بيىلعى جىلعى ناۋرىز مەيرامىنا استانالىق وقۋ ورىندارى ەرەكشە دايىندىقپەن كەلىپتى. وسى جولى استانا قالالىق تىلدەردى دامىتۋ باسقارماسى شاھارداعى مەديتسينالىق-تەحنيكالىق كوللەدجدىڭ ناۋرىز مەرەكەسىنە ازىرلىگىن تەكسەردى. بۇل ورايدا بۇرناعى جىلدارداعىداي ەمەس, ەندى كوللەدجدەر مەن جوعارى وقۋ ورىندارى جەكە-جەكە جارىساتىن بوپتى.
اتالمىش كوللەدج ەلىمىزدە ءتىس تەحنيكتەرى مەن وپتيكتەرىن, ستوماتولوگتار مەن فارماتسەۆت-پروۆيزورلاردى دايارلايتىن بىردەن-ءبىر ورتا ارناۋلى وقۋ ورنى ەكەن. كوللەدج ديرەكتورى, مەديتسينا عىلىمىنىڭ كانديداتى ايگۇل جاناتقىزىنىڭ ايتۋىنشا, وقۋ ورنى كەلەشەكتە كەڭەيىپ, ۇلكەن وقۋ ورداسىنا اينالاتىن ءتۇرى بار.
ناۋرىز وتەتىن كوللەدجدىڭ اكت زالى قازاقتىڭ ۇلتتىق اتريبۋتتارىمەن بەزەندىرىلىپ, قابىرعالارىنا قازاقى ويۋ-ورنەكتى, ءتۇرلى-ءتۇستى كىلەمشەلەر, سىرماقتار, قاسقىردىڭ, تۇلكىنىڭ تەرىلەرى ءىلىنىپ, ادەمى دە ايشىقتى كوركەم جازۋلارمەن كومكەرىلگەن ەكەن. كوللەدجگە قوناق رەتىندە كەلگەن بەلگىلى اقىن, ءا.بوكەيحانوۆ اتىنداعى سىيلىقتىڭ لاۋرەاتى باقىتجان توباياقوۆ جاڭا جىلقى جىلىنا ارناعان جىرىنان شاشۋ شاشىپ, اق باتاسىن بەردى. تىلدەردى دامىتۋ باسقارماسىنىڭ ماماندارى ەرجان ەڭسەباەۆ پەن باعلان اسىلبەكوۆ قۇتتىقتاۋ ءسوز سويلەدى.
كوكتەم مەرەكەسىنىڭ كونتسەرتتىك باعدارلاماسى دا مازمۇندى ءوتتى. مۇندا اتا سالت-داستۇرىمىزگە بايلانىستى ءتۇرلى سكەتچتەر, ينتەرمەديالار قويىلىپ, كوللەدج شاكىرتتەرى اۋەلەتە ءان سالىپ, ناقىشىنا كەلتىرىپ بي بيلەدى. سونىمەن بىرگە وسىندا ەندى-ەندى قاز-قاز تۇرىپ, ءتاي-ءتاي باسار بوبەكتىڭ تۇساۋكەسەر ءراسىمى وتكىزىلدى. سوڭىرا ديرەكتوردىڭ ورىنباسارى بالتاباي يبراگيمبەكوۆ ش.ساريەۆتىڭ سوزىنە جازىلعان ك.دۇيسەكەەۆتىڭ «ويلان, بالام» اتتى ءانىن شابىتتانا ورىنداپ بەردى.
ساعي ورال
