نۇر-سۇلتاندا الەۋمەتتىك نان باعاسىن تۇراقتاندىرۋ ءۇشىن 10 مىڭ توننا ۇن ساتىپ الىنادى. قالا اكىمدىگى جانىنداعى كوميسسيا وتىرىسىندا «جايما» متس» جانە «توڭكەرىس» حپپ» سەرىكتەستىكتەرىنە جەڭىلدىكپەن نەسيە بەرۋ شارتتارى جاسالدى.
بولىنگەن قارجىعا 10 مىڭ توننا ۇن قورىن جاساقتاۋ كوزدەلگەن. ونىڭ 5 مىڭ تونناسى وسى جىلدىڭ سوڭىنا دەيىن ءبىرىنشى سۇرىپتى ۇننان جاسالعان «الەۋمەتتىك ناننىڭ» باعاسىن تۇراقتاندىرۋعا جۇمسالۋى ءتيىس. ۇن 3000-نان استام ساۋدا نۇكتەسىنە نان جەتكىزىپ وتىرعان قالانىڭ ءىرى ناۋبايحانالارى «كارۋند», «ستوليچنىي حلەب» سەرىكتەستىكتەرى, «حالىق نان», «شاح», «حلەبنىي كراي» جەكە كاسىپكەرلىكتەرىنە ۇلەستىرىلەدى. قازىر بۇل نىساندارمەن ءتيىستى شارتتار جاسالىپ جاتىر.
ناننان بولەك وزگە دە الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ماقساتىندا ەلوردا اكىمدىگى «اينالىم تەتىگى» جوباسىن, تۇراقتاندىرۋ قورىن, ماۋسىمدىق جارمەڭكەلەردى ۇتىمدى قولدانىپ وتىر. بيىل «اينالىم تەتىگى» جوباسىنا قاتىسۋشىلاردىڭ سانى ارتىپ, ساۋدا جەلىلەرىنە ازىق-تۇلىك ساتىپ الۋعا بولىنەتىن قارجى ۇلعايتىلدى. ساۋدا نىساندارىنىڭ اينالىمىن قامتاماسىز ەتۋ ماقساتىندا قوسىمشا 2 ملرد 700 ملن تەڭگە بولىنەدى. جوباعا «Magnum», «انۆار», «استىقجان», «كەنمارت», «ۆكۋسمارت», «ايان», «اقمول», «شاپاعات», «Small», «سارىارقا» ءتارىزدى ءىرى ساۋدا نىساندارى قاتىسىپ وتىر. استىق ونىمدەرى, كوكونىس, ەت جانە ءسۇت وڭدەۋمەن اينالىساتىن كاسىپكەرلەرمەن الدىن الا كەلىسىمشارتتار جاسالدى. وسىلايشا 14 مىڭ توننا كوكونىس قورى قامتاماسىز ەتىلدى. كوكونىستەر, ۇن, سيىر ەتىن جانە ت.ب. ازىق-تۇلىكتىڭ باعاسىن بىرقالىپتى ۇستاپ تۇرۋ ماسەلەسى پىسىقتالۋدا. باعانى تۇراقتاندىرۋدىڭ تاعى ءبىر تەتىگى – اۋىلشارۋاشىلىق جارمەڭكەلەرىن وتكىزۋ. رەسپۋبليكا وڭىرلەرىنىڭ قاتىسۋىمەن وتەتىن جارمەڭكەلەر 21 تامىزدان باستالدى جانە قازان ايىنىڭ سوڭىنا دەيىن جالعاسادى. كۇزگى جارمەڭكەلەردە 2 مىڭ توننادان استام ءونىم ساۋدالاندى. سونىمەن قاتار تارتىلعان ينۆەستيتسيالار ەسەبىنەن ەلوردادا 3 كوتەرمە ساۋدا ورتالىعى مەن ەكى جىلىجاي كەشەنىنىڭ قۇرىلىسى جۇرگىزىلۋدە. مۇنداي نىساندار دا باعانىڭ تۇراقتانۋىنا وڭ ىقپال ەتەدى دەپ كۇتىلىپ وتىر.
