قوعامدىق كولىكتە ءجۇرۋ ەرەجەسى وزگەرەدى
21 شىلدەدەن باستاپ ەلورداداعى قوعامدىق كولىكتەردە جولاۋشىلاردى وتىرعىزۋ مەن ءتۇسىرۋ ءتارتىبى وزگەرەدى.
جاڭا ەرەجەگە سايكەس, جولاۋشىلار اۆتوبۋسقا تەك جۇرگىزۋشى جاقتاعى الدىڭعى ەسىكتەن كىرۋى ءتيىس. ال شىعاردا ورتاڭعى نەمەسە سوڭعى ەسىكتەر پايدالانىلادى. ورتاڭعى ەسىكتەن كىرىپ-شىعۋ قۇقىعى مۇمكىندىگى شەكتەۋلى جاندارعا, زەينەتكەرلەرگە, جۇكتى ايەلدەرگە, مەكتەپ جاسىنا دەيىنگى بالانى ەرتكەن جولاۋشىلارعا عانا بەرىلەدى.
بۇل وزگەرىستەر جولاۋشىلاردى بولاشاقتا كوندۋكتورسىز قاتىنايتىن اۆتوبۋستارمەن جۇرۋگە بەيىمدەمەك. بۇگىنگى كۇننىڭ وزىندە قالا بويىنشا ەكى باعىتتا قوعامدىق كولىك جۇرگىزۋشىسى جولاۋشىلاردى كوندۋكتورسىز تاسىمالداپ ءجۇر ەكەن. الداعى ۋاقىتتا بۇل تاجىريبە بىرتە-بىرتە باسقا دا اۆتوبۋستارعا ەنگىزىلمەك. ال اۆتوبۋستاردا كولىك كارتاسىمەن تولەم جاسايتىندار قاتارى كوبەيگەن سايىن كوندۋكتورلاردىڭ دا جۇمىستان قىسقارا باستايتىنىن ايتادى ماماندار.
– 21 شىلدەدە سارالانعان تاريف ەنگىزىلەتىندىكتەن, كوندۋكتورلاردىڭ قىزمەتى بىرتىندەپ جويىلا باستايدى. الايدا بارلىق كوندۋكتور بىردەن جۇمىستان شىعارىلمايدى. سەبەبى كولىك كارتاسىن بارلىعى الىپ ۇلگەرمەگەن, قولما-قول اقشامەن ەسەپتەسەتىن جولاۋشىلار ءالى دە از ەمەس, – دەيدى «استانا LRT» كومپانياسىنىڭ ءباسپاسوز قىزمەتىنىڭ جەتەكشىسى ناۋات ازانباەۆا.
ونىڭ ايتۋىنشا, 1 شىلدەدەن وسى ۋاقىتقا دەيىن 42 مىڭنان اسا كارتا ساتىلىپتى. ال بۇعان دەيىن 40 مىڭ كارتا ءۇش ايدا ساتىلسا, قازىر اپتاسىنا 20 مىڭ كارتا ساتىلىپ جاتقان كورىنەدى.