«اتامەكەن» قازاقستان كارتاسى» ەتنو-مەموريالدىق كەشەنى قىزمەتكەرلەرى ەلىمىزدىڭ كونستيتۋتسياسى كۇنىنە وراي ەرلى-زايىپتى جازۋشىلار, مەملەكەتتىك سىيلىقتىڭ لاۋرەاتى اكىم تارازي جانە روزا مۇقانوۆامەن كەزدەستى.
«قازاقستان جەكە مەملەكەت بولعالى بەرى بەس-التى قاسيەتتى كۇندەر بار. سونىڭ ءبىرى – اتا زاڭ كۇنى» دەگەن اكىم تارازي, ءارى قاراي جينالعانداردى مەرەكەمەن قۇتتىقتادى. اشارشىلىقتان ەل ەس جيا الماي جاتقاندا دۇنيەگە كەلگەن ونىڭ بالالىق شاعى ناعىز قيىن كەزەڭگە تاپ كەلدى. ۇلى وتان سوعىسى باستالىپ, ىشەر اسقا جارىماي ءوستى. وسىنىڭ ءبارىن ەسكە الىپ, كەڭەس وداعى تۇسىندا حالقىمىزدىڭ وتارشىلداردان كورگەن قۇقايىن اڭگىمەلەدى. اللانىڭ جارىلقاۋىمەن ۋىسىمىزعا تۇسكەن تاۋەلسىزدىكتى باعالاۋعا شاقىردى. استانامىز تۋرالى ءسوز قوزعاپ: «برازيليا دەگەن ەل ءوزىنىڭ استاناسىن سالعانىنا الپىس جىل بولدى. ءالى بىتىرە الماي جاتىر. كەنيا دەگەن افريكا ەلى ءوزىنىڭ استاناسىن سالا باستاعانىنا ەلۋ جىلدان استى. ءالى باس كوشەسىن, نەگىزگى كوشەسىن بىتىرگەن جوق. ءبىز 800 مىڭ حالقى بار استانامىزدى 15 جىل ىشىندە سالىپ الدىق. بۇل – ادامزات تاريحىندا بولماعان جاعداي» دەدى ول.
ساناۋلى كۇندەردەن كەيىن جازۋشى اعامىز 80 جاسقا تولادى. ءوزىنىڭ شىعارماشىلىعىنان حابار بەرگەن ول بۇگىنگى كۇنگە دەيىن 8 توم كىتاپ جازعانىن ايتتى. سونىڭ جەتى تومى «فوليانت» باسپاسىنان بيىل جارىق كورەتىندىگىن, سەگىزىنشى تومى – پەسالار جيناعى كەلەسى جىلعا قالىپ وتىرعانىن جەتكىزدى.
ال, جازۋشىنىڭ جارى, قالامگەر روزا مۇقانوۆا ءوز سوزىندە: «مەملەكەت دەگەن نە؟ تاۋەلسىزدىك دەگەن نە؟ تاۋەلسىزدىكتىڭ قۇنى قانداي؟ دەگەندى وسى «اتامەكەننەن» جاس ۇرپاقتىڭ ءبىلىپ, تانۋى – ۇلكەن جەتىستىك. اتا زاڭدى وزدەرىڭىز بىلەسىزدەر, زاڭ – حالىق پەن بيلىك اراسىنداعى ۇيلەسىم. زاڭعا حالىق تا, باسشى دا باعىنادى. ەستەرىڭىزدە بولسا, پرەزيدەنتىمىزدىڭ «زاڭنىڭ الدىندا ءبارىمىز بىردەيمىز» دەپ ايتقانى بار. زاڭىمىز ارقاشاندا ادىلەتتى بولسىن! قۇران كارىمدە ءبىر عاجايىپ شىندىق بار. وسى ءبىزدىڭ اتا زاڭعا دا كەلەدى. «اقيقات بار جەردە ادىلدىك بار». بۇل – قۇران كارىمنىڭ ءسوزى. اقيقات دەگەنىمىز, بۇگىنگى بىزدەر ءۇشىن ول – زاڭ. سىزبەن بىزگە ورتاق زاڭ» دەدى. 1986 جىلعى جەلتوقسان وقيعاسى ءجونىندە اقتارىلا سويلەپ, وعان ءوزىنىڭ دە قاتىسقاندىعىن جاسىرا المادى.
«اتامەكەن» قازاقستان كارتاسى» ەتنو-مەموريالدىق كەشەنىندە «جاستار كلۋبى» جۇمىس ىستەيدى. وسى كلۋب مۇشەلەرى جازۋشىلاردى مەرەكەمەن قۇتتىقتاپ, ەلدىككە شاقىراتىن جىرلار وقىدى. اكىم تارازيدىڭ ءومىربايانىن بىلەتىندىگىن كورسەتتى. ءىس-شارا ەسكەندىر حاسانعاليەۆتىڭ «اتامەكەن» انىمەن اياقتالدى.
امانعالي قالجانوۆ
