«نۇر وتان» پارتياسى استانا قالالىق فيليالىنىڭ ءماجىلىس زالىندا اتالمىش ۇيىمنىڭ 15 جىلدىعىنا ارنالعان
سالتاناتتى شارا ءوتتى.
شارا بارىسىندا پارتيا وكىلدەرىن ايتۋلى كۇنمەن شىن جۇرەكتەن قۇتتىقتاعان «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ پارتيانىڭ 15 جىلدىعىن مەرەكەلەۋ وتە جاۋاپتى كەزەڭگە سايكەس كەلىپ وتىرعانىن, ويتكەنى, قوعام «ماڭگىلىك ەل» ۇلتتىق يدەياسىن باسشىلىققا الا وتىرىپ, ەلباسى ايقىنداعان الەمنىڭ دامىعان 30 ەلىنىڭ قاتارىنا ەنۋ ماقساتىن قولعا العانىن ايتتى.
«حالىقپەن بىرگە تابىستى دا اۋىر جولدان وتكەن پارتيا ون بەس جىل ىشىندە ماڭىزدى قادامدارعا بارا وتىرىپ, كوپتەگەن يگىلىكتى ىستەرگە باستاماشى بولا ءبىلدى. ەڭ باستىسى, حالىق سەنىمىنە يە بولدى» دەگەن قالالىق فيليال توراعاسىنىڭ ءبىرىنشى ورىنباسارى «قازاقستان-2050» ستراتەگياسى مەن «نۇر وتان» پارتياسىنىڭ باعدارلامالىق ماقساتتارىن ورىنداۋعا, پارتيانىڭ بۇگىنگىدەي جاعدايعا جەتۋىنە ۇلەس قوسقاندارى ءۇشىن ارىپتەستەرىنە شىنايى العىس ءبىلدىردى.
سول كۇنى پارتيا قاتارى تاعى التى اداممەن تولىقتى. ولارعا پارتيا بيلەتتەرىن سالتاناتتى جاعدايدا تابىس ەتكەننەن كەيىن ساپار قايراتۇلى «نۇر وتان» پارتياسى ساياسي كەڭەسى بيۋروسىنىڭ قاۋلىسىنا سايكەس, ءبىر توپ ارىپتەستەرىن «بەلسەندى قىزمەتى ءۇشىن» توسبەلگىسىمەن ماراپاتتادى. ولاردىڭ قاتارىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى حالىقارالىق قاتىناستار كافەدراسىنىڭ دوتسەنتى ءامىرجان الپەيىسوۆ, «نۇر وتان» پارتياسى استانا قالالىق فيليالى ۇيىمداستىرۋ-باقىلاۋ جۇمىسى ءبولىمىنىڭ كەڭەسشىسى قىمبات بۇلانباەۆا, «تسەسنا» كورپوراتسياسى اق ديرەكتورلار كەڭەسىنىڭ توراعاسى, استانا قالالىق ءماسليحاتىنىڭ دەپۋتاتى سەرىك جاقسىبەكوۆ, ەسىل اۋدانىنىڭ اكىمى ءسابيلا مۇستافينا جانە ت.ب. بولدى.
ۇلت كوشباسشىسى, پارتيا توراعاسى نۇرسۇلتان نازارباەۆتىڭ سىندارلى ساياساتىن جۇزەگە اسىرۋعا اتسالىسىپ, پارتيانىڭ باعدارلامالىق ماقساتتارى مەن مىندەتتەرىن ورىنداۋعا قاتىسقان جانە ازاماتتىق بەلسەندىلىك تانىتقانى ءۇشىن استاناداعى №1 قالالىق ەمحانانىڭ باس دارىگەرى كۇلجان اناسوۆا, №53 مەكتەپ-ليتسەيدىڭ ديرەكتورى قازبەك ءابدىراسىلوۆ, ينتەرناتسيونالنىي تۇرعىن الابى باستاۋىش پارتيا ۇيىمىنىڭ ءتورايىمى مايرا الىمحانقىزى, №7 ەمحانانىڭ باس دارىگەرى ايگۇل قۋانىشەۆا جانە ت.ب. «العىس حاتپەن» ماراپاتتالسا, ەلباسىنىڭ ستراتەگيالىق باعىتىن جانە پارتيانىڭ باعدارلامالىق ماقساتتارى مەن مىندەتتەرىن ىسكە اسىرۋعا, ەلىمىزدىڭ قوعامدىق-ساياسي ومىرىنە بەلسەنە اتسالىسقان تاعى ءبىر توپ ازامات «قۇرمەت گراموتاسىنا» يە بولدى.
سالتاناتتى شارا سوڭىندا ءسوز العان ءا.الپەيىسوۆ ون بەس جىل ىشىندە ەل تاۋەلسىزدىگىن نىعايتۋ جولىندا پارتيا تاراپىنان ۇلكەن جۇمىستار اتقارىلعانىن ايتسا, پارتياعا جاڭادان مۇشەلىككە ەنگەندەر ەلباسىنىڭ يدەيالارى مەن جوسپارلارىن قولدايتىندىقتارىن, پرەزيدەنتتىڭ باستامالارىنا سەنەتىندىكتەرىن, بولاشاقتا ەل ءۇشىن, پارتيا ءۇشىن جۇمىس ىستەۋگە دايىن ەكەندىكتەرىن جەتكىزدى.
گۇلبارشىن وكەشقىزى
