قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ جۇلدەسى ءۇشىن قازاق كۇرەسىنەن وتكەن ءداستۇرلى رەسپۋبليكالىق تۋرنيردە بەيبىت ىستىباەۆ ءۇشىنشى مارتە جەڭىمپاز اتاندى. جامبىلدىڭ جامپوزىنا ءتۋرنيردىڭ باس جۇلدەسى «التىن تايتۇياق» سىيلىعىن قازاقستان رەسپۋبليكاسى ۇلتتىق وليمپيادا كوميتەتىنىڭ توراعاسى تيمۋر قۇلىباەۆ تابىس ەتتى. استانا قالاسىنىڭ اكىمى اسەت يسەكەشەۆ ەلوردا تورىنەن پاتەر كىلتىن تاپسىردى. سونداي-اق, جەڭىمپاز بالۋانعا 25 ميلليون تەڭگە بەرىلدى.
ەلىمىزدەگى ەڭ مىقتى بالۋانداردىڭ اراسىندا وتەتىن «قازاقستان بارىسى» ءتۋرنيرى استانا كۇنى مەرەكەسى قارساڭىندا جۇرتشىلىقتىڭ اسىعا كۇتەتىن ايتۋلى شاراسىنا اينالىپ كەتتى. ۇلتتىق ونەرىمىز – قازاق كۇرەسىنىڭ قۇدىرەتىن كورسەتەتىن, بيىل التىنشى رەت ۇيىمداستىرىلعان جارىستى تاماشالاۋعا جينالعان جانكۇيەرلەر قاراسى 10 مىڭعا جۋىقتاپ جىعىلدى.
بايراقتى جارىسقا بوز كىلەمگە اربالعان 34 بالۋان قاتىستى. ايماقتاردا ىرىكتەۋ جارىستارىنان توپ جارعاندار عانا جارىسقا جىبەرىلدى. اتاپ ايتقاندا, ءار وبلىستان, الماتى جانە استانا قالالارىنان ەكى بالۋاننان ىرىكتەلدى. سونداي-اق, بيىل قورعانىس مينيسترلىگىنەن ءىرى بالۋان تاڭدالدى. ال 2015 جىلى «قازاقستان بارىسى» اتانعان جامبىلدىق بەيبىت ىستىباەۆ جارىس ەرەجەسىنە سايكەس ىرىكتەۋسىز-اق فينالدىق سايىستارعا قوسىلدى.
سونىمەن, استانا تورىندەگى «سارىارقا» ۆەلوترەك كەشەنىندە توسەلگەن بوز كىلەمگە ءبىرىنشى بولىپ وسى جارىسقا قاتىسۋشىلار اراسىنداعى ەڭ جاسى ۇلكەن داۋلەت الپىسوۆ شىقتى. سولتۇستىك قازاقستان وبلىسىنىڭ نامىسىن قورعاعان جىگىت اعاسى بيىل 37 جاسقا تولعان ەكەن. ونىڭ قارسىلاسى «قازاقستان بارىسى-2014» تۋرنيرىندە «كورەرمەن كوزايىمى» سىيلىعىن العان جامبىلدىق داۋلەتحان جاقىپوۆ بولدى. اتتەگەن-ايى, بۇل بەلدەسۋدە الپىسوۆ اياعىنان جاراقاتتانىپ, جارىستان شىعىپ قالدى.
ءار بەلدەسۋدە بالۋانداردىڭ شاشباۋىن كوتەرگەن جانكۇيەر قاۋىم ايانىپ قالعان جوق. ايقايعا باسىپ, الاقاندى سوعىپ بار بالۋاندى جىگەرلەندىرىپ وتىردى. ءبىرىنشى اينالىمدا وسى تۋرنيردە جەڭىمپاز بولادى-اۋ دەگەن بالۋاندار ءبىر-بىرىمەن كەزدەسىپ جاتتى. ماسەلەن, «قازاقستان بارىسىنىڭ» ءار جىلدارداعى جۇلدەگەرلەرى قاراعاندىلىق اسىل بارمەنوۆ پەن قىزىلوردالىق رۋسلان ابدىرازاقوۆ, وسى ءتۋرنيردىڭ جەڭىمپازدارى ۇلان رىسقۇل مەن ايبەك نۇعىماروۆ ءوزارا سىنعا ءتۇستى. جانكۇيەرلەر «قاپ-اي, ءبارى دە جۇلدە ءۇشىن كۇرەسەتىن بالۋاندار ەدى…» دەپ قىنجىلىپ تا جاتتى. وسى ءبىر تارتىستى بەلدەسۋلەردە رۋسلان مەن ۇلان كەلەسى اينالىمعا ءوتتى.
سونىمەن, كۇنى بويى وتكەن بايراقتى باسەكەدە «جۇزدەن جۇيرىك, مىڭنان تۇلپار» شىققان ءتورت بالۋان جارتىلاي فينالعا شىقتى. ءبىر قىزىعى, ءتورت مىقتىنىڭ ۇشەۋى جامبىل وبلىسىنان بولدى. كوپشىلىك كۇتكەندەي, بەيبىت ىستىباەۆ وسى كەزەڭگە اسا قينالماي ءوتتى دەۋگە بولادى. ال داۋلەتحان جاقىپوۆ پەن ايبول ايتبەك ءار كۇرەستە جانكەشتىلىك تانىتىپ, كورەرمەننىڭ ىقىلاسىنا بولەنە ءبىلدى. ال وسى ۇشەۋدىڭ ورتاسىنا وڭتۇستىك قازاقستان وبلىسىنىڭ نامىسىن قورعاعان جۇمانازار ەرسۇلتانوۆ ءتۇستى.
جارتىلاي فينالدىڭ ءبىرىنشى بەلدەسۋىندە بەيبىت ىستىباەۆ پەن داۋلەتحان جاقىپوۆ كەزدەستى. بۇل سىندا «قازاقستان بارىسىنىڭ» ەكى دۇركىن جەڭىمپازى باسىم بولدى. ەكىنشى جۇپتا وسى جارىستاعى ەڭ اۋىر سالماقتى (160 كەلى) جۇمانازار ەرسۇلتانوۆ ايقىن باسىمدىلىقپەن ۇتتى.
ءۇشىنشى ورىن ءۇشىن بولعان بەلدەسۋدە ايبول ايتبەكتىڭ جولى بولىپ, قولا بەلبەۋ يەگەرى اتاندى. ال «قازاقستان بارىسى-2016» اتاعى ءۇشىن بەيبىت ىستىباەۆ پەن جۇمانازار ەرسۇلتانوۆ اراسىندا وتكەن شەشۋشى كۇرەستە جامبىلدىڭ جامپوزى تازا جەڭىسكە جەتتى. وسىلايشا, «2012 جانە 2015 جىلدارى «قازاقستان بارىسى» اتاعىن جەڭىپ العان بەيبىت ىستىباەۆ ءۇشىنشى رەت ۇزدىك بالۋان اتاندى.
عالىم قوجابەكوۆ
