استانا قالاسى قوعامدىق كەڭەسىنىڭ كەزەكتى وتىرىسى ءوتتى. سانسىزباي ەسىلوۆتىڭ توراعالىعىمەن وتكەن جيىندا قالا ءماسليحاتىنىڭ بىرقاتار شەشىمدەرىنە وزگەرىستەر مەن تولىقتىرۋلار ەنگىزۋ تۋرالى جانە مەملەكەتتىك قىزمەت كورسەتۋ رەگلامەنتىن بەكىتۋ تۋرالى ۇسىنىستاردى قارادى.
كەڭەس وتىرىسى بارىسىندا كوممۋنالدىق اقىلى كولىك تۇراقتارى ورنالاساتىن ورىنداردى انىقتاۋ, ونىڭ تاريفتەرىن بەكىتۋ جانە قالا كوشەلەرىنىڭ اقىلى تەلىمدەرىن انىقتاۋ تۋرالى ماسەلەلەردىڭ شەشىمى قىزۋ تالقىلاندى. ەلوردالىق جولاۋشىلار كولىگى باسقارماسىنىڭ باسشىسى ەدىل سۇلەيمەنوۆتىڭ ايتۋىنشا, قالا بويىنشا ءتيىستى تالداۋ جۇرگىزىلگەننەن كەيىن اقى تولەپ, كولىك قويۋعا بولاتىن 259 ۋچاسكە انىقتالعان. ايتا كەتۋ كەرەك, كورسەتىلگەن جول تەلىمدەرىنىڭ ەشقايسىسى تۇرعىن ۇيلەردىڭ اۋماعىندا ورنالاسپاعان. باسقارما ۇسىنىپ وتىرعان جاڭا جوبا 2 كەزەڭگە بولىنەدى, ءبىرىنشى كەزەڭدە ەلوردانىڭ سول جاعالاۋىندا – «نۇرجول» جەلەگىنىڭ, اقمەشىت پەن تۇركىستان كوشەلەرىنىڭ بويىندا اقىلى تۇراق ورنى پايدالانۋعا بەرىلەدى. العاشقى كەزەڭدە اقىلى تۇراقتاردىڭ جۇمىس ىستەۋ تەتىگىنىڭ تيىمدىلىگىن تولىق تۇسىنبەيىنشە تۇتىنۋشىلاردان اقى الىنباي, اتالعان ۋچاسكەلەردەگى تۇراقتار تەستىلىك رەجيمدە جۇمىس ىستەيدى. ال جۇيە تەحنيكالىق جاعىنان تولىعىمەن سىناقتان ءوتىپ بولعان سوڭ اقى بەلگىلەنەتىن بولادى. جوبانىڭ اۆتورلارى مۇنداي شارالاردىڭ كوشە-جول جەلىسىنە تۇسەتىن جۇكتەمەنى ازايتۋعا, كولىك تۇراقتارى نىساندارىندا ءتارتىپتى قاداعالاۋعا مۇمكىندىك بەرەتىنىن العا تارتتى.
كەڭەس مۇشەلەرى كۇن تارتىبىندە قارالعان جوبالاردى كەيبىر ۇسىنىستاردى ەسكەرە وتىرىپ, ەشبىر ەسكەرتۋسىز قابىلدادى.
ايگۇل ۋايسوۆا
