جاراتۋشىنىڭ ادام بالاسىنا بەرگەن باعا جەتپەس, قايتا ورالماس قۇندىلىقتارىنىڭ ءبىرى – ۋاقىت. ول تۋرالى جازۋشى ءابىش كەكىلباەۆتىڭ «ۋاقىتتىڭ جالعىز ولشەمى, ول – ادام عۇمىرى» دەگەن ويلى ءسوزى بار. شىنىندا دا, ادامزات ءومىرى – «وتكەن مەن بولاشاقتىڭ اراسىنداعى قاس-قاعىم ءسات قانا».
ۋاقىتتى ءار ادام دەنساۋلىعىنا, كوڭىل-كۇيىنە بايلانىستى ءارتۇرلى قابىلدايدى. اسىرەسە, جاسى ۇلعايعان جاندار ءۇشىن ول زىمىراپ بارا جاتقانداي كورىنەدى. بوس ۋاقىت پەن دەنساۋلىقتىڭ قادىرىن تۇسىنبەي, وتە سامارقاۋ قارايتىندار دا جەتكىلىكتى.
بۇگىندە «كوك ساندىعى» جوق ءۇيدى ەلەستەتۋ مۇمكىن ەمەس. الايدا, ونىڭ ۋاقىتقا ناعىز «جاۋ» ەكەنىنە ەكىنىڭ ءبىرى كوڭىل بولە بەرمەيدى. ودان كەيىنگى رەتتە كوپ ءسوز بەن ءجيى قىدىرىس تۇر. بىلە-بىلسەڭىز, ۋاقىت – مۇمكىندىك. ونى دەر شاعىندا پايدالانىپ قالماعان ادامنىڭ كەيىننەن «قولىن مەزگىلىنەن كەش سەرمەسى» انىق. ال, ءبىز وزىمىزدىكى بىلاي تۇرسىن, باسقالاردىڭ دا ۋاقىتىمەن ساناسا بەرمەيمىز. مىسالى, شاقىرىلعان جەرگە 2-3 ساعات كەشىگىپ كەلەمىز, ءبىر ساتتىك شارۋانى ءبىراز كۇننىڭ ىشىندە بىتەدى دەپ جوبالاي سالامىز. اسىرەسە, جاستارىمىز ۋاقىتىن ۇنەمدەمەسە, كارىلىكتىڭ قۇرساۋىنا تۇك تىندىرماستان تۇسە قالاتىنىن بىلە جۇرسە ەكەن.
گۇلزات سەرىكباەۆا
