كەيدە ەلورداداعى كوشەگە ەسىمى بەرىلگەن تۇلعالاردىڭ اتى-ءجونى تولىق نەمەسە انىق جازىلماعاندىقتان تۇسىنبەستىك تۋىپ جاتادى. كەشە بەلگىلى اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى حابارلاسىپ, وسىنداي ءبىر جاعداي باسىنان وتكەندىگىن ايتتى. نەسىپبەك اعا كاراوتكەل تۇرعىن الابىنا بارعاندا «مادي» دەگەن كوشەنى كورىپ, «بۇل قاي مادي؟» دەپ ءارى-ءسارى ويلانىپ قالىپتى. ءسويتىپ, ويىنىڭ ءبىر ۇشى, بۇل ارقالى اقىن, ءانشى – كومپوزيتور ءمادي ءباپيۇلىنا بەرىلگەن كوشە بولار دەگەنگە تىرەلەدى. 
بىراق قازاق ونى «ءمادي» دەپ جازادى. اقىن ءوزىنىڭ ولەڭىندە: «باپيدەن جالعىز تۋعان ءمادي ەدىم» دەپ ايتادى. وندا كوشەگە «ءمادي ءباپيۇلى» دەپ تولىق جازۋ قاجەت.
– قازاقتا تەگىمەن ەمەس, ەسىمىمەن قالىپتاسقان تۇلعالار بار. مىسالى, ولار: ابىلاي, اباي, شوقان, ىبىراي, شاكارىم, قاجىمۇقان بولىپ ايتىلادى. ەندى زاڭعار جازۋشى مۇحتار اۋەزوۆتى «مۇحتار» دەپ ايتا المايسىز. ول كىسى فاميلياسىمەن قالىپتاسقان. ونىڭ ۇستىنە مۇحتارلار كوپ. الاش ارداقتىسى ءاليحان بوكەيحانوۆتى دا, اكادەميك قانىش ساتباەۆتى دا سولاي تولىق جازۋ كەرەك. ءبىر قۋانارلىعى, كوشەگە ەسىمى بەرىلگەن ءبىرجان سال, اقان سەرى اتالارىمىز دۇرىس جازىلعان. مىسالى, اتاقتى قوبىزشى ىقىلاس دۇكەنۇلىن «ى.دۇكەنۇلى» كوشەسى دەپ جازىپتى. ال وسىنى كىم بىلەدى؟ مىنە, وسىنداي كوشە اتاۋلارىندا قاتەلىكتەر بار. سونى قالالىق اكىمشىلىككە, وسىعان جاۋاپتى ادامدارعا قۇلاققاعىس رەتىندە ايتقىم كەلەدى, – دەدى نەسىپبەك ايتۇلى.
