن الا التى كيىز ءۇي تىگىپ, ءىشىن جاساندىرعان ەرتىس ءوڭىرى ەڭبەككەرلەرىنىڭ ەلورداداعى جارمەڭكەگە مىقتاپ دايىندالعاندىقتارى كورىنىپ تۇر. ايماقتىڭ 150 كاسىپورنى 1000 توننادان اسا ازىق-تۇلىك ونىمدەرىن الىپ كەلىپتى.
– بۇل – وڭىرلەردى ەلورداعا جاقىنداتاتىن ۇلكەن ءۇردىس. بۇگىنگى كەرەكەۋلىكتەر ۇسىنىپ وتىرعان مول دامگە قاراپ, ءبىز ايماقتارىمىزدا اۋىل شارۋاشىلىعىنىڭ دامىعانىن كورەمىز, – دەدى جارمەڭكەنى ارالاپ كورگەن استانا قالاسىنىڭ اكىمى يمانعالي تاسماعامبەتوۆ.
ال, دەلەگاتسيانى باستاپ كەلگەن وبلىس اكىمى ەرلان ارىننىڭ ايتۋىنشا, وبلىس بىلتىردان باستاپ الەۋمەتتىك كاسىپكەرلىك كورپوراتسياسىمەن بىرىگىپ جۇمىس ىستەپ كەلە جاتىر ەكەن. قازىر قويمادا 206 000 توننا ازىق-تۇلىك ساقتاۋلى. سوندىقتان وبلىس استاناعا تەك ەكى كۇن ەمەس, جىل بويى ءوز ونىمدەرىن جەتكىزىپ تۇراتىن بولادى.
– بيىل ءبىزدىڭ ديقانداردىڭ توككەن ماڭداي تەرلەرى اقتالدى. 800 مىڭ توننادان اسا استىق, 320 مىڭ توننا كارتوپ, 140 مىڭ توننا كوكونىس, 15 مىڭ توننا باۋ-باقشا ونىمدەرىن جينادىق. سونىڭ ارقاسىندا ەلورداعا 112 توننا ەت پەن ەت ونىمدەرىن, 51 توننا ءسۇت ونىمدەرىن, 90 مىڭ دانا جۇمىرتقا, 330 توننا كارتوپ, 290 توننا كوكونىس پەن باقشا داقىلدارىن, 45 توننا ۇن, 49 توننا جارما مەن ماكارون, 17,5 توننا كۇنباعىس مايىن, 10,5 توننا بال جانە باسقا دا تاماق ونىمدەرىن اكەلدىك. ولاردىڭ باعاسى دا كوڭىلگە قونىمدى. ماسەلەن, سيىر مەن قوي ەتىنىڭ كەلىسى – 900 تەڭگەدەن, جىلقى ەتىن – 1000 تەڭگەدەن, شوشقا ەتىن – 700 تەڭگەدەن, كارتوپ, ءسابىز, قىزىلشانى – 40 تەڭگەدەن, بالدى 1000 تەڭگەدەن ۇسىنۋدامىز, – دەيدى پاۆلودار وبلىستىق اۋىل شارۋاشىلىعى باسقارماسىنىڭ باسشىسى جانات شۇعاەۆ.
ساعي ورال
