ماڭىزدى ماسەلەلەر تالقىلاندى
ەسىل اۋدانىنىڭ اكتيۆى مەملەكەت باسشىسىنىڭ حالىققا جولداۋىنىڭ نەگىزگى باعىتتارىن تالقىلادى.
جيىنعا اۋدان اكىمى تولەگەن زاكاريانوۆ پەن استانا قالالىق ءماسليحات دەپۋتاتتارى, اۋدان قۇرىلىمدارىنىڭ باسشىلارى, اۋداندىق ارداگەرلەر ۇيىمىنىڭ اكتيۆى, سونداي-اق, ءبىلىم بەرۋ, دەنساۋلىق ساقتاۋ, ءمادەنيەت, سپورت مەكەمەلەرىنىڭ جانە قۇرىلىس كومپانيالارى وكىلدەرى قاتىستى.
پرەزيدەنت ءوز جولداۋىندا حالىق تابىسىنىڭ ءوسۋى, تۇرمىس ساپاسىن ارتتىرۋ, ءومىر سۇرۋگە جايلى ورتا قالىپتاستىرۋ, ازاماتتار سۇرانىسىنا بەيىمدەلگەن مەملەكەتتىك اپپارات, ءتيىمدى سىرتقى ساياسات, ءاربىر قازاقستاندىقتىڭ ەلىمىزدەگى وزگەرىستەر ۇدەرىستەرىنە اتسالىسۋى تۋرالى نەگىزگى 6 باعىتتى ايتقان بولاتىن.
جيىن بارىسىندا ءسوز العان جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆ, №2 كوپسالالى اۋرۋحانا باس دارىگەرىنىڭ ورىنباسارى گۇلميرا ماعزۇموۆا جانە قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى استانا قالاسى بويىنشا دەپارتامەنت باسشىسى, ادەپ جونىندەگى كەڭەس ءتورايىمى جازيرا جىلقىشيەۆا سىندى سپيكەرلەر تۇرعىنداردى جۇمىسپەن قامتۋ, ساپالى جانە قولجەتىمدى تۇرعىن ۇيمەن قامتاماسىز ەتۋ, ءبىلىم بەرۋ جانە دەنساۋلىق ساقتاۋ سالالارىن دامىتۋ, تۇرعىن ءۇي قورىن ءتيىمدى باسقارۋ, مەملەكەتتىك اپپاراتتى جاڭعىرتۋ جانە سىبايلاس جەمقورلىققا قارسى كۇرەس سياقتى ماسەلەلەردى قوزعادى.