ەلوردا تورىندە وتەتىن ناۋرىز مەيرامى بۇقارالىق سپورت سايىستارىنا تولى بولماق. اتاپ ايتقاندا, 22 ناۋرىز كۇنى استانا قالاسى اكىمدىگى الدىنداعى الاڭدا, سونداي-اق, اۋدانداردىڭ ورتالىق الاڭدارىندا جانە «پريگورودنىي», «تالاپكەر», «جەلەزنودوروجنىي», «ءوندىرىس», «ميچۋرينو», «كوكتال» جانە «ۇركەر» ەلدى مەكەندەرىندە كوپشىلىككە ارنالعان جارىستار ۇيىمداستىرىلادى. كۇرەس, كىر تاسىن كوتەرۋ, اسىق اتۋ, توعىزقۇمالاق, ارقان تارتۋ جانە باسقا دا سپورت تۇرلەرىنە اركىمنىڭ قاتىسۋعا مۇمكىندىگى بولادى. بۇقارالىق جارىستار ساعات 10.00-دە باستالادى.
بۇدان باسقا, استانالىقتار مەن قالا قوناقتارى بىرقاتار سپورت جارىستارىن تاماشالاي الادى. اتاپ ايتقاندا, 18-23 ناۋرىز ارالىعىندا «سارىارقا» رەسپۋبليكالىق ۆەلوترەگىندە تاەكۆوندودان جاسوسپىرىمدەر اراسىندا اشىق قالالىق جارىس, 20- 21 ناۋرىزدا شاڭعى-روللەرلىك تراسسادا شاڭعى جارىسى, 21-25 ناۋرىزدا «قازاقستان» سپورت سارايىندا سۋ دوبىنان قر چەمپيوناتىنىڭ شەشۋشى كەزەڭى وتەدى.
22-26 ناۋرىزدا «سايران» فۋتبول الاڭىندا بالالار مەن جاسوسپىرىمدەر اراسىندا فۋتبول ءتۋرنيرىن تاماشالاۋعا بولادى. 22 ناۋرىزدا «استانا-ارەنا» ستاديونىندا «اقتوبە» مەن «شاحتەر» كوماندالارىنىڭ كەزدەسۋىمەن قر چەمپيوناتىنىڭ جاڭا ماۋسىمى اشىلادى. 23-29 ناۋرىز ارالىعىندا «كەدەن» سپورت كەشەنىندە ەرلەر اراسىندا ۆولەيبولدان قازاقستان چەمپيوناتىنىڭ ءتورتىنشى كەزەڭى وتەدى. جەڭىل اتلەتيكا جانكۇيەرلەرى ءۇشىن دە ناۋرىز مەيرامىندا تارتىستى جارىسقا كۋا بولماق. 23 ناۋرىزدا استانالىق ساياباقتا 10 شاقىرىمعا جۇگىرۋدەن IV قىسقى استانا كۋبوگى وتەدى. ال 24 ناۋرىزدا «داۋلەت» سپورت كومبيناتىندا تەننيستەن حالىقارالىق جارىس باستالادى. ناۋرىز مەيرامىنا وراي سپورتتىق ءىس-شارالاردىڭ شەڭبەرىندەگى سوڭعى جارىس 25 ناۋرىزدا «ەۋرازيا» سپورت كەشەنىندە بالالار ۇيلەرى شاكىرتتەرى اراسىندا شاعىن فۋتبولدان ءتۋرنيرى بولماق.
