مەملەكەتتىك قىزمەتكەرلەر – سپارتاكيادا ساڭلاقتارى
ەلوردادا مەملەكەتتىك مەكەمەلەر قىزمەتكەرلەرىنىڭ ءداستۇرلى سپارتاكياداسى مارەسىنە جەتتى. قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالىپ وتكىزىلگەن جارىستىڭ جەڭىمپازدارى مەن جۇلدەگەرلەرىن استانا قالاسىنىڭ اكىمى ادىلبەك جاقسىبەكوۆ قۇتتىقتاپ, سالتاناتتى جاعدايدا كۋبوك تاپسىردى.
استانا قالاسى دەنە تاربيەسى جانە سپورت باسقارماسى ۇيىمداستىرعان كەشەندى جارىسقا ەلورداداعى بارلىق مەملەكەتتىك مەكەمەلەر قاتىستى. جارىس جولىنا شىققان اۋەسقوي سپورتشىلار شاحمات, ۇستەل تەننيسى, ۆولەيبول, بيليارد, فۋتبول, ارقان تارتۋ جانە جەڭىل اتلەتيكالىق ەستافەتا بويىنشا سايىسقا تۇسكەن. جالپى, مالىمەت بويىنشا 500-گە جۋىق
قىزمەتكەر سپارتاكيادا قاتىسۋشىسى بولدى.
سپارتاكيادا جۇلدەلەرى ەكى باعىتتا ساراپقا سالىندى. جالپى مەملەكەتتىك مەكەمەلەر قىزمەتكەرلەرى ءوزارا جارىسقا تۇسسە, كۇشتىك قۇرىلىمدار اراسىنداعى سايىستار بولەك ۇيىمداستىرىلدى.
سونىمەن ءۇش ايعا جالعاسقان سپارتاكيادانىڭ قورىتىندىسىندا مەملەكەتتىك مەكەمەلەر قىزمەتكەرلەرى اراسىندا استانا قالاسىنىڭ قازىناشىلىق دەپارتامەنتى ۇجىمى ءبىرىنشى ورىندى جەڭىپ الدى. جەڭىمپاز كوماندا جالپى ەسەپتە 337 ۇپاي جينادى. ەكىنشى ورىنعا 316 ۇپاي ەنشىلەگەن استانا قالاسىنىڭ قۇرىلىس باسقارماسى يە بولدى. ءۇشىنشى ورىنعا استانا قالاسىنىڭ مەملەكەتتىك مۇلىك جانە جەكەشەلەندىرۋ دەپارتامەنتى تابان تىرەدى. اسىرەسە, وسى ءۇش كوماندانىڭ اراسىنداعى فۋتبول باسەكەسى وتە تارتىستى وتكەنىن اتاپ ايتۋعا بولادى. دوپ دوداسىندا مەملەكەتتىك مۇلىك جانە جەكەشەلەندىرۋ دەپارتامەنتىنىڭ فۋتبولشىلارى جەڭىسكە جەتكەن ەدى. ەكىنشى ورىنعا قازىناشىلىق دەپارتامەنتىنى قىزمەتكەرلەرى يە بولسا, قۇرىلىس باسقارماسىنىڭ ۇجىمى قولا ءجۇلدەنى قاناعات تۇتقان ەدى.
ال, كۇشتىك قۇرىلىمدار اراسىنداعى باسەكەدە استانا قالاسىنىڭ توتەنشە جاعدايلار جونىندەگى دەپارتامەنت كومانداسى توپ جاردى. استانا قالاسىنىڭ مەملەكەتتىك كىرىستەر دەپارتامەنتى قىزمەتكەرلەرى ەكىنشى ورىننان كورىندى. ال ۇزدىك ۇشتىكتى استانا قالاسىنىڭ ىشكى ىستەر دەپارتامەنتى كومانداسى ءتۇيىندەدى.
سونىمەن, استانا قالاسىنداعى مەملەكەتتىك مەكەمەلەر قىزمەتكەرلەرى اراسىنداعى سپارتاكيادا ءوز مارەسىنە جەتتى. جەڭىمپازدار مەن جۇلدەگەرلەرگە ديپلومدار, مەدالدار جانە سىيلىقتار تابىس ەتىلدى.
عالىم قوجابەكوۆ