قازاقستان پرەزيدەنتى قاتىسۋشىلارعا ارناعان سوزىندە ريو-دە-جانەيروداعى وليمپيادادا قازاقستان نامىسىن قورعايتىن سپورتشىلارعا ەلىمىزدىڭ ەرەكشە ءۇمىت ارتاتىنىن اتاپ ءوتتى.
– سەندەر سپورتتاعى ءبىزدىڭ وليمپيادالىق وتباسىمىزدىڭ تولىققاندى مۇشەسىسىڭدەر. قازاقستاندىقتار وليمپيادا نىساندارىنداعى تريبۋنالاردا جانە تەلەديدار الدىندا سەندەرگە قولداۋ كورسەتەتىنىن ۇمىتپاۋعا تيىسسىڭدەر. سەندەردىڭ قاتىسۋلارىڭ بارشا وتانداستارىمىزدى رۋحتاندىرادى جانە قۋانتادى. سوندىقتان سەندەردىڭ الداعى جەڭىستەرىڭدى ءبىز قازاقستان تاۋەلسىزدىگىنىڭ 25 جىلدىعىنا ارنالعان سىي رەتىندە كۇتەمىز. ءبىز تەبىرەنىس جانە شىنايى تولقىنىسپەن سەندەردىڭ جەڭىستەرىڭە سەنىپ, وليمپيادا اياقتالعان سوڭ جەڭىمپازداردى ەلدە ماقتانىشپەن جانە قۇرمەتپەن كۇتەتىن بولامىز, – دەدى قازاقستان پرەزيدەنتى.
مەملەكەت باسشىسى قازىرگى كەزدە رەسپۋبليكامىز تاۋەلسىزدىك تاريحىنداعى ەڭ مىقتى سپورتتىق الەۋەتكە يە ەكەنىنە توقتالىپ ءوتتى.
– وليمپيادا الدىنداعى رەسمي ويىنداردىڭ قورىتىندىلارى ازيا جانە الەم چەمپيوناتتارىندا سۇبەلى ناتيجەلەر كورسەتىپ جۇرگەن قازاقستاندىقتاردىڭ جاڭا ساڭلاق بۋىنىن تاربيەلەپ شىعارا العانىمىزدى بايقاتتى. جالپى, قازاقستان ۇلتتىق قۇراماسى ريو-دە-جانەيروداعى 2016 جىلعى وليمپيادانىڭ باستالۋىنا دايىن بولدى. بۇگىندە ءبىزدىڭ سپورتشىلار 38 وليمپيادالىق سپورت ءتۇرىنىڭ 26-سى بويىنشا 100-دەن استام ليتسەنزيا ۇتىپ الدى. مۇنىڭ ءوزى جاقسى جەتىستىك, – دەدى نۇرسۇلتان نازارباەۆ.
ەلباسى ەلىمىزدە ءاردايىم سپورتقا ەرەكشە ءمان بەرىلىپ كەلە جاتقانىنا نازار اۋداردى.
– سوڭعى ءۇش جىلدىڭ وزىندە وليمپيادالىق رەزەرۆتى كەشەندى تۇردە دايىنداۋ ءۇشىن حالىقارالىق دەڭگەيدەگى سپورت نىساندارى سالىندى. ولار – ايبا دۇنيەجۇزىلىك بوكس اكادەمياسى, الماتىدا دزيۋدو اكادەمياسى, تارازدا «تاراز-ارەنا» ستاديونى. سونىمەن قاتار قاراعاندىدا «قاراعاندى-ارەنا» مۇز سارايى مەن استانادا ءجۇزۋ كەشەنى بار كوپ فۋنكتسيونالدى مۇز سارايى ىسكە قوسىلدى. بۇدان بولەك بولاشاق وليمپياداشىلاردى وسكەمەندەگى ولگا رىپاكوۆا اتىنداعى جەڭىل اتلەتيكا ورتالىعى مەن الماتىداعى الەكساندر ۆينوكۋروۆ اتىنداعى سپورت سارايى دايارلاۋدا, – دەدى ەلباسى.
نۇرسۇلتان نازارباەۆ پاراليمپيادا قوزعالىسىنىڭ دامۋىنا دا مەملەكەتتىڭ جۇيەلى قولداۋ كورسەتە وتىرىپ, سپورتپەن شۇعىلدانۋعا نيەتتى بارشا ازاماتتار ءۇشىن جاعداي تۋعىزىپ وتىرعانىن ايتتى.
بۇدان بولەك, قازاقستان پرەزيدەنتى ءۇش جىل بويى «قازسپورت» ءبىرىنشى سپورت تەلەارناسى تابىستى جۇمىس ىستەپ كەلە جاتقانىن اتاپ ءوتتى.
– ەفيردىڭ جارتىسىنان كوبىن قازاقستاندىق سپورتشىلاردىڭ قاتىسۋىمەن ءوتىپ جاتقان حالىقارالىق جانە ۇلتتىق جارىستاردىڭ كورسەتىلىمى قۇرايدى. تەلەارنا رەيتينگىسىنىڭ جوعارىلىعى ونىڭ قازاقستاندىقتار اراسىنداعى زور تانىمالدىلىعىن كورسەتەدى. سپورتپەن شۇعىلدانۋ ارقىلى جەڭىسكە ۇمتىلىس, كۇش-قايرات, العا قويعان ماقساتقا جەتۋگە تالپىنىس سياقتى ماڭىزدى قاسيەتتەر جەتىلەدى. سپورت دەگەنىمىز – دەنساۋلىق, رۋحتىڭ كۇشتىلىگى, وتانسۇيگىشتىك. مەن جاستارىمىزدى دەنە شىنىقتىرۋمەن جانە سپورتپەن كوبىرەك شۇعىلدانۋعا شاقىرامىن, – دەدى مەملەكەت باسشىسى.
نۇرسۇلتان نازارباەۆ تاۋەلسىزدىك جىلدارىندا ەڭ ايتۋلى حالىقارالىق جارىستاردا ءوز ەلىنىڭ تۋىن ماقتانىشپەن الىپ جۇرگەن دارىندى سپورتشىلار شوعىرى تاربيەلەنگەنىن اتاپ ءوتتى.
– تاۋەلسىز قازاقستاننىڭ 25 جىلدىق سپورت تاريحىنا وليمپيادا ويىندارىنىڭ 17 چەمپيونىنىڭ ەسىمى التىن ارىپتەرمەن جازىلدى. ءبىز ازاماتتارىمىزدى پاتريوتتىققا, سالاماتتى ءومىر سالتىنا تاربيەلەۋدە وليمپياداشىلارىمىزدىڭ ەڭبەگى قانشالىقتى زور ەكەنىن بىلەمىز. بۇگىندە سىزدەردىڭ الدارىڭىزدا وزدەرىڭىزدىڭ سپورتتىق ناتيجەلەرىڭىز ارقىلى بۇكىل الەمگە قازاقستان سپورتىنىڭ الەۋەتىن تاعى دا دالەلدەۋ مىندەتى تۇر. سىزدەر جالپىكوماندالىق ەسەپتە بارىنشا جوعارى ورىن يەلەنۋ ءۇشىن ۇمتىلۋعا تيىسسىزدەر. سىزدەرگە وليمپيادالىق جارىسقا ساپالى دايىندالۋ ءۇشىن قاجەتتى بارلىق جاعداي جاسالدى, – دەدى قازاقستان پرەزيدەنتى.
مەملەكەت باسشىسى قازاقستاننىڭ وليمپيادالىق قۇراماسى مۇشەلەرىن بار كۇش-جىگەرلەرىن جۇمساۋعا, بيىك ناتيجە مەن سپورتتىق باسەكەگە ۇمتىلۋعا شاقىردى.
قازاقستاننىڭ سپورت دەلەگاتسياسى وكىلدەرى ءوز سوزدەرىندە دەنە شىنىقتىرۋ مەن سپورتتى دامىتۋ ماسەلەلەرىنە مەملەكەت ۇدايى نازار اۋدارىپ كەلە جاتقانىن ايتا كەلىپ, نۇرسۇلتان نازارباەۆقا اق تىلەگى مەن قولداۋى ءۇشىن العىستارىن ايتتى.
كەزدەسۋ سوڭىندا قازاقستان پرەزيدەنتى وليمپيادالىق قۇرامانىڭ تۋ ۇستاۋشىسى ر.جاپاروۆقا مەملەكەتتىك تۋدى تاپسىردى.
akorda.kz
