كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىنە قاتىسىپ, ءوڭىردىڭ الەۋمەتتىك-ەكونوميكالىق دامۋ كورسەتكىشتەرىن بايانداعان قاراعاندى وبلىسىنىڭ اكىمى باۋىرجان ابدىشەۆ مەملەكەت باسشىسى نۇرسۇلتان نازارباەۆتىڭ ۇكىمەتتىڭ كەڭەيتىلگەن وتىرىسىنداعى سىن-ەسكەرتپەلەرىنە بايلانىستى قولعا الىنعان شارالارعا توقتالدى.
بيىل قاراعاندى وبلىسىنىڭ بيۋدجەتى 224 ملرد تەڭگەنى قۇرادى. ونىڭ 55 پايىزى – رەسپۋبليكالىق بيۋدجەتتەن تۇسكەن سۋبۆەنتسيالار, نەسيەلەر مەن ترانسفەرتتەر. 119,5 ملرد تەڭگە الەۋمەتتىك سالاعا, سونىڭ ىشىندە ءبىلىم بەرۋگە 62,4 ملرد تەڭگە, دەنساۋلىق ساقتاۋعا 33,7 ملرد تەڭگە بولىنگەن.
وبلىستا ىسكە اسىرىلىپ جاتقان ءىرى جوبالاردىڭ اراسىندا جەزقازعان – سەكسەۋىل, ارقالىق – شۇباركول تەمىر جولدارى قۇرىلىسىنىڭ ماڭىزى وتە زور. قۇرىلىس اياقتالعاننان كەيىن 4 مىڭعا جۋىق ادام تۇراقتى جۇمىسپەن قامتىلادى, جۇك تاسىمالداۋ كولەمى ارتادى, ەلىمىزدىڭ باتىسىنا جولاۋشىلاردىڭ جەتۋ ۋاقىتى قىسقارادى. سونداي-اق, قازىردە استانا – تەمىرتاۋ كۇرە جولىنىڭ قۇرىلىسى جۇرۋدە. قاراعاندى وبلىسى ارقىلى بۇل جولدىڭ 93 شاقىرىمى وتەدى. جولدىڭ ماڭىزىنا توقتالعان باۋىرجان تۇيتەۇلى, ەڭ الدىمەن, ول قاراعاندى وبلىسىن ەلوردامەن جاقىنداتا ءتۇسىپ, ەكى قالا اراسىنداعى الىس-بەرىس, بارىس-كەلىستىڭ دامۋىنا سەپتىگىن تيگىزەتىنىن اتاپ ءوتتى. سونىمەن بىرگە, 2016 جىلى تاقتايداي تەگىس جول پايدالانۋعا بەرىلگەندە جول اپاتتارىنىڭ سانى دا ازايۋ تيىستىگىن ايتتى.
ۇكىمەتتىڭ كەڭەيتىلگەن وتىرىسىندا ەلباسى قاراعاندىداعى «فەرمەر» ۇشاعىن قۇراستىرۋ زاۋىتىنان بىردە-ءبىر ۇشاق قۇراستىرىلماعانىن ايتقان بولاتىن. ول تۋرالى بريفينگتە باۋىرجان ابدىشەۆ: «جوبانى ىسكە اسىرۋ بارىسىندا ارىپتەستەر اراسىندا كەلىسىمشارتتىق مىندەتتەمەلەر بۇزىلعان. كاسىپورىن قاجەتتى تەحنيكالىق قۇجاتتامانى الماعان. ءبىز قازىر «كازاۆياسپەكتر» جشس-مەن بىرلەسىپ, زاۋىتتى ىسكە قوسۋدىڭ جولدارىن ىزدەپ وتىرمىز. بىرىنشىدەن, كەلىسىمشارتتىق مىندەتتەمەلەر ورىندالاتىنىنا ءۇمىتىمىز بار. سەرىكتەستەرمەن كەزدەسۋلەر ۇيىمداستىرۋدى قولعا الدىق. سونداي-اق, «قازاقستان ينجينيرينگ» ۇلتتىق كومپانياسى» اق-مەن بۇل زاۋىتتىڭ بازاسىندا پيلوتسىز ۇشاقتى قۇراستىرۋ ماسەلەلەرىن تالقىلاپ وتىرمىز. وسى تەكتەس كەلىسسوزدەر امەريكالىق, رەسەيلىك, سلوۆەنيالىق كومپانيالارىمەن دە جۇرۋدە. زاۋىتتىڭ جۇمىسىنا قاتىستى قىلمىستىق ءىس قوزعالعان. ونىڭ قورىتىندىلارىمەن قۇزىرلى ورگاندار بىزدەردى تانىستىرادى دەپ ويلايمىن» دەدى.
«بيزنەستىڭ جول كارتاسى – 2020» باعدارلاماسىنىڭ اتقارىلۋىنا قاتىستى سىنعا ب. ابدىشەۆ بۇل باعدارلاما بويىنشا وبلىسقا 10 ملن تەڭگە بولىنگەنىن, وسى قارجىعا ءۇش جوبا ىسكە اساتىنىن جەتكىزدى.
امانعالي قالجانوۆ