كەشە تۇركيا استاناسى انكارا قالاسىندا اكىمشىلىك قالالاردىڭ دۇنيەجۇزىلىك فورۋمى ءوتتى. جيىن قورىتىندىسىندا نۇر-سۇلتان قالاسى 2021 جىلى اكىمشىلىك قالالاردىڭ دۇنيەجۇزىلىك قاۋىمداستىعىنا (WACA) توراعالىق ەتەتىنى جاريالاندى.
استانالىق دەلەگاتسيانى قالا اكىمىنىڭ ورىنباسارى باقتيار ماكەن باسقارىپ باردى.
بۇل جيىندا انكارا قالاسىندا اتقارىلعان ءىس-شارالاردىڭ قورىتىندىسى جاريالانىپ, شاھارلار اراسىنداعى ىنتىماقتاستىقتى ارتتىرۋ سەكىلدى تاقىرىپتار تالقىلاندى. سونىڭ ىشىندە مادەني-الەۋمەتتىك, ەكونوميكالىق جانە تاجىريبە الماسۋ ماسەلەلەرى قاراستىرىلدى.
بۇدان بولەك, انكارا مەرياسى قۇرامىنداعى جول قوزعالىسىن رەتتەيتىن ورتالىقتىڭ جۇمىسى تانىستىرىلدى. وندا قوعامدىق كولىكتەردىڭ, ولاردىڭ جۇرگىزۋشىلەرىنىڭ, باقىلاۋ كامەرالارىنىڭ جۇمىسى جۇرتشىلىق نازارىنا ۇسىنىلدى. انكارا مەرياسىنىڭ قۇرامىندا 360-تان استام ۆيدەوكامەرا قۇرىلعان.
ايتا كەتەيىك, ەڭ العاشقى WACA فورۋمى 2017 جىلى وڭتۇستىك كورەيادا, سەدجون قالاسىندا وتكەن بولاتىن. ونىڭ قاتىسۋشىلارى ءوزارا تاجىريبە مەن اكىمشىلىك قالالارعا كەلەتىن سىن-قاتەرلەردى تالقىلاعان.
سونىڭ ناتيجەسىندە WACA ىنتىماقتاستىقتى ودان ءارى دامىتۋ ءۇشىن تۇراقتى حالىقارالىق پلاتفورما قۇرۋ تۋرالى شەشىم قابىلدادى.
جاڭا استانالار مەن قۇرىلاتىن اكىمشىلىك قالالار عانا WACA-نىڭ رەسمي مۇشەلەرى بولا الادى. مۇنداي قالالاردى قۇرۋ مەن دامىتۋعا بايلانىستى ەلدەر, مەملەكەتتىك ورگاندار, ۇكىمەتتىك ەمەس ۇيىمدار مەن ماماندار ءاسسوتسياتيۆتى مۇشە بولا الادى.
نۇر-سۇلتاننىڭ بىرەگەي ۇلگىسىن جانە دامۋىن ەسكەرە وتىرىپ, انكارا قازاقستان استاناسىنا ۇيىم قۇرامىنا كىرۋدى جانە ودان ءارى كونگرەسس جۇمىسىنا تۇراقتى تۇردە قاتىسۋدى ۇسىندى.
ايان بەكجانۇلى
