استانالىق ءماسليحاتتىڭ كەزەكتى تۇراقتى كوميسسيا وتىرىسىندا قۇرىلىس, ەكولوگيا, كولىك جانە تۇرعىن ءۇي كوممۋنالدىق شارۋاشىلىق ماسەلەلەرى جونىندەگى 2017-2019 جىلدارعا ارنالعان بيۋدجەتتىڭ جوباسى تالقىلاندى. نەگىزگى باياندامانى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ءالىبي جۇماەۆ جاسادى.
بايانداماشى الداعى ءۇش جىلعا ارنالعان بيۋدجەت جوباسى قازاقستان رەسپۋبليكاسىنىڭ بيۋدجەت كودەكسىنە, جەرگىلىكتى بيۋدجەتتەردى ازىرلەۋ ەرەجەسىنە سايكەس ازىرلەنىپ, دايىندالعاندىعىن جەتكىزدى. ودان كەيىن باسقارما باسشىسى ەلوردانىڭ توعىز ايلىق الەۋمەتتىك-ەكونوميكالىق كورسەتكىشتەرى تۋرالى ءسوز قوزعادى. سوڭعى توعىز ايدا قالانىڭ ەكونوميكالىق قۋاتى ەسەلەنە تۇسكەن. سالىق تۇسىمدەرى دە جوعارىلاعان. سودان سوڭ باسقارما باسشىسى جيىندا وزەكتى بولىپ وتىرعان باستى تاقىرىپقا كوشتى. الداعى ءۇش جىلدىق بيۋدجەتتىڭ بارىسىنا توقتالدى. ماسەلەن, قالالىق كوممۋنالدىق شارۋاشىلىق باسقارماسىنىڭ شىعىستارىنا ءۇش جىلعا – 35 004,7 ملن تەڭگە, ونىڭ ىشىندە جەرگىلىكتى بيۋدجەتتەن – 21 294,5 ملن تەڭگە جانە رەسپۋبليكالىق بيۋدجەتتەن 13 710,2 ملن تەڭگە قارالعان. سول سەكىلدى ەنەرگەتيكا, ساۋلەت-قۇرىلىس جانە اۋىل شارۋاشىلىعى باسقارمالارىنا ءۇش جىلعا ءبولىنىپ وتىرعان قارجى كولەمى ايتىلدى.
سونىمەن بىرگە, وتىرىستا استانانىڭ شەت جاعىندا سالىنعان كوپ قاباتتى تۇرعىن ۇيلەردىڭ ورتالىق جىلۋعا قوسىلماعاندىعى ءسوز بولدى. ولاردىڭ دەنى «اۆتونومدى جىلىتۋ» جۇيەسىن پايدالانادى. دەگەنمەن, اتالعان اۆتونومدى جۇيەنىڭ كوممۋنالدىق اقىسى قىمبات ەكەندىگى ايان.
ەلورداعا «تابيعي گازدىڭ» قاجەتتىلىگى جايىندا پىكىر ايتىلدى. ويتكەنى كۇن سۋىعاننان بەرى جەكە ۇيلەردەن شىققان تۇتىندەردىڭ قالا ەكولوگياسىنا تيگىزىپ وتىرعان زاردابى كوپ. ول تۋرالى جاۋاپتى تۇلعالار ازىرشە باس قالاعا «تابيعي گازدىڭ» قاشان كەلۋى بەلگىسىز, بىراق تا وسى باعىتتا جاڭا جوبالار قولعا الىنىپ جاتقاندىعىن باياندادى.
ازامات ەسەنجول
