4 ماۋسىم – قازاقستان رسپۋبليكاسى مەملەكەتتىك رامىزدەرىنىڭ كۇنى. وسىعان بايلانىستى «قازتۇتىنۋشىلاروداعىنىڭ» ساۋدا-ەكونوميكالىق كوللەدجىندە پارلامەنت سەناتى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى سەرىك اقىلبايمەن كەزدەسۋ ءوتتى.
وتاندى ءسۇيۋ – مەملەكەتتىك رامىزدەرگە دەگەن قۇرمەتپەن استاسىپ جاتاتىنىن ايتقان كوميتەت توراعاسى ەلىم دەگەن ءار ازامات ەلدىگىمىزدىڭ تىرەگى بولعان مەملەكەتتىك نىشانداردى قاستەرلەۋگە ءتيىس ەكەندىگىن اتاپ ءوتتى. كەزىندە ءانۇراندى قالاي تىڭداۋ كەرەك دەگەن ماسەلە كوتەرىلگەندە «وڭ قولدى جۇرەگىمىزدىڭ تۇسىنا قويىپ تىڭداۋ كەرەك» دەگەن باستاما كوتەرگەن دەپۋتاتتاردىڭ ءبىرى – وسى سەرىك بايسەيىتۇلى بولاتىن. «وڭ قولدى جۇرەكتىڭ تۇسىنا اپارىپ, ءانۇراندى تىڭداۋ – وتانىڭدى جۇرەگىڭمەن سەزىن, تۋعان جەردىڭ قاسيەتىن جۇرەگىڭمەن ءتۇسىن, وتانعا دەگەن قىزمەتىڭدى جۇرەگىڭمەن جاسا» دەگەن ماعىنانى بىلدىرەتىنىن جاستارعا ەگجەي- تەگجەيلى تۇسىندىرگەن سەناتور تاۋەلسىز ەل ەكەنىمىزدى ايشىقتايتىن دا مەملەكەتتىك نىشاندار ەكەندىگىن اتاپ كورسەتتى.
كەزدەسۋ بارىسىندا زاڭ شىعارۋ جانە قابىلداۋ ءىسى دە ءسوز بولدى. زاڭ شىعارۋدىڭ كۇردەلىلىگىنە توقتالعان سەناتور زاڭدىق قۇجاتتاردا كەتكەن ءبىر قاتەلىكتىڭ ءوزى قوعامعا ۇلكەن زالال كەلتىرەتىنىن, سوندىقتان ول جان-جاقتى تالقىلاۋدان ءوتىپ, ۇزاق قارالاتىنىن جەتكىزدى.
جۇزدەسۋ سوڭىندا سەرىك اقىلباي ستۋدەنتتەردىڭ ساۋالدارىنا جاۋاپ بەردى.
ەركەجان ساتىمبەك
