«قايىرىمدىلىق كەرۋەنى» جول تارتتى

«قايىرىمدىلىق كەرۋەنى» IV رەسپۋبليكالىق بايقاۋىنا وتىنىمدەر قابىلداۋ باستالدى. 4 جىل بۇرىن قازاقستاننىڭ ىسكەر ايەل­دەر قاۋىمداستىعىنىڭ باستاماسىمەن قولعا الىنعان جوبا بۇگىندە قازاق ەلىنە كەڭ تانىلىپ, 1000-نان استام ۆولونتەردى قامتىعان. بيىلعى بايقاۋ ەل تاۋەلسىزدىگىنىڭ 30 جىلدىعىنا ورايلاستىرىلدى.
بىلتىرعى «قايىرىمدىلىق كە­رۋەنى» بايقاۋىندا 670 قاتىسۋشى باق سىناپ, قوعامدى ىزگىلەندىرۋگە ۇلەس قوسقان ۇزدىكتەر ماراپاتتالدى. «بيىل بايقاۋعا قاتىسۋشىلار سانى بۇدان ەكى-ءۇش ەسە ارتىق بولادى دەگەن سەنىمدەمىز. بايقاۋدىڭ ماقساتى – وتانداستارىمىزدىڭ ىزگى باستامالارىن كوپشىلىككە كەڭ ناسيحاتتاپ, قوعامدى قايىرىمدى ءىس اتقارۋعا ۇندەۋ» دەيدى نۇر-سۇلتان قالاسى بويىنشا ىسكەر ايەلدەر قاۋىمداستىعىنىڭ جەتەكشىسى ءسانيا يرساليەۆا. بايقاۋ جەڭىمپازدارى 7 نوميناتسيا بويىنشا انىقتالادى. قازاق حالقىنىڭ سالت-داستۇرلەرىنە نەگىزدەلگەن قايىرىمدىلىق بويىنشا «اسار», تۋعان ولكەگە كومەك كورسەتۋ ماقساتىندا يگى ءىس اتقارعان ازاماتتار اراسىندا «تۋعان جەر» نوميناتسياسى تاعايىندالدى. وزگەنى قۇتقارىپ, ءوز باسىن قاتەرگە تىككەن ماماندار مەن قاراپايىم تۇرعىندار اراسىندا «باتىل جۇرەك», تۇراقتى اقىسىز كومەك كورسەتكەن ۆولونتەرلەر اراسىندا «مەيىرىم جولىندا» نوميناتسيالارى بويىنشا ۇزدىكتەر انىقتالادى. باق-تا قايىرىمدىلىق تاقىرىبىن ناسيحاتتاعان جۋرناليستەر «قايىرىمدىلىق تاريحى» اتالىمى بويىنشا باق سىنايدى. باتىلدىعىمەن, مەيىربان باستاماشىلدىعىمەن تانىلعان التىدان ون سەگىز جاسقا دەيىنگى جەتكىنشەكتەر اراسىندا «بالا جۇرەگى», جان-جانۋارلارعا قامقورلىق تانىتقان ۆولونتەرلەر اراسىندا «جانۋارعا مەيىرىم» نوميناتسياسى جاريالاندى.
بايقاۋعا ءوتىنىم قابىلداۋ 30 قاراشاعا دەيىن جالعاسادى. جەڭىمپازدار كەلەر جىلدىڭ اقپانىندا تۇركىستان قالاسىندا ماراپاتتالادى دەپ جوسپارلانعان. جوباعا نۇرسۇلتان نازارباەۆ قورى قولداۋ كورسەتىپ وتىر.