قازاقستان رەسپۋبليكاسىنىڭ تۇڭعىش پرەزيدەنتى كۇنى مەرەكەسى قارساڭىندا ەلوردا مەكتەپتەرىنىڭ كوشباسشى-وقۋشىلارى اراسىندا بايقاۋ ۇيىمداستىرىلعان بولاتىن. كەشە «بايتەرەك» مەديا ورتالىعىندا وتكەن بريفينگتە استانا قالاسى ءبىلىم باسقارماسىنىڭ باستىعى ءا. بيمەندينا بايقاۋ فيناليستەرىن قۇتتىقتادى.
قالانىڭ 48 ءبىلىم مەكەمەسىنەن بايقاۋعا قاتىسۋعا 50 وقۋشى تىلەك بىلدىرگەن. مەكتەپ كەزەڭىندە بارىنشا كوپ بالل جيناعان بۇل قاتىسۋشىلار بايقاۋ شارتى بويىنشا قازاقستاننىڭ تاريحى مەن مادەنيەتىنەن, گەوگرافياسى مەن بيولوگياسىنان 100 سۇراققا, سونداي-اق جالپى وي-ءورىستى ايقىندايتىن ساۋالدارعا جاۋاپ بەرۋمەن بىرگە «ادامدا وتان جالعىز», «كوشباسشى – بۇل…» جانە «پاتريوت دەگەن كىم؟» دەگەن تاقىرىپتاردىڭ بىرىنە ەسسە جازدى.
«استانا دارىنى» اعتو مكك ديرەكتورى مايرا قۇرمانباەۆانىڭ ايتۋىنشا, ساراپتاۋ كوميسسياسى تەست بويىنشا جوعارى بالل جيناعان جانە ءوز جۇمىستارىندا (ەسسە) دۇنيەتانىمدارىن, مادەني, پسيحولوگيالىق ۇستانىمدارىن تانىتا بىلگەن 20 وقۋشىنى انىقتادى. سولاردىڭ اراسىندا بەگمات ەلباسى مەن پولينا چايۋك تە بار. ولاردىڭ ءبىرى ەلىمىزدىڭ ەرتەڭى رەتىندە وزدەرىنە جۇكتەلگەن ۇلكەن جاۋاپكەرشىلىكتى سەزىنەتىندىگىن جەتكىزسە, بايقاۋدىڭ ەكىنشى ءفيناليسى 1 قىركۇيەك كۇنگى قازاقستان پرەزيدەنتىمەن بولعان كەزدەسۋگە قاتىسقانىن, سوندا ەلباسىنىڭ «ادام ومىردە تەك ەڭبەگىمەن كوپ نارسەگە قول جەتكىزەدى» دەگەنىن, ياعني كەز كەلگەن ادامنىڭ تەك ەڭبەكپەن عانا ەڭسەلى ەكەنىن تەبىرەنە باياندادى.
بايقاۋدىڭ كەلەسى كەزەڭى – قاتىسۋشىلاردى فينالدىق كەزەڭگە دايىنداۋ. ول قاراشا ايىنىڭ ەكىنشى ونكۇندىگىندە وتەدى.
