گازەتىمىزدىڭ وتكەن سانىندا استانا قالاسىنىڭ ءبىلىم باسقارماسى قوسىمشا ءبىلىم سالاسىن وڭتايلاندىرۋ ماسەلەسىن قاراپ جاتقانىن جازعانبىز. اتالمىش باسقارما باسشىسى ءانۋار جانعوزين قالا اكىمدىگىنىڭ رەسمي سايتى ارقىلى مۋزىكا جانە كوركەمسۋرەت مەكتەپتەرى بىرىكتىرىلمەيتىنىن حابارلادى.
«ءبىز قوسىمشا ءبىلىم بەرۋ ۇيىمدارىنداعى جاعدايدى جاقسارتۋ ءمۇمكىندىگىن قاراستىرۋدامىز. اتا-انالار الاڭداماسا دا بولادى. ەشكىم دە بالالاردى ديپلوم مەن سەرتيفيكات بەرىلەتىن ساپالى ءبىلىم الۋ مۇمكىندىگىنەن ايىرعالى تۇرعان جوق» دەيدى ءا. جانعوزين.
ونىڭ مالىمدەۋىنشە, باسقارمادا مەملەكەتتىك تاپسىرىستى ءبولۋ مۇمكىندىكتەرى قاراستىرىلۋدا. ولاردىڭ ىشىندە جەكەمەنشىك ۇيىمدار دا بار. وسى جاعداي وقۋ اقىسىن كوتەرمەۋگە العىشارت جاساپ, كاسىپكەرلەردى وقۋشىلاردى دامىتۋ ورتالىقتارىن اشۋعا تارتادى. قازىرگى تاڭدا استانادا قوسىمشا ءبىلىم بەرۋ نەگىزىنەن مەملەكەتتىك ۇيىمداردا اتقارىلادى.
«بىلتىر فيليالدار سانى 90-عا جۋىق بولسا, بۇگىن ولاردىڭ قاتارى 140-قا جەتتى. اتالعان باعىتتا جۇمىستار جالعاسۋدا. بۇگىنگى تاڭدا قالا بويىنشا قوسىمشا ءبىلىم بەرۋمەن قامتۋ 74%-دى قۇرايدى. 2020 جىلعا قاراي بۇل كورسەتكىش 90-95 %-عا دەيىن جەتەدى دەپ جوسپارلانىپ وتىر. بۇعان قوسا, مۋزىكا جانە كوركەمسۋرەت مەكتەبى جەلىسىن كەڭەيتۋ, وقۋشىلار سارايى مەن كوميۋنيتي-ورتالىقتاردىڭ فيليالدارىن اشۋ جوسپارلاندى» دەيدى باسقارما باسشىسى.
