توبىلدىڭ» ءساتتى سانى – 94
قوستانايدىڭ «توبىلى» ەۋروپا ليگاسى ىرىكتەۋ كەزەڭىنىڭ العاشقى ويىنىندا گرۋزيانىڭ «سامترەديا» كلۋبىمەن كەزدەستى.
ماتچ تبيليسي قالاسىندا ءوتتى. الاڭ يەلەرى العاشقى مينۋتتان شابۋىلعا دەم بەرىپ, قارسىلاسىن قىسپاققا الدى. قوناقتار دا قاراپ قالماي, ءساتى كەلسە الىستان دا, جاقىنداپ تا قاقپاعا سوققى باعىتتاپ كوردى. سوڭعى مينۋتقا دەيىن تارازى باسى تەڭ تۇرعانمەن, «توبىل» ءبىر ەبىن تاۋىپ, ەسەپتى اشىپ ۇلگەردى. قوسىمشا ۋاقىت قوسىلىپ, 94-مينۋتتا ماكسيم فەدين جەڭىستى گولدى سالدى. ەندى قارىمتا ويىن 19 شىلدە كۇنى قوستانايدا وتەدى.
«استانانىڭ» اياقالىسى جامان ەمەس
«استانا» كلۋبى چەمپيوندار ليگاسىنىڭ ىرىكتەۋ كەزەڭىندە ءوز الاڭىندا چەرنوگوريانىڭ «سۋتەسكا» كومانداسىن قابىلدادى.
ەلوردالىقتار كەزدەسۋدىڭ ءفاۆوريتى سانالعانىمەن, قارسىلاستى وسال ءتۇستى دەپ ايتۋعا كەلمەس. جاڭالىعى – «استانا» ساپىنا جاڭا قوسىلعان انتونيو رۋكاۆينانىڭ دەبيۋتتى ويىنى. ول جاقىندا عانا رەسەيدەگى الەم چەمپيوناتىنان ورالعان ەدى. سونىمەن ماتچ تاعدىرىن شەشكەن جالعىز گول 29-مينۋتتا پەنالتيدەن سوعىلدى. ونى ورىنداعان – رومان مۇرتازاەۆ. سىرت الاڭداعى گولدىڭ سالماعىن جاقسى بىلەتىن قوناقتار ءبىراز تىرىسىپ باقتى. الاڭ يەلەرى دە ەسەپتى نەعۇرلىم ەسەلەۋگە ۇمتىلدى. بىراق ويىن سول كۇيى 1:0 ەسەبىمەن اياقتالدى. ەندى «استانا» 19 شىلدەدە نيكشيچ قالاسىندا وينايدى.
«ەرتىس» تەڭ ءتۇستى
ەۋروپا ليگاسىنىڭ ىرىكتەۋ كەزەڭىندە پاۆلوداردىڭ «ەرتىسى» ءبىرىنشى ويىنىن سىرت الاڭدا ليتۆانىڭ «تراكاي» كومانداسىنا قارسى وتكىزدى.
قوس كوماندا ءا دەگەننەن العا ۇمتىلىپ, اشىق ويىن كورسەتۋگە كوشتى. قازاقستاندىقتار الاڭ يەلەرى باسىمدىقتى بەرىپ, قارسى شابۋىلعا يەك ارتتى. «ەرتىستى» قورعانىسى بەكەم بولدى دەۋگە كەلمەيدى, ويتكەنى «تراكايعا» گول سوعاتىنداي مۇمكىندىكتەر بەرىپ قويدى. ەكىنشى تايمدا قوناقتار ءبىرىنشى نومىرمەن وينايدى. ويىن سوڭىنا تامان ۇتىپ كەتەتىندەي جاعدايى بولدى. بىراق سەرگەي كيسلياك پەنالتيدەن ءمۇلت كەتتى. ەسەپ – 0:0. جاۋاپتى ويىن 19 شىلدەدە پاۆلوداردا وتەدى.
«قايرات» قاتتى كەتتى
الماتىنىڭ «قايراتى» ەۋروپا ليگاسىنىڭ ىرىكتەۋ كەزەڭىن وتە ءساتتى باستادى.
سىرت الاڭدا اندوررانىڭ «ەنگورداني» كومانداسىمەن ويناعان الماتىلىقتار ويىندى ءىرى ەسەپپەن اياقتادى. جەرگىلىكتى كلۋبقا جاۋاپسىز ءۇش گول سوعىپ, كەزدەسۋ تاعدىرىن العاشقى ويىندا-اق شەشىپ تاستادى دەۋگە بولادى. گول اۆتورلارى – ادەرينسولا ەسەولا (5-مينۋت), باۋىرجان يسلامحان (25-مينۋت) جانە مارتون ەپپەل (91-مينۋت). ەندى قارسىلاس كوماندانى 19 شىلدە كۇنى الماتىدا قارسى الادى.
