استانا حالقىن ماۋسىمارالىق ازىق-تۇلىكپەن قامتاماسىز ەتۋ – بۇگىنگى كۇننىڭ وزەكتى ماسەلەلەرىنىڭ ءبىرى. بۇل باعىتتا قالا باسشىلىعى تاراپىنان دا اتقارىلىپ جاتقان شارۋا قىرۋار. باعانى تۇراقتى ۇستاۋ, ازىق-تۇلىك بەلدەۋىن قالىپتاستىرۋ ۇنەمى قاداعالاۋ مەن مىعىم ءىستى قاجەت ەتەدى. وسى ورايدا, استانا قالاسى اۋىل شارۋاشىلىعى باسقارماسىنىڭ باستىعى مۇرات دالاباەۆتى اڭگىمەگە تارتىپ, از-كەم تىلدەسۋدىڭ ءساتى تۇسكەن…
– نان باعاسىنىڭ قىمباتتاماۋى, تۇراقتىلىعى استانالىقتاردىڭ كوكەيىندەگى ءبىرىنشى ماسەلە. ءسىز نە ايتاسىز؟
– استانا قالاسىنىڭ اكىمدىگى مەن ساۋدا وبەكتىلەرى جانە ناۋبايحانالار اراسىندا 1 سۇرىپتى نانعا جانە ۇنعا باعانىڭ ءوسۋىن بولدىرماۋ ماقساتىندا شەكتى باعانى بەكىتۋ تۋرالى مەموراندۋمعا قول قويىلعان. ناتيجەسىندە 1 سۇرىپتى ۇننىڭ كەلىسى 45 تەڭگەدەن, بولشەك جەلىسىندە 50 تەڭگەدەن ارتىق ەمەس باعامەن ساتىلۋدا. سوندىقتان بۇعان الاڭداۋدىڭ قاجەتى جوق دەپ بىلەم. تاعى ايتا كەتەرلىگى, 1 تامىزدا بىلتىرعى جىلدىڭ وسى كەزەڭىمەن سالىستىرعاندا, ازىق-تۇلىك تاۋارلارىن تۇتىنۋ باعاسىنىڭ ءوسۋ يندەكسى 2,2 پايىزعا تومەندەگەن.
– وندا وتكەن جىلدىڭ كۇزىندە قالىپتاستىرىلعان ازىق-تۇلىك قورى دا ءبىرشاما وسكەن بولار؟..
– ءيا, ەڭ تومەنگى باعالار بويىنشا 795,2 ميلليون تەڭگەگە 6 928 توننا كۇرىش, قانت, وسىمدىك مايى, ۇنتاق جارماسى, ارپا جارماسى, سۇلى جارماسى, قاراقۇمىق جارماسى, كارتوپ, پياز, ءسابىز ساتىپ الىندى. وسى ونىمدەر جىل بويى سۋپەرماركەتتەر, ساۋدا جۇيەلەرى جانە الەۋمەتتىك پاۆيلوندار ارقىلى وتكىزىلۋدە. بۇل قالا نارىعىندا باعانىڭ تۇراقتىلىعىنا اسەرىن تيگىزدى دەگەن ويدامىن. بۇل جۇمىس جىل سايىن جۇزەگە اسىرىلاتىن بولادى, قازىرگى ۋاقىتتا 2012-2013 جىلدارعا تۇراقتاندىرۋ قورىن قالىپتاستىرۋ جۇرگىزىلۋدە.
– ماۋسىمارالىق كوكونىسپەن قالالىقتاردى قامتاماسىز ەتۋدە ساقتاۋ قويمالارىنىڭ دا ماڭىزى زور. بۇل باعىتتا قانداي جۇمىس ىستەپ جاتىرسىزدار؟
– قالا تەرريتورياسىندا كوكونىس قويمالارىن جانە جىلىجايلار سالۋ ەلوردالىقتاردى ءوز ونىمىمىزبەن قامتاماسىز ەتەدى. قالا تۇرعىندارىن جەمىس-كوكونىستەن تارىقتىرماۋ ءۇشىن ساقتاۋ كولەمى 60 000 توننادان كەم ەمەس قويما قاجەت. قازىرگى ۋاقىتتا جالپى كولەمى 19000 توننالىق 4 كوكونىس قويماسى جۇمىس ىستەۋدە. ونىڭ 2-ءۋى اعىمداعى جىلى پايدالانۋعا ەنگىزىلدى. الداعى قىركۇيەك ايىندا قاجەتتىلىكتى 46 پايىزعا دەيىن قامتيتىن, كولەمى 8850 توننالىق تاعى 2 جوبانى اياقتاۋ جوسپارلانۋدا. سونىمەن قاتار, 2013 جىلى قالانى 100 قامتاماسىز ەتەتىن 40600 توننالىق 8 جوباعا جەر تەلىمدەرى ءبولىندى جانە جوبالىق جۇمىستار جۇرگىزىلۋدە.
– جىلىجايلار سالۋ سوڭعى جىلدارى ەلىمىزدىڭ جەر-جەرىندە مىقتاپ جولعا قويىلدى. استانادا دا اۋىز تولتىرىپ ايتارلىقتاي شارۋالار جۇزەگە اسقان بولار؟..
– بۇگىندە ەلوردادا «استاناەكوستاندارت» جشس جانە «ناۋرزالينا» جىلىجاي كەشەندەرى جۇمىس ىستەيدى. ولاردىڭ ونىمدەرى ءساۋىر ايىنان بەرى نارىقتا. اعىمداعى جىلى قۋاتتىلىعى 800 توننالىق 1 جوبانى اياقتاۋ جوسپارلانۋدا. 2013 جىلى دا جىلىنا 3500 توننا ءونىم بەرەتىن 3 جىلىجاي پايدالانۋعا بەرىلمەك.
