قاجىلىققا جاياۋ بارعان بابالارىمىز جايىندا تاريحتان بىلەمىز. ال قازىرگىدەي وركەنيەت دامىعان زاماندا ايشىلىق الىس جولدارعا التى ساعاتتا جەتۋگە بولادى. سوندىقتان شىعار, بابالار ىزىمەن پايعامبار شاھارىنا جاياۋ بارۋعا كەلىسە قوياتىندار جوقتىڭ قاسى. الايدا, قانىمىزداعى تەكتىلىك بويىمىزدان ءالى جوعالماپتى. ەلوردالىق دۋلات يمانقاجى ەرتەڭ – استانا كۇنى «نۇر-استانا» ورتالىق مەشىتىنەن مەككەگە اتتانباق. ول جەتى مىڭ شاقىرىم قاشىقتىقتاعى مەكەنگە دەيىن جۇگىرىپ بارىپ, كىشى قاجىلىعىن وتەپ كەلۋگە نيەتتەنىپ وتىر.
جۇقالتاڭ سارى ءوڭدى, جىڭىشكە, ورتا بويلى دۋلات ەردىڭ جاسى – ەلۋگە تاياعان. ماماندىعى – قارجىگەر. 2006 جىلدان باستاپ جۇگىرۋدى قولعا العان. «سول تۇستا دەنساۋلىعىم سىر بەرىپ جۇرەتىن, ۇيلەنگەنىمە ون جىل بولسا دا پەرزەنتىم جوق ەدى. سپورتقا كەلگەننەن كەيىن جاعدايىم دا تۇزەلدى, توميريس ەسىمدى قىزىم دۇنيەگە كەلدى. قازىر ول جەتى جاستا. ءتورت جىلدان بەرى استانا قالاسىنداعى №56 مەكتەپ-ليتسەيدە شاڭعى ۇيىرمەسىنىڭ باپكەرىمىن» دەيدى مارافونشى. ەڭ العاش جۇگىرۋىن اسا كورنەكتى مەملەكەت جانە قوعام قايراتكەرى دىنمۇحامەت قوناەۆتىڭ توقسان بەس جىلدىق مەرەيتويىنا ارناپتى. «قاقاعان قىستا الماتىدان باقاناسقا دەيىن مارافون جاسادىم. قاتتى قينالسام دا مەجەگە امان-ەسەن جەتتىم» دەپ, اعىنان جارىلادى ول.
ءيا, بايقاعانىڭىزداي, دۋلات يمانقاجى – نەگىزىنەن, ءدىندار ەمەس, مارافونشى. «ورىستى سپورتقا جاقىن دەيمىز, شىندىعىندا, قازاق ودان دا جاقىن. ءبىزدىڭ جەتكىنشەكتەرىمىز كەز كەلگەن سپورتتى قاجەت بولسا ءبىر-اق ايدىڭ ىشىندە مەڭگەرىپ الادى» دەگەن دۋلات ءوز شاكىرتتەرىنىڭ دەنى وڭتۇستىك وڭىرلەردەن ەكەنىن ايتتى. تالابى مىقتى, تالپىنىسى كوڭىل قۋانتاتىن ءتورت وقۋشىسى ريددەر قالاسىنداعى وليمپيادا رەزەرۆتەرىن دايارلايتىن مەكتەپتە ءبىلىم الۋدا. ولار الداعى بەس جىلدا قازاقتىڭ اتىن شىعاراتىنىنا سەنىمدى ءوزى.
دۋلات يمانقاجىدان مەككەگە جاياۋ اتتانۋعا نە تۇرتكى بولعانىن سۇراعان ەدىك. «تۋعان جەرىم سەمەي وڭىرىندە ءجۇرىپ, ءبىر باسقوسۋدا ءدىن ىستەرى اگەنتتىگىنىڭ توراعاسى مارات ازىلحانوۆپەن كەزدەسىپ قالدىم, – دەيدى. – ەكەۋارا اڭگىمەمىز جاقسى جاراسىپ, مەن وعان ەلىمىزدە مارافوندى ىلگەرىلەتۋ توڭىرەگىندەگى ويىمدى جەتكىزدىم. ويتكەنى, سالاۋاتتى ءومىر سالتىن قالىپتاستىرۋدى ءدىن دە قولدايدى عوي. سوزدەن ءسوز, ويدان وي تۋىپ, استانادان مەككەگە دەيىن جۇگىرىپ بارىپ-كەلۋگە تاۋەكەل ەتە الاتىنىمدى ايتتىم. ول قىزىعۋشىلىق تانىتىپ, قۇزىرلى ورىندار تاراپىنان قولداۋ كورسەتۋگە ۋادە ەتتى. سونىمەن قاتار, استانا مەشىتتەرىنىڭ يمامدارى قاجىلىق مىندەتىمدى دە اتقارا كەلۋىمدى ۇسىندى. بۇعان دا قۋانا كەلىستىم».
مارافونشىنىڭ يگى ساپارىنا جان-جاقتان قول ۇشىن سوزعان ازاماتتار از ەمەس. ايتالىق, «نۇر وتان» پارتياسى, سىرتقى ىستەر مينيسترلىگى, «نۇر استانا» ورتالىق مەشىتى, «مەگاسپورت» سپورتتىق برەندتەر دۇكەنى باسشىلىعى, پارلامەنت ءماجىلىسىنىڭ دەپۋتاتتارى, اۋعانستان سوعىسىنىڭ ارداگەرى باقىتبەك سماعۇل, تالعات ەرعاليەۆ جانە ءوزى ۋاقىتشا جۇمىس ىستەپ جۇرگەن №10 قالالىق ەمحانانىڭ ۇجىمى دەمەۋشىلىك تانىتىپ, قولدداۋ كورسەتۋدە.
استانا تويىندا باستالاتىن استانا-مەككە-استانا مارافونىنا ءۇش ايداي ۋاقىت كەتەتىن كورىنەدى. «مەككەگە دەيىن جۇگىرۋ جولىمدى ەسەپتەگەندە, جەتى مىڭ شاقىرىمعا تابانىم تيەدى ەكەن, قايتۋىم – تاعى جەتى مىڭ شاقىرىم. جول بويى ازەربايجان, يران, كۋۆەيت, ساۋد ارابياسى ەلدەرىنىڭ توپىراقتارىن باسىپ وتەدى ەكەنمىن. اتتەڭ, جولىمنىڭ جارتىسىنان كوبىسى ىستىققا تۇسەيىن دەپ تۇر. قۇداي قۋات بەرسىن!» دەيدى د.يمانقاجى. مارافون سپورتىنىڭ تاريحىنا ۇڭىلسەك, جەر بەتىندەگى ەڭ مىقتى جۇگىرۋشىلەردىڭ ءوزى ون كۇننەن ارتىق جولدا بولماپتى. ال, بولاشاق قاجىمىزدىڭ مارافونى ءۇش ايعا سوزىلماق.
جۇرتشىلىق دۋلاتتى 2010 جىلعى اق ازيادا ويىندارىنان بىلەدى. ول حالىقارالىق باسەكەنىڭ قۇرمەتىنە الماتى مەن استانانىڭ اراسىن ءبىر اپتادا جۇگىرىپ وتكەن. «بۇل وسى كۇنگە دەيىنگى ۇزاق ساپارىم ەدى, قاتتى قينالدىم, بىراق, قايتىپ كەتۋگە نامىسىم جىبەرمەدى» دەيدى مارافونشى. ول ەڭ ۇزاق ساپارىنىڭ باسى استانا كۇنىمەن تۇسپا-تۇس كەلۋىن ءجاي عانا سايكەستىك دەپ ءتۇسىندىردى.
اسحات رايقۇل
