جاڭا ۇلگىدەگى پارتبيلەت تابىستادى
كەشە 15 جىلدىقتى مەرەكەلەۋ قارساڭىندا «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك بىرنەشە ادامدى پارتيا قاتارىنا سالتاناتتى تۇردە قابىلداپ, جاڭا ۇلگىدەگى پارتيا بيلەتىن تابىس ەتتى.
ولاردىڭ ىشىندە استانا قالاسىنداعى قازاق گۋمانيتارلىق زاڭ ۋنيۆەرسيتەتىنىڭ پرەزيدەنتى ماقسۇت نارىكباەۆ, قازاقستان رەسپۋبليكاسى قارجى مينيسترلىگى قارجى مونيتورينگى كوميتەتى توراعاسى بەيسەنعالي تاجياقوۆ, «ۇلتتىق اقپاراتتىق تەحنولوگيالار» اق Call ورتالىعىنىڭ باس مامانى (1 توپتاعى مۇگەدەك) كريستينا رومانوۆا, الماتى وبلىسى ءازىربايجان مادەني ورتالىعىنىڭ ءتورايىمى اسىلى وسمان, م.وسكەنباەۆ اتىنداعى ماڭعىستاۋ وبلىستىق فيلارمونياسىنىڭ ءانشىسى ايدا بايگەلوۆا, تالدىقورعاندىق اۋىل شارۋاشىلىعى ۇستاسى, ينتەرناتسيوناليست-جاۋىنگەر اسحات قاسەنوۆ, №6 حرومتاۋ گيمنازياسىنىڭ بەينەلەۋ ونەرى مەن سىزۋ ءپانىنىڭ مۇعالىمى ابزال قۇرمانوۆ, «كازحروم» اق اقسۋ فەرروقورىتپا زاۋىتى №1 فەرروقورىتپا پەشى تسەحىنىڭ كورىكشىسى التىنبەك اسانوۆ, تەمىرتاۋداعى ءاليا مولداعۇلوۆا اتىنداعى دارىندى بالالارعا ارنالعان سپورت مەكتەپ-ينتەرناتىنىڭ تاربيەلەنۋشىسى, دزيۋدودان سپورت شەبەرى اننا ستارچەنكو بار.
جاڭا ۇلگىدەگى پارتبيلەت پلاستيكالىق كارتوچكا ىسپەتتەس. بەت جاعىندا پارتيا بيلەتىنىڭ ءنومىرى, اتى-ءجونى جانە پارتياعا كىرگەن مەرزىمى كورسەتىلگەن. سىرت جاعىندا پارتيا بيلەتىنىڭ قۇپيا سانى مەن رەسپۋبليكا بويىنشا تەگىن حابارلاسۋعا بولاتىن call-ورتالىقتىڭ تەلەفونى (597850) جازىلعان.
جاڭا پارتيالىق بيلەتتەر بىرىڭعاي ەلەكتروندىق مالىمەتتەر بازاسىنا بىرىكتىرىلەدى.
ول مالىمەتتەردى سايكەستەندىرۋگە, مەكەنجايىڭدى اۋىستىرعاندا, ەسەپتىلىك جۇرگىزۋگە ىڭعايلى جانە پارتيا مۇشەلەرىمەن قارىم-قاتىناس جاساۋعا جەڭىل.
«پارتيا توراعاسى, ەلباسىمىز نۇرسۇلتان ءابىشۇلى نازارباەۆتىڭ بيىلعى جولداۋىندا ايتىلعان تاريحي ءمانى زور «ماڭگىلىك ەل» يدەياسىن جۇزەگە اسىراتىن ەڭ باستى ساياسي كۇش – «نۇر وتان» ەكەنىنە كوزىم جەتتى.
وسىنداي الدىمىزداعى ۇلى ماقساتتاردى ورىنداۋدا سىزدەرمەن ارقاشان بىرگە بولۋ ءۇشىن حالىقتىڭ سەنىمىنە, تاۋەلسىزدىكتىڭ تىرەگىنە اينالعان «نۇر وتان» پارتياسىنا وتۋگە بەل بايلادىم» دەدى پارتيا قاتارىنا وتكەن الماتى وبلىسى ءازىربايجان مادەني ورتالىعىنىڭ ءتورايىمى اسىلى وسمان.
«ەگەر, ەلىمىزدىڭ ەڭ باستى بايلىعى – ءبىزدىڭ كوپۇلتتى ۇيىمىزدەگى بەيبىتشىلىك پەن كەلىسىم ەكەنىن ايتاتىن بولساق, وندا سول بەيبىتشىلىك پەن تاتۋلىعىمىزدى ساقتاپ, نىعايتۋعا اتسالىسىپ جۇرگەن ۇيىمداردىڭ بىرەگەيى – «نۇر وتان» پارتياسى. سول سەبەپتەن, پارتيا قاتارىنا كىرۋ تۋرالى وي تۋىنداپ, ءۇي-ىشىممەن اقىلداسا وتىرىپ, شەشىم قابىلدادىم» دەدى پارتيا قاتارىنا وتكەندەردىڭ تاعى ءبىرى – تالدىقورعاندىق اسحات قاسەنوۆ.
«نۇر وتان» پارتياسىنىڭ 15 جىلدىعىن مەرەكەلەۋ قارساڭىندا ەلىمىزدىڭ باسقا ايماقتارىندا دا پارتيالىق بيلەتتەردى سالتاناتتى تۇردە تابىستاۋ ءراسىمى بولىپ ءوتتى.
جايىق ناعىماش