قاسيەتتى تۇندەگى امالدار
قادىر ءتۇنى – ەڭ جاقسى ءتۇن! اللا تاعالا ونى بەرەكەلى ەتتى, ياعني, قۇراندى ءتۇسىرىپ, باسقا تۇندەردەن ەرەكشەلەدى. وسى رەتتە يسلام عۇلامالارى قاسيەتتى قادىر تۇنىندە مىنا امالداردى جاساعان ابزال دەيدى.
ءبىرىنشى, بۇل ءتۇنى اللانىڭ ريزاشىلىعى ءۇشىن عيبادات جاساپ, ناماز وقىپ, قۇلشىلىعىمىزدى ارتتىرۋ كەرەك.
ەكىنشى, قۇران كارىم وقىلىپ, تىڭدالىپ, ونى تۇسىنۋگە ىنتا قويعان ابزال.
ءۇشىنشى, پايعامبارىمىزعا (س.ا.ۋ.) سالاۋات ايتىپ, ونىڭ شاپاعات ەتۋىنەن ۇمىتتەنىپ, ونىڭ ۇمبەتىنەن بولعانىمىزدى سانالى تۇردە سەزىنىپ, جولىن بەرىك ۇستانۋىمىز شارت.
ءتورتىنشى, ۋاعىز-ناسيحات تىڭداپ, سۇحباتتار قۇرىپ, كۇندەلىكتى كۇيبەڭ تىرشىلىك بارىسىندا جۇرەككە تۇسكەن كىربىڭدى جۋىپ-شايىپ, كوڭىلگە ۇيالاعان كومەسكىلىكتەن ارىلۋعا ءتيىسپىز.
بەسىنشى, قادىر تۇنىنە قاتىستى جەتكىلىكتى ماعلۇمات بەرەتىن ءدىن ادامدارىمەن سۇحبات قۇرۋ كەرەك. اسىرەسە, ادام ءوز-وزىمەن سۇحباتتاسىپ, قاتەلىكتەرىن تانىپ, كەمشىلىكتەرىن جويۋعا كۇش سالىپ, دوستىق قارىم-قاتىناسىن كۇشەيتۋگە, بىرلىك پەن تۇتاستىقتى ارتتىرۋعا ءمان بەرۋى ءتيىس.
التىنشى, تاۋبە مەن يستيعفار جاساپ, ءوز ءناپسىسىن ەسەپتەن وتكىزىپ, قاتەلىك جاساۋدان ساقتانىپ, قايىرلى ىستەردى جاساۋعا قۇمبىل بولۋى شارت.
جەتىنشى, اللانى تەرەڭ ەسكە العاننان جۇرەك تىنىشتالادى. ۇلى جاراتۋشىنىڭ ۇشى-قيىرى جوق قۇدىرەتىمەن جوقتان بار بولعان جاراتىلىستىڭ سىرلارىن ءتۇسىنىپ, يمانىمىزدى كۇشەيتۋ قاجەت.
سەگىزىنشى, ءجيى-ءجيى دۇعا جاساعان ءجون. ويتكەنى, دۇعا – ادامدى ۇلى جاراتۋشىعا جاقىنداتاتىن ءدانەكەر. پايعامبارىمىز (س.ا.ۋ.) بۇل ءتۇنى كوبىنە مىنا دۇعانى جاساعان:
«اللاھۇممە يننەكە ءافۇۆۆين ءتۇھيببۇل افۆە فا ءفۇانني». ياعني, «اللا سەن كەشىرىمدىسىڭ, كەشىرۋدى سۇيەسىڭ, مەنى كەشىرە گور».
توعىزىنشى, قادىر ءتۇنىنىڭ كۇندىزىن دە بەينە كەش سەكىلدى وتكىزۋ ءلازىم. وسىلاي بولعان بولسا, مۇباراك ءتۇننىڭ رۋحتارعا توككەن شۇعىلاسى ءسىڭىمدى بولىپ, جۇرەكتىڭ قاق تورىنەن ورىن الارى ءسوزسىز.
ونىنشى, قادىر ءتۇنىنىڭ قۇرمەتىنە راببىمىزدان بۇكىل ءيسى ءبۇتىن مۇسىلمانداردىڭ كۇنالارىنىڭ كەشىرىلۋىن تىلەۋىمىز كەرەك. قادىر ءتۇنىنىڭ جاقسىلىققا مۇرىندىق بولۋىن, دوستىق پەن باۋىرمالدىقتى ارتتىرىپ, يسلام الەمىنىڭ ءبىر تۇتاستىعىن جانە كۇللى ادامزاتتى اپاتتاردان ساقتا دەپ تىلەۋىمىز شارت.
گۇلميرا شارحانقىزى