ەلەكتروندى اكىمدىك
جۇگەنسىز جۇرگىزۋشى نەگە كوپ؟
قالامىزدا كولىگىن كەز كەلگەن جەرگە ءجون-جوسىقسىز قالدىرا بەرەتىن دورەكى جۇرگىزۋشىلەر از ەمەس. كەلگەن حاتتاردىڭ ءبىرازى وسىنداي جۇرگىزۋشىلەردى ساباسىنا ءتۇسىرىپ, شارا قولدانۋدى سۇراپتى.
مىناۋ ەۆگەني سەنكوۆسكي ەسىمدى قالا تۇرعىنى جىبەرگەن فوتولار. سۋرەت اۆتورى تارتىپكە باعىنبايتىن «حيۋنداي» ماركالى كولىكتىڭ (مەملەكەتتىك ءنومىرى 159 COA/01) بوگەنباي باتىر داڭعىلى بويىندا تۇرعانىن جەتكىزگەن. ەكىنشى سۋرەتتەن 492 DUA/01 ءنومىرلى «Nissan» كولىگىنىڭ توقتاۋعا بولمايتىن جەردەن كولەڭكە تاۋىپ, قالعىپ تۇرعانىن بايقاۋعا بولادى. فوتو 23 مامىر كۇنى اباي داڭعىلى بويىنان ءتۇسىرىلىپتى.
استانا قالاسىنىڭ ىشكى ىستەر دەپارتامەنتى جەرگىلىكتى پوليتسيا قىزمەتى ەكى كولىك يەسىنىڭ زاڭ بۇزعانى انىقتالىپ, ءتيىستى شارا قولدانىلعانىن حاباردار ەتىپتى. ءبىرىنشى كولىككە قازاقستان رەسپۋبليكاسى «اكىمشىلىك قۇقىق بۇزۋشىلىق تۋرالى» كودەكسىنىڭ 505-بابىنىڭ 1-بولىگى, ياعني, قالالىق اباتتاندىرۋ ەرەجەلەرىن بۇزۋ فاكتىسى بويىنشا اكىمشىلىك جازا تاعايىندالىپ, ايىپپۇل سالىنسا, ەكىنشى وقيعا بويىنشا, جول بەلگىلەرىن ساقتاماعانى ءۇشىن 5 اەك ايىپپۇل مولشەرىندە اكiمشiلiك جازا قولدانىلعان.
تۇت كوبەلەگى تۇلداي قىلماسىن
اكىمدىك سايتىنا شارۋاشىلىق قىزمەتىنە كوڭىلى تولماي حابارلاسىپ جاتاتىندار بارشىلىق. نينا دزيۋبا ەسىمدى تۇرعىن ءار ءتۇرلى زيانكەستەرگە قارسى جۇرگىزىلۋى ءتيىس پروفيلاكتيكالىق جۇمىستاردىڭ جۇيەسىزدىگىنە رەنىشىن ءبىلدىرىپتى. دەر كەزىندە ۋلاۋ جۇمىستارى جۇرگىزىلمەگەندىكتەن, كەيبىر اۋلا اعاشتارى قۋراي باستاعان.
«ءبىزدىڭ ءۇيدىڭ اۋلاسىنداعى (بايسەيىتوۆا, 8) كۇنىمىز ءتۇسىپ وتىرعان بىرنەشە ءتۇپ اعاش كەمىرگىش قۇرتتاردىڭ كەسىرىنەن قۋراپ جاتىر. تۇرعىندار ءوز كۇشىمىزبەن زالالسىزداندىرۋ جۇمىستارىن جۇرگىزىپ كورمەك بولعان ەدىك, الايدا ەش ناتيجە بولمادى. جاپىراعىن تۇگەل جەپ قويعاندىقتان, ءتورت ءتۇپ اعاش الدەن قۋراپ قالدى. شارا قولدانۋلارىڭىزدى سۇرايمىز» دەپ, جاپىراقتاردى ارمانسىز جەپ جۇرگەن جاسىل قۇرتتاردىڭ سۋرەتىن قوسا سالىپ جىبەرگەن.
قۇزىرلى مەكەمە دە شاعىمدانۋشىعا كوپكە سوزباي جاۋاپ بەرىپتى.
جاۋاپ حاتتا «كۇرمەتتى, دزيۋبا نينا يۋرەۆنا! استانا قالاسى سارىارقا اۋدانى اكىمىنىڭ اپپاراتى ءسىزدىڭ حاتىڭىزدان كەيىن, «استانا كوگالداندىرۋ قۇرىلىسى» اق حيميالاۋ قىزمەتىنىڭ ماماندارى بايسەيىتوۆا, 8 كوشەسى اۋماعىنداعى جاسىل جەلەكتەردە ۋلاۋ جۇمىستارىن جۇرگىزدى. بارلىعى 60 ءتۇپ اعاشقا وڭدەۋ جۇمىستارى ءجۇرگىزىلدى» دەلىنگەن جاۋاپ حاتتا.
«تۇرمىس» قاشان تۇزەلەدى؟
بۇگىندە استانا قالاسىندا دەر كەزىندە جاڭعىرتۋ جۇمىستارى جاسالىپ, الدىن الۋ جۇمىستارى جان-جاقتى قولعا الىنىپ جاتىر. الايدا سوعان قاراماستان, شەشىمىن تاپپاي جاتاتىن جايتتار دا جوق ەمەس. «حالىقتىق باقىلاۋ» ايدارى ارقىلى استانا قالاسىنىڭ اكىمدىگىنە كەلىپ ءتۇسىپ جاتاتىن حاتتاردىڭ كوبى پيك ماسەلەسىنە قاتىستى بولىپ جاتادى.
سارىارقا اۋدانىنا قاراستى 189 كوشەسىندەگى 12/1-ءۇيدىڭ تۇرعىنى دارحان نۇرسادىقوۆ ەسىمدى ءبىر تۇرعىن استانا قالاسىنىڭ اكىمدىگىنىڭ سايتىنا «تۇرمىس» پيك مەكەمەسىنىڭ جۇمىسىنا كوڭىلى تولمايتىنىن ايتىپ, كۇللى ءۇي تۇرعىندارىنىڭ اتىنان دەپ ءبىر قۇشاق شاعىم جولداپتى. تۇرعىننىڭ ايتۋىنشا, ءۇي تۇرعىندارى اۋىق-اۋىق سۋدان اجىراتىلىپ قالادى ەكەن. «اسىرەسە, سوڭعى ەكى ايدان بەرى ىستىق جانە سۋىق سۋعا جارىماي وتىرمىز. جەرتولەدەگى سورعىش-كومپرەسسورلىق قۇرىلعىلاردىڭ ءجيى-ءجيى ىستەن شىعىپ قالىپ جاتىر. توتەنشە قىزمەت ماماندارى بىرنەشە كۇن جاعالاسىپ, ىسكە قوسىپ كەتەدى. الايدا, قۇرىلعىلار ارى كەتسە ءبىر اپتا عانا شىدايدى. قايتادان بۇزىلادى. كەيبىر دەمالىس كۇندەرى مۇلدەم سۋسىز وتىرامىز. پيك ماماندارى دەمالىس كۇندەرى جۇمىسقا شىقپايدى. تەلەفون سوقساق كوتەرمەيدى, وفيستە ەشكىم بولمايدى» دەيدى شاعىم ايتۋشى.
سونىمەن قاتار, ءوتىنىش يەسى ءۇي يەلەرىنىڭ اۋلا تازالىعىنا كوڭىلدەرى تولمايتىنىن بىلدىرگەن. № 12/1, 12/2 جانە 12/3 ءۇيدىڭ اۋلالارى ءالى كۇنگە دەيىن جوندەلمەگەن. بورديۋرلەر مۇلدەم جارامسىز جاعدايعا جەتكەن. ال جولدىڭ جيەگى دەگەن اتىمەن جوق. سونىڭ كەسىرىنەن كولىكتەر دوڭگەلەگىمەن ىلەسە كەلگەن قۇم-بالشىق اۋلاعا شاشىلىپ جاتادى. جاڭبىرلى كۇندەرى ءجۇرۋ مۇمكىن ەمەس ەكەن.
سونداي-اق, «تۇرمىس» پيك-ءى تۇرعىنداردىڭ كەلىسىمىن الماستان ءۇي شاتىرىنا بايلانىس وپەراتورلارىنىڭ ءبىرىنىڭ سەرۆەرى مەن انتەنناسىن ورناتىپ قويعانىن ايتادى. «بۇل تۇرعىنداردىڭ ومىرىنە قاۋىپ ءتوندىرىپ وتىر. انتەننادان تارايتىن رادياتسيالىق ساۋلە اسىرەسە, جوعارى قابات تۇرعىندارى ء(وزىم دە جوعارى قاباتتا تۇرامىن) ءۇشىن وتە قاۋىپتى. «تۇرمىس» مەكەمەسىنە ايىنا 2600-3000 تەڭگە ارالىعىندا اقشا تولەيمىز. بۇل اقشالار قايدا جۇمسالىپ جاتىر؟ شارا قولدانۋلارىڭىزدى سۇرايمىز» دەلىنىپتى حاتتا.
بۇل حاتقا تۇرعىن ءۇي ينسپەكتسياسى باسقارماسى 6 كۇن ىشىندە جاۋاپ بەرىپتى. «قۇرمەتتى, دارحان نۇرسادىقوۆ! ءسىزدىڭ حاتىڭىزدى قاراستىرىپ ءبىز مىنانى حابارلايمىز: ءسىز كەلتىرگەن دەرەكتەر تەكسەرىلىپ, شارالار قولدانىلدى. «تۇرمىس» مەكەمەسىنىڭ باس ينجەنەرىمەن بولعان ءتۇسىندىرۋ جۇمىستارى بارىسىندا وسى جىلدىڭ مامىر ايىندا اتالمىش تۇرعىن-ءۇي اۋماعىندا قالالىق كوممۋنالدىق قىزمەت ماماندارى جىلىتۋ جانە سۋمەن جابدىقتاۋ قۇرىلعىلارىنا كۇردەلى جوندەۋ جۇمىستارى جۇرگىزىلگەنى بەلگىلى بولدى. ءسىز ءسوز ەتكەن جايتتار وسى كەزدە تۋىنداۋى مۇمكىن ەكەنىن ەسكەرتەمىز. سونداي-اق, اۋلانى كوركەيتۋ تۋرالى شاعىمىڭىز كوممۋنالدىق شارۋاشىلىق باسقارماسىنىڭ قاراۋىنا ءجىبەرىلدى» دەلىنگەن جاۋاپ حاتتا.
ال ۇيالى بايلانىس انتەنناسىنا قاتىستى ساۋالعا اتالمىش قۇرىلعىلاردىڭ ەلەكتروماگنيتتىك ساۋلە ءبولۋ فاكتىسىنىڭ ەشقاشان انىقتالماعانىن ءارى بۇل تولقىن تاراتۋشى ستانسالاردىڭ سانيتارلىق-ەپيدەميولوگيالىق باقىلاۋ ورتالىعىنان العان ءتيىستى پاسپورتى بار ەكەنى كورسەتىلىپتى.
«تۇرمىس» پيك-ىنە قاتىستى ماسەلە مۇنىمەن عانا شەكتەلمەيدى. سايات سۇلتان ەسىمدى تاعى ءبىر تۇرعىن «تۇرمىس» مەكەمەسى قىزمەت ەتەتىن تىلەنديەۆ كوشەسى, 36-ءۇيدىڭ قاسبەتى كوپتەن بەرى سالبىراپ بوس تۇرعانىن جازىپ وتىر. بۇگىندە ادام ومىرىنە قاۋىپ ءتوندىرىپ تۇرعان قاسبەت جوندەلگەن. تۇرعىن ءۇي ينسپەكتسياسى باسقارماسى «تۇرمىسقا» قاتىستى ءتيىستى شارالار قولدانىلعانىن جازىپتى.
دايىنداعان بۇركىت نۇراسىل
دەرەكتەر www.astana.kz
سايتىنىڭ «حالىقتىق باقىلاۋ» بولىمىنەن ىرىكتەلىپ الىندى.