استانا اكىمى اسەت يسەكەشەۆ يتاليا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى پاسكۋالە د’اۆينومەن كەزدەستى. قوس تاراپ ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋ ماسەلەلەرىن تالقىلادى.
ەلوردا باسشىسى ديپلوماتتى ەلشى قىزمەتىنە تاعايىندالۋىمەن قۇتتىقتاپ, قازاقستان مەن يتاليا اراسىنداعى ىنتىماقتاستىق ارتاتىنىنا سەنىم ءبىلدىردى.
«استانانىڭ سەرپىندى دامۋى, ينۆەستيتسيالىق تارتىمدىلىعى جانە ايتارلىقتاي يننوۆاتسيالىق پوتەنتسيالى قالامىزدىڭ ماڭىزدى ارتىقشىلىعى بولىپ تابىلادى. بۇگىنگى تاڭدا يتاليا قازاقستاننىڭ باستى ساۋدا سەرىكتەستەرىنىڭ بىرىنە اينالدى. ءبىز مەملەكەتتەر اراسىندا بولاشاقتا ءارتۇرلى قارىم-قاتىناستاردىڭ ساقتالۋىن قۋانا قۇپتايمىز. وڭىرارالىق ىنتىماقتاستىقتىڭ سەرپىندى دامۋىنا استانا مەن يتاليانىڭ بىرقاتار ايماقتارى مەن قالالارى اراسىندا جاسالعان ىنتىماقتاستىق جونىندە كەلىسىم سەپ بولدى» دەدى اسەت يسەكەشەۆ.
استانا اكىمى «ەكسپو-2017» كورمەسى كەزىندە استاناعا يتاليانىڭ 10 ايماعىنان دەلەگاتسيالار كەلگەنىن ەرەكشە اتاپ ءوتتى. ولاردىڭ قاتارىندا كامپانيا, لومبارديا, ماركە, توسكانا مەن ۋمبريا, اپۋليا, لاتسيو, ميلان, سيتسيليا جانە ەميليا-رومانيا ايماقتارى بار. بۇل ايماقتار – سانى جاعىنان حالىقارالىق كورمەگە قاتىسقان رەسەي مەن قىتايدان كەيىن ءۇشىنشى كورسەتكىش.
پاسكۋالە د’اۆينو ءوز تاراپىنان استاناعا تامسانعانىن, 20 جىل ىشىندە ەلوردادا اتقارىلعان ىستەردەن ۇلكەن اسەر العانىن جەتكىزدى.
«ريم مەن ميلان قالالارىمەن بەلسەندى بايلانىستا بولۋ ءۇشىن تىكەلەي رەيستەر اشىلۋى كەرەك. قازىرگى كەزدە الماتى-ميلان جانە استانا-ريم تىكەلەي رەيستەرىن اشۋ ماسەلەسى شەشىلۋدە» دەگەن يتاليا ەلشىسى كۇزدە استانادا وتەتىن ساۋلەت جانە ديزاين اپتالىعىنا يتاليالىق ماماندار قاتىساتىنىن حابارلادى. بۇگىنگى تاڭدا استانادا يتاليانىڭ مادەنيەت ينستيتۋتىن اشۋ ماسەلەسى قاراستىرىلىپ جاتقانىن جەتكىزدى.
