جەرگىلىكتى پوليتسيا مەن ىشكى ىستەر دەپارتامەنتى بىرىكتىرىلىپ, پوليتسيا دەپارتامەنتى قۇرىلاتىن بولادى. بۇل تۋرالى ماجىلىستە «قر كەيبىر زاڭنامالىق اكتىلەرىنە ىشكى ىستەر ورگاندارىنىڭ قىزمەتىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان ىشكى ىستەر ءمينيسترىنىڭ ورىنباسارى ەرلان تۇرعىمباەۆ ءمالىم ەتتى.
ونىڭ ايتۋىنشا, جاڭادان قۇرىلاتىن پوليتسيا دەپارتامەنتىنىڭ باستىعىن ىشكى ىستەر ءمينيسترىنىڭ ۇسىنىسىمەن اكىمدەر تاعايىندايدى جانە جۇمىستان بوساتادى. ول پرەزيدەنتتىك كادرلىق رەزەرۆتە تۇرعان كاسىبي مامانداردان ىرىكتىلەدى.
«بۇعان دەيىن جەرگىلىكتى پوليتسيا باسشىسىن اكىمدەر, ىشكى ىستەر دەپارتامەنتىنىڭ باسشىسىن ىشكى ىستەر مينيسترى تاعايىندايتىن. الايدا بۇل باسشىلاردىڭ (ناقتىراق ايتساق, وبلىس پەن اۋدان باسشىلارىنىڭ) اراسىندا قاراما-قايشىلىقتار ورىن الدى. سول سەبەپتەن زاڭعا وزگەرىس ەنگىزدىك. جەرگىلىكتى پوليتسيا بولەك قۇرىلىم رەتىندە ءىىد-ءنىڭ قاراۋىنا وتەدى. پوليتسيا دەپارتامەنتىنىڭ باستىعى جىلىنا ءبىر رەت حالىق الدىندا ەسەپ بەرەتىن بولادى» دەپ ءتۇسىندىردى ە.تۇرعىمباەۆ. زاڭ جوباسىنداعى تاعى ءبىر تۇزەتۋ پوليتسەيلەردىڭ تۇرعىن جايىن جەكەشەلەندىرۋىنە قاتىستى بولماق. ياعني, پوليتسيادا تاباندىلىقپەن 20 جىل, ال كەيبىر جاعدايلاردا 10 جىل جۇمىس ىستەگەن قىزمەتكەرلەر باسپاناسىن تەگىن جەكەشەلەندىرە الادى.
تولەن تىلەۋباي
