گازەتىمىزدىڭ ءداستۇرلى «وقىرماننان – ون سۇراق» ايدارىنىڭ بۇل جولعى قوناعى استانادا ءوتىپ جاتقان الەم چەمپيوناتىندا التىن مەدال جەڭىپ العان دزيۋدوشى ەلدوس سمەتوۆ بولدى.
ەلدوس سمەتوۆ – 1992 جىلى تۋعان, دزيۋدوشى, حالىقارالىق دارەجەدەگى سپورت شەبەرى, قازاقستاننىڭ بىرنەشە دۇركىن چەمپيونى, جاستار اراسىنداعى الەم چەمپيونى (2010), حالىقارالىق گران-پري تۋرنيرلەرىنىڭ ەكى دۇركىن جەڭىمپازى, ازيا ويىندارىنىڭ جەڭىمپازى (2014), الەم چەمپيونى (2015).
– ەلدوس اعا, الەم چەمپيونى بولعانىڭىز قۇتتى بولسىن! ءسىز كۇرەستى قاشان جانە قايدا باستادىڭىز؟ مەنىڭ دە دزيۋدوشى بولعىم كەلەدى…
دانيار وماروۆ, مەكتەپ وقۋشىسى, استانا قالاسى.
– تالابىڭا نۇر جاۋسىن! مەن كۇرەس زالىنا بەس جاسىمدا كەلدىم. تاراز قالاسىنداعى بالالار مەن جاسوسپىرىمدەر سپورت مەكتەبىندە احمەت جۇماعۇلوۆ دەگەن باپكەردەن دزيۋدونىڭ قىر-سىرىن ۇيرەنۋدى باستاعان ەدىم.
– الەم چەمپيونى بولعانىڭدى تەلەديداردان كوردىم. ءوز ەلىمىزدە ءبىرىنشى رەت ءوتىپ وتىرعان الەم چەمپيوناتىندا ءبىرىنشى بولىپ تاتاميگە شىعىپ, بىردەن جەڭىمپاز اتانعانىڭ قانداي ابىروي بولدى؟! سۇراعىم – ءبىزدىڭ ەلىمىزدە دزيۋدو كۇرەسى قانشالىقتى دامىپ وتىر دەپ ويلايسىڭ؟
بەيبىت مولدياروۆ, ششۋچينسك قالاسى.
– سۇراعىڭىز اۋىرلاۋ ەكەن, مەن قاراپايىم سپورتشىمىن عوي, سوندا دا جاۋاپ بەرەيىن. دزيۋدو كۇرەسى ەلىمىزدە سوڭعى جىلدارى وتە جاقسى قارقىن الا باستادى. رەسمي جارىستاردىڭ كورسەتكىشتەرىمەن باعالاساق, وسىعان دەيىن الەم بىرىنشىلىكتەرىندە ءبىر عانا التىن, ەكى كۇمىس مەدال, ءۇش قولا مەدال عانا ەنشىلەگەن ەكەنبىز. بۇل از با, كوپ پە, بىلمەيمىن… وليمپيادا ويىندارىنان تەك اسحات جيتكەەۆتىڭ جالعىز كۇمىسى بار. ال ازيا جارىستارىندا تابىستارىمىز بارشىلىق. ەندى, مىنە, وسى ءوتىپ جاتقان الەم چەمپيوناتىنان ءبىر التىن, ءبىر كۇمىس مەدال الىپ وتىرمىز. ءالى دە بىرنەشە جۇلدە الساق دەپ ۇمىتتەنىپ ءجۇرمىز. قۇدايعا شۇكىر, ەل نامىسىن قورعاۋعا كەلگەندە ايانبايتىن قىز-جىگىتتەرىمىز بار. جالپى, ءبىزدىڭ ەلىمىزدە دزيۋدوعا قازىر جاقسى كوزقاراس قالىپتاسىپ وتىر. بۇل رەتتە الدىمەن مادەنيەت جانە سپورت مينيسترلىگى, سپورتتىق جەكپە-جەكتەر مەن كۇش قولدانىلاتىن سپورت تۇرلەرى كونفەدەراتسياسى, رەسپۋبليكالىق دزيۋدو فەدەراتسيالارى سپورتشىلار ءۇشىن, سونداي-اق, سپورتتىق ينفراقۇرىلىمداردى دامىتۋ بويىنشا جۇيەلى جۇمىستار جۇرگىزۋدە. دەمەۋشىلىك كورسەتەتىن «سامۇرىق-قازىنا» قورى مەن «قازمۇنايگاز» كومپانيالارىنا دا العىس ايتامىز.
– ەلدوس اعا, «وسىنداي چەمپيون بولعىم كەلەدى» دەپ ەلىكتەگەن سپورتشىڭىز بولدى ما؟ ءسىزدىڭ چەمپيون بولعانىڭىزعا قاتتى قۋاندىق…
بيبينۇر ديدار, ەرەيمەنتاۋ قالاسى, اقمولا وبلىسى.
– شىنىمدى ايتسام, جالعىز ءبىر ادامعا ۇقسايىن دەپ ويلاماپپىن. ەلىمىزدە وليمپيادا ويىندارى مەن الەم چەمپيوندارى بولعان اعالارىمىز كوپ قوي. سپورتشى بولعان سوڭ بارىنە دە قىزىعىپ قارايتىنمىن. سولار سەكىلدى چەمپيون بولسام دەپ ارماندايتىنىمدى جاسىرمايمىن. قازاعىمنىڭ تۋىن كوتەرسەم دەپ تالپىنا بەردىم, وسى ماقساتتا ەڭبەكتەنۋدەن قاشپادىم.
– وتباسىڭىز تۋرالى ايتىپ بەرىڭىزشى. ءسىز چەمپيون بولعاندا ولار قالاي قۋاندى ەكەن؟
كوشەرباي سماعۇلوۆ, توڭكەرىس اۋىلى, تسەلينوگراد اۋدانى, اقمولا وبلىسى.
– قۇدايعا شۇكىر, اكەم مەن شەشەم بار. ەكى اعام ءوز الدارىنا ءۇي بولىپ, بالا-شاعاسىن ءوسىرىپ وتىر. ەندى, ولاردىڭ قالاي قۋانعانىن ايتىپ جەتكىزە الماسپىن. ولاردىڭ ءبارى – مەن سپورتقا كەلگەلى ەڭ باستى تىلەۋقورلارىم جانە جانكۇيەرلەرىم.
– ءسىز ۇيلەنگەنسىز بە؟ جوق بولسا, سۇيگەن قىزىڭىز بار ما؟ قايدا تۇراسىز؟
سالتانات, ستۋدەنت, استانا قالاسى.
– ەكەۋى دە جوق. تارازدا تۇرامىن.
– سپورتتان باسقا, كوڭىلىڭىز قالايتىن كاسىپ-ەرمەگىڭىز بار ما؟
ايناگۇل ءابىلوۆا, استانا قالاسى.
– شىنىمدى ايتسام, مەنىڭ بار ۋاقىتىم جاتتىعۋ مەن جارىستارعا قاتىسۋعا كەتەدى. بوس ۋاقىتىم از دەسەم بولادى. بىراق, قولىم تيگەندە ءان سالۋدى ۇناتامىن. اندا-ساندا كاراوكەگە بارىپ تۇرامىن.
– الەم چەمپيونى بولعانىزبەن قۇتتىقتايمىن. ءسىز دزيۋدو كۇرەسىنەن بۇل اتاققا قازاق جاستارىنان ءبىرىنشى بولىپ قول جەتكىزدىڭىز, بۇل دا ۇلكەن ابىروي بولدى. ەندى ريو-دە-جانەيروعا باراسىز عوي, وليمپيادا ويىندارىنان التىن الۋىڭا تىلەكتەسپىن.
بولات بالجانوۆ, زەينەتكەر, استانا قالاسى.
– تىلەگىڭىزگە كوپ راحمەت اعا. ارينە, ەندىگى ماقساتىم – وليمپيادا ويىندارىندا ءساتتى ونەر كورسەتۋ. دايىندالامىز.
– باپكەرىڭىز كىم؟ ەلدوس, الەم چەمپيونى بولۋ تىكەلەي باپكەرگە قاتىستى بولادى دەپ ويلايسىز با؟
جاقسىكەلدى ءابدىراحمانوۆ, جەكە كاسىپكەر, استانا قالاسى.
– مەنى الەمدىك دەڭگەيگە كوتەرگەن باپكەرىم – عالىمجان جىلگەلديەۆ. بۇل كىسى مەنىڭ تۋعان اعامداي بولىپ كەتكەن عوي. ۇلتتىق قۇرامادا ەرمەك يمانبەكوۆ اعانىڭ قول استىندا جاتتىعامىز. ال ەكىنشى ساۋالىڭىز جايىندا ايتارىم, ءوز باسىم باپكەرسىز جەڭىسكە جەتۋ مۇمكىن ەمەس دەپ ويلايمىن.
– جەڭىسىڭىزدى كىمگە ارنادىڭىز؟
فاريدا كاريموۆا, استانا قالاسى.
ەلىمە, حالقىما, اتا-اناما, باپكەرلەرىمە جانە وزىمە!
دايىنداعان: عالىم قوجابەكوۆ
