قاڭعىباستار قارا سۋىقتا قالمايدى
اۋا رايىنىڭ كۇرت سۋىپ, تەمپەراتۋرانىڭ تومەندەۋىنە بايلانىستى استانا قالاسىندا كريمينوگەندى وقيعالاردىڭ الدىن الۋ جانە بەلگىلى تۇراعى جوق جانداردىڭ جاۋراپ, اياق-قولدارىن ۇسىككە شالدىرماۋى ماقساتىندا 1 جەلتوقساننان باستاپ الەۋمەتتىك بەيىمدەلۋ ورتالىعىندا جىلجىمالى تاماقتانۋ پۋنكتى قىزمەتى اشىلادى.
بىلتىرعى رەسمي مالىمەتتەرگە سۇيەنسەك, باسپاناسى جوق قاڭعىباستاردىڭ ۇسىكتەن مۇگەدەك قاتارىنا قوسىلىپ, قازاعا ۇشىراعاندارى از بولماعان. وسىعان وراي, قالالىق ءماسليحات سەسسياسىنىڭ وتىرىسىندا جىلجىمالى تاماقتانۋ, جىلىتۋ پۋنكتى ماسەلەسى كوتەرىلىپ وڭ شەشىمىن تاپتى. جىلجىمالى تاماقتانۋ پۋنكتى قىس مەزگىلىنىڭ العاشقى كۇنىنەن باستاپ ىسكە كىرىسەدى. پۋنكت ارنايى كولىكتەرمەن قالاداعى بەلگىلى تۇراعى جوق ادامداردىڭ كوپ جينالاتىن ورىندارىنا بارىپ قىزمەت كورسەتپەك.
ءۇي-كۇيسىز جۇرگەن ادامدار ەلورداداعى الەۋمەتتىك بەيىمدەۋ ورتالىعىنا كەلۋىن-كەلگەنمەن, تارتىبىنە كوندىكپەي ءجيى كەتىپ قالادى. ورتالىق باسشىلىعى ولاردى ەركىنەن تىس ۇستاي المايدى. قازىرگى تاڭدا قالانىڭ بارلىق ءتيىستى مەكەمەلەرى ءبىر-بىرىمەن تىعىز قارىم-قاتىناستا. ورتالىقتىڭ ديسپەتچەرلىك قىزمەتى كۇن سايىن بارلىق تىرەك پۋنكتتەرىنە قوڭىراۋ شالىپ, الەۋمەتتىك پاترۋل جەدەل قىزمەتىنىڭ رەيدكە شىعۋ جۇمىسىن ۇيىمداستىرادى. رەيد ارقىلى الەۋمەتتىك كومەكتى قاجەتسىنەتىن ادامدار ورتالىققا جەتكىزىلەدى. ورتالىقتا بارلىق جاعداي جاسالعان. ءۇش مەزگىل تاماق, تازا توسەك-ورىن بەرىلەدى, العاشقى دارىگەرلىك كومەك كورسەتىلەدى. كورىنگەن جەردە تۇنەپ جۇرگەندىكتەن, ونداي جانداردا ءتۇرلى اۋرۋلار, ينفەكتسيالار (اشىق تۇردەگى تۋبەركۋلەز, جيتس, اسا قاۋىپتى تەرى اۋرۋلارى) تاراتۋى مۇمكىن. سوندىقتان, ورتالىققا جەتكىزىلىسىمەن مەديتسينالىق تەكسەرۋدەن وتكەنشە, وقشاۋلاۋ بولمەسىنە ورنالاستىرىلادى. ەگەر جۇقپالى اۋرۋلاردىڭ ءبىرى تابىلسا, دەرەۋ مەديتسينالىق-سانيتاريالىق مەكەمەگە جىبەرىلەدى.
ايتا كەتەرلىگى, ورتالىقتا تۇنگى اۋىسىم دا جۇمىس ىستەيدى. مۇندا بەلگىلى تۇراعى جوق ادامداردىڭ تۇنەپ, جۋىنىپ, قىرىنىپ, تازالانىپ الۋلارىنا مۇمكىندىك بار.
الەۋمەتتىك بەيىمدەلۋ ورتالىعى 180 ورىنعا ەسەپتەلگەن. قىستا قىزمەت الۋشىلاردىڭ سانى 250-گە بارادى. ال ىشكى ىستەر باسقارماسىنىڭ مالىمەتىنە قاراعاندا, قالادا ءۇيسىز-كۇيسىز جانداردىڭ سانى قۇبىلمالى, شامامەن 1000-1300-ءدىڭ توڭىرەگىندە.
الەۋمەتتىك بەيىمدەۋ ورتالىعىنىڭ قىزمەتىن پايدالانۋشىلاردى ءۇش تيپكە بولۋگە بولادى: ءبىرىنشىسى, ءومىردىڭ قيىنشىلىعىنان قاجىعاندار, ەكىنشىسى, ءالى دە ومىردەن ءۇمىت ۇزبەگەندەر, ولارعا ەڭبەك تەراپياسى ارقىلى كومەك كورسەتىلەدى. ال سوڭعىسى, مۇلدە ويسىز, ماقساتسىز, بارىنەن كۇدەر ۇزگەندەر.
الەۋمەتتىك بەيىمدەۋ ورتالىعى ديسپەتچەرلىك ءبولىمىنىڭ بايلانىس تەلەفونى: 53-18-24.
مۇرات كاريەۆ,
الەۋمەتتىك بەيىمدەۋ ورتالىعىنىڭ ديرەكتورى