ەسىلدىڭ سول جاعالاۋى كوزدىڭ جاۋىن الاتىن تاعى ءبىر ماڭىزدى نىسانمەن تولىقتى. قابانباي باتىر داڭعىلى مەن سىعاناق كوشەسىنىڭ قيىلىسىنداعى سۋ جاڭا عيماراتقا ەسىل اۋدانى اكىمدىگىنىڭ اپپاراتى قونىس تەپتى.
بەس قاباتتى جاڭا اكىمشىلىك سارايدىڭ جالپى اۋماعى جەتى مىڭ ەكى جۇزدەن اسا شارشى مەتردى قۇرايدى ەكەن. مۇندا اۋدان اكىمىنىڭ اپپاراتىمەن قاتار, ەڭبەك ينسپەكتسياسى, بالالار قۇقىقتارىن قورعاۋ جونىندەگى جانە ءدىن ىستەرى ءجونىندەگى باسقارمالار, «EXPO-2017» حالىقارالىق كورمەسىنە دايىندىق جانە وتكىزۋ ديرەكتسياسىنىڭ مەكەمەلەرى ورنالاسادى.
قونىس تويعا استانا قالاسىنىڭ اكىمى يمانعالي تاسماعامبەتوۆ ارنايى ات باسىن بۇرىپ, اۋدان اكتيۆىمەن جينالىس وتكىزدى. اۋدان قالانىڭ وركەندەۋىنە ايرىقشا ۇلەس قوسىپ كەلە جاتقانىن باسا ايتقان اكىم مەملەكەتتىك قىزمەتكەرلەردى قۋانىشتارىمەن قۇتتىقتادى.
ودان كەيىن قالا اكىمى بىرنەشە تۇيتكىلدى ماسەلەلەرگە دە توقتالىپ, الداعى مىندەتتەردى اڭگىمەلەدى. استانا – ەلىمىزدىڭ ايناسى, بەت-بەينەسى دەسەك, ءبىرىنشى كەزەكتە ەلوردادا ءتارتىپ پەن تازالىق بولۋى كەرەكتىگىن ايتىپ, 2013-2014 جىلعى جىلۋ بەرۋ ماۋسىمىنا دايىندىقتى ازىردەن باستاۋعا شاقىردى. «استانادا قىس التى ايعا سوزىلاتىنىن بىلەسىزدەر. وتكەن جىلى كۇن قاقاپ, اپتالاپ اياز تۇردى. سوندىقتان, «قىستىڭ قامىن جاز ويلا» دەمەكشى, دايىندىقتى ەرتەرەك باستاۋ كەرەك. وسى ۋاقىتقا دەيىن قىستا جىلۋسىز وتىرعان ەشكىم بولعان جوق. اۋدان باسشىلىعى بيىل دا جىلۋ ماۋسىمىنا تولىققاندى دايىندالادى
دەپ سەنەمىن» دەدى ول.
ايتا كەتۋ كەرەك, ەسىل اۋدانى بەس جىل بۇرىن عانا پرەزيدەنت جارلىعىمەن قۇرىلعان. جاڭا اۋداننىڭ قۇرىلۋى قالالىق شارۋاشىلىقتى باسقارۋ جانە تۇرعىن ءۇي-كوممۋنالدىق نىساندار سالاسىنىڭ جۇيەسىن جەتىلدىرۋ, حالىققا ارنالعان مەملەكەتتىك جانە الەۋمەتتىك قىزمەت كورسەتۋ ساپاسىن جاقسارتۋ جانە قامتاماسىز ەتۋ ماسەلەلەرىن ءتيىمدى شەشۋگە مۇمكىندىك بەردى.
بۇگىنگى تاڭدا اۋدان تۇرعىندارىنىڭ سانى 103 مىڭدى شامالايدى, اۋماعى – 31179 گەكتار.
اسحات رايقۇل
سۇبەلى ءسوز
يمانعالي تاسماعامبەتوۆ, استانا قالاسىنىڭ اكىمى:
– ەسىل اۋدانى قۇرىلعاننان بەرى كەڭەيىپ, حالقىنىڭ سانى دا ءوسىپ كەلەدى. سول جاعالاۋداعى اۋداننىڭ ءوسۋى, وركەندەۋى, كوز تارتۋى اۋداندىق اكىمدىككە بايلانىستى. ال, اكىمدىكتىڭ ايرىقشا عيماراتىنىڭ بولۋى مەملەكەتتىك ورگاننىڭ ۇلكەن بەدەلى بولىپ ەسەپتەلەدى. بىرەۋدىڭ عيماراتىن جالداۋ, بىرەۋدىڭ قاس-قاباعىنا قاراۋ, قولىنا قاراۋ – مەملەكەتتىك ورگانعا, مەملەكەتكە قاراما-قايشى كەلەتىن جاعداي. ەڭسەمىز تۇزەلگەن سايىن, بيۋدجەتتە قاراجات بولعاننان كەيىن, وسى عيماراتتى سالۋعا بەل بۋدىق. مىنە, اۋداننىڭ كوركىن كەلتىرەتىن عيمارات بولدى بۇل. ءبىر جاعىنان جۇمىس ىستەۋگە, ەلباسى تاپسىرمالارىن, الداعى ماقساتتاردى ورىنداۋعا بارلىق جاعداي جاسالعان مۇندا.
