ءبىز استانامەن كوپ جىلدار بويى ىنتىماقتاستىق قارىم-قاتىناس جاساپ كەلەمىز. اتاپ ايتقاندا, قالا قۇرىلىسى, تۇرعىن ءۇي-كوممۋنالدىق شارۋاشىلىق, ينفراقۇرىلىمدى دامىتۋ, اباتتاندىرۋ جانە كوگالداندىرۋ سالالارىندا وزىق تاجىريبەمەن الماسىپ وتىرامىز. استانادا ماعان ۇنايتىنى – قالا باسقارۋداعى جانە قۇرىلىس سالاسىنداعى زاماناۋي بەتبۇرىستار. بۇل جەردە مەگاپوليستەردى دامىتۋدىڭ الدىڭعى قاتارلى الەمدىك تاجىريبەسى قولدانىلۋدا. ەڭ ۇلكەن جەتىستىك – وسى. ەگەر ناقتىراق ايتار بولسام, ءوز باسىم استاناداعى اسا اۋقىمدى LRT قۇرىلىسىنا قاتتى تاڭ قالدىم. تاڭدانعان سەبەبىم, بۇل جاقتاعى وتە جاعىمسىز كليماتتىق جاعدايلاردا (قىسى سۋىق, جازى اپتاپ) مۇنداي قۇرىلىستى جۇرگىزۋ وتە قيىن. ءبىز دە قازىر ۋفادا قوعامدىق كولىكتى دامىتۋ ماسەلەسىن تالقىلاپ جاتىرمىز. وسى ورايدا جەر ۇستىمەن جۇرەتىن جۇردەك كولىك كوڭىلىمىزدەن شىقتى. ويتكەنى وزگە ەمەس, ءبىرىنشى بولىپ استانا مۇنداي جوبالاردى جۇزەگە اسىرۋعا بولاتىنىن دالەلدەپ بەردى. بىزگە ۇلگى كورسەتتى. سىزدەردىڭ تاجىريبەدەن كوپ نارسە ۇيرەنەتىنىمىزگە سەنەمىن. ارينە, قالا قۇرىلىسىنداعى كەز كەلگەن الەۋمەتتىك جوبانىڭ ءبىر ارتىقشىلىعى, باسىمدىعى بولادى. مەنىڭ ويىمشا, بۇل جەرگە كەلگەن كىسى اۋەلى ساۋلەت ونەرىنە نازار اۋدارادى. مەنىڭ ويىمشا, ءىس جۇزىندە استانادا ەۋرازيالىق ساۋلەتتىڭ شىعىستاعى جاڭا بەت-بەينەسى قۇرىلۋدا. بۇل انىق بايقالىپ تۇر. استانا جەر بەتىندەگى باسقا ەشبىر قالاعا ۇقسامايدى. ءوزىنىڭ بەت-بەينەسى, مىنەزى, ءتۇر-كەلبەتى بار. قازاق حالقى ءۇشىن ەڭ نەگىزگى جەتىستىك, تابىس وسى.
ەڭ باستى ايتارىم, استانالىقتاردىڭ جانە قازاقستاندىقتاردىڭ ءبىزدى قۇشاعىن ايقارا اشىپ, جىلى قابىلداعانى قۋانتتى. قازاقتار اسا قوناقجاي حالىق ەكەنىن ءوز كوزىممەن كوردىم. ماعان استانانىڭ قۇرىلىسى ەرەكشە اسەر قالدىردى. عاجايىپ عيماراتتار, ەڭسەلى كوشەلەر, ادەمى گۇلزارلار باس قالانى وزگەلەردەن بولەك ەتىپ, كورسەتىپ تۇر. ەكىنشىدەن, ءبىز ءوز ارىپتەستەرىمىز – قالا مەرياسىنىڭ وكىلدەرىمەن اڭگىمەلەستىك. سونداعى بايقاعانىم, ءار قازاقتىڭ ءون بويىنداعى ءوپتيميزمنىڭ, كۇش-قۋاتتىڭ زور ەكەنىنە تاڭداندىم. الداعى 10-12 جىلدا استانا ەكى ەسەگە ۇلعايىپ, حالقىنىڭ سانى دا وسە تۇسەتىنىن ەستىدىم. بۇل دا قۇرمەتپەن قاراۋعا لايىق ءىس. ويتكەنى ءار ادامنىڭ باقىتتى, جايلى, الاڭسىز ءومىر ءسۇرۋى ءۇشىن بارلىق جاعدايدى تۋعىزۋعا ۇمتىلىپ جاتقان ەلدى كوردىم. شىنىمدى ايتسام, ءبىر جاعىنان استانالىقتارعا قىزىعا دا, قىزعانا دا قارايمىن. وزىمىزگە ۇلگى تۇتارلىق ءبىراز نارسەلەردى قاعازعا جازىپ, كوڭىلگە ءتۇيىپ الدىم. ۇشىنشىدەن, قالا مەرلەرى فورۋمىنىڭ وتە جوعارى دەڭگەيدە ۇيىمداستىرىلعانىن, وتكىزىلگەنىن اتاپ ايتۋ ءلازىم. ءتىپتى, وسىنداي باسقوسۋدى استانا تاجىريبەسىنەن ۇيرەنىپ, گومەلدە دە وتكىزۋدى ويلاستىراتىن شىعارمىز.
بۇل استاناعا ەكىنشى رەت كەلۋىم. بۇرىنعى قالا مەن بۇگىنگى قالانىڭ ايىرماسى جەر مەن كوكتەي. ەسىلدىڭ جاعاسىنداعى باس قالا دامىپ-وركەندەپ, اجارلانا ءتۇسىپتى. ءوزىم مۋنيتسيپاليتەتتە جۇمىس ىستەگەندىكتەن, كاسىپتىك جاعىنان قارادىم. بىردەن كوزگە تۇسەتىن نارسە, بۇل جەردە تاس جولدار وتە ساپالى توسەلگەن. جول ايرىقتارى كوپ. قالا جاسىل جەلەككە ورانىپ تۇر. كوشەلەر مەن گۇلزارلار تاپ-تازا, وتە جيناقى. تاعى ءبىر ايتاتىن نارسە, استانادا ستيحيالىق نۇكتەلەر جوق. بىشكەكتە شەشىمىن تاپپاعان ماسەلە استانادا جوق ەكەنىن كوردىم. سەبەبى بىشكەك – وتە كونە قالا, ال استانا – جاس قالا. بۇل جەردەن جاستىقتىڭ جالىنى, ءوپتيميزمنىڭ لەبى ەسىپ تۇر. سوعان قۋاندىم.
قازىرگى كەزدە جاڭا جىبەك جولى جونىندە كوپتەگەن يدەيالار ايتىلۋدا. مەنىڭشە, ول تاماشا تۇجىرىمداما. ويتكەنى بولاشاقتا جىبەك جولىنىڭ بويىنداعى ەلدەر مەن قالالاردىڭ ءبارى ىنتىماقتاستىق, بىرلىك, ىمىراشىلدىق ارقىلى داميدى. وسى جوبانىڭ ارقاسىندا قازاقستان مەن قىتايدىڭ مەديتسينا, ءبىلىم بەرۋ, تۋريزم جانە وزگە دە ماڭىزدى سالالارداعى ىنتىماقتاستىعى ارتادى. جىبەك جولىن جاڭعىرتۋدا استانا نەگىزگى ءرول وينايدى. بۇگىنگى باسقوسۋدىڭ ءوزى ەۋرازيانىڭ كىندىگىندەگى قازاقستان ەلورداسىنىڭ ەلدەر مەن ۇلتتار اراسىنداعى جاڭا ديالوگتىڭ, ارىپتەستىكتىڭ ورتالىعىنا اينالاتىنىن دالەلدەپ بەردى. استانا ماعان بارلىق جاعىنان دا ۇنايدى.
بۇل جولعى ساپاردان, فورۋمنان العان اسەرلەرىم ۇشان-تەڭىز. 20 جىل بۇرىن سالىنعان قالا كوز ىلەسپەس جىلدامدىقپەن دامىپ كەلە جاتقانىنا كۋا بولدىم. استانانى ءبىر كورگەننەن قاتتى ۇناتتىم. ونىڭ سەبەپتەرى كوپ. بىرىنشىدەن, مۇندا تۇرعىن ۇيلەر مەن اكىمشىلىك عيماراتتاردى, سپورت نىساندارى مەن وقۋ وردالارىن سالعاندا جوعارى تەحنولوگيالار قولدانىلعان. حالىقارالىق دەڭگەيدەگى ءىس-شارالاردى وتكىزۋگە مۇمكىندىك بەرەتىن تاماشا ستاديون, ەكسپو-قالاشىق, مادەنيەت سارايلارى بوي كوتەرگەن. شىنىندا دا, استانالىقتار مەن تۋريستەر ءۇشىن بارلىق قولايلى جاعدايلار تۋعىزىلعان. كورىكتى دە شىرايلى شاھاردىڭ بارلىق تۇرعىندارىن 20 جىلدىق مەرەيتويمەن قۇتتىقتايمىن! بارشا قازاقستاندىقتارعا زور دەنساۋلىق, اشىق اسپان, مول تابىس تىلەيمىن! استانا جىل سايىن تۇلەپ, ءوسىپ-وركەندەپ, حالىقتىڭ باقىتى ءۇشىن جاساي بەرسىن!
استاناعا بۇرىن-سوڭدى كەلگەن ەمەسپىن. بۇل – العاشقى ساپارىم. بۇعان دەيىن قازاقستاننىڭ ەلورداسى جونىندە كوپ ەستىدىم. شىنىمدى ايتسام, كوزىممەن كورۋدى ارماندادىم. ەندى, مىنە, سول ارمانىم ورىندالدى. استانا جوعارى قارقىنمەن ءوسىپ كەلەدى. ول وزگەلەرگە تاماشا ۇلگى بولا الادى. مىسالى, پۋنا – ءۇندىستاننىڭ ماحاراشترا شتاتىنداعى ەكىنشى ۇلكەن قالا. ول ەلىمىزدىڭ مادەني, رۋحاني استاناسى بولىپ سانالادى. ءۇندىستاندا «اقىلدى» قالا جوباسىنا زور قىزىعۋشىلىق تۋعىزىپ, ەنگىزۋدى جوسپارلاپ وتىر. وسى فورۋمنىڭ جۇمىسىنان, ناتيجەسىنەن العان اسەرلەرىمدى, جاڭالىقتارىمدى ءوز ەلىمە بارعان سوڭ بولىسەمىن. «اقىلدى» قالا دەگەن ۇعىم كەيىننەن پايدا بولدى. شىنىمدى ايتسام, سمارت تەحنولوگيالار تۋرالى كوبىرەك بىلگىم كەلەدى. پۋنادا اۆتوماتتاندىرىلعان ۆەلوجول سالىندى. وسى جەردە «اقىلدى» تەحنولوگيا قولدانىلدى. ەكىنشى جاعىنان, ءبىزدىڭ ەلدەگى ەڭ ۇلكەن ماسەلە – قورشاعان ورتانى قورعاۋ. حالىق سانى كوپ بولعاندىقتان, ونى شەشۋ قيىنعا سوعۋدا. الايدا استانانىڭ وسى باعىتتاعى ۇزدىك تاجىريبەسىن ۇلگى ەتىپ الۋعا دايىنبىز.
