مەملەكەتتى الەمدىك وركەنيەت كوشىنىڭ الدىنا شىعاراتىن – ونىڭ مىقتى ماماندارى. قانشا جەردەن باي مەملەكەت بولساڭىز دا, ەل جاستارى ساۋاتسىز بولسا, ول مەملەكەتتىڭ بولاشاعى بۇلىڭعىر. ال, سول ساۋاتتى جاستاردى تاربيەلەۋشى – ۇستاز!
ارداقتايتىن ەلىڭ بولسا, ەڭبەگىڭنىڭ جانعانى دەمەكشى, بيىل «استانا تاڭداۋى» بايقاۋىنىڭ وتكەنىن بىلەمىز. وندا ەڭ ۇزدىك مۇعالىم, دارىگەر, پوليتسيا قىزمەتكەرى جانە اۆتوبۋس جۇرگىزۋشىسى انىقتالدى. شاراعا ەلوردا اكىمدىگى ۇيىتقى بولدى. ال تاڭداۋدى قاراپايىم جۇرتشىلىق جاسادى.
«جاقسىنىڭ جاقسىلىعىن ايت» دەيتىن حالىقپىز. ماماندىعىڭنىڭ مايتالمانى بولساڭ, ەڭبەگىڭدى ەلىڭە جۇمساساڭ, بەدەلىڭنىڭ بيىكتەيتىنى انىق. بۇگىنگى ءبىزدىڭ ايتپاعىمىز, جيىرما مىڭنان استام داۋىس جيناپ, ۇزدىك ۇستاز اتانعان ماريا شوقىباسوۆا تۋرالى. ەلوردالىقتاردىڭ پىكىرىنشە, ول – ءوز كاسىبىنىڭ جىلىگىن شاعىپ, مايىن ىشكەن مايتالمان.
ماريا شوقىباسوۆا – 20 جىلدان اسا عۇمىرىن اعارتۋ سالاسىنا ارناعان قاستەرلى ماماندىق يەسى. ۇلاعاتتى ۇستاز مەكتەپكە «تارىداي بولىپ كىرەتىن» باستاۋىش سىنىپتىڭ بالدىرعاندارىنا ءبىلىم بەرەدى. وسى ۋاقىتقا دەيىن ول 6 رەت شاكىرتتەرىن جوعارى سىنىپقا شىعارىپ سالدى. ادەتتە, جايدارى جاننىڭ اينالاسىندا ادام كوپ بولادى. ءبىزدىڭ كەيىپكەرىمىز ءوزىن بايقاۋعا كىمنىڭ ۇسىنعانىن دا بىلمەپتى. وسى جەڭىسكە وقۋشىلارىمنىڭ, ولاردىڭ اتا-انالارىنىڭ داۋىس بەرۋىنىڭ ارقاسىندا جەتتىم دەيدى.
بۇگىندە ەلوردادا ورتاشا ەسەپپەن العاندا, جىلىنا 16-17 مىڭ نارەستە دۇنيەگە ەسىگىن اشادى. بۇعان قوسا, جىل سايىن قالاعا بەس مىڭنان استام وقۋشى باسقا ايماقتاردان كەلەدى. ال, سول ەل ەرتەڭى – بالالاردىڭ وزىق ويلى, مادەنيەتتى ازامات بولۋىنا ىقپال ەتەتىن ۇستازداردىڭ ورنى ەرەكشە. ۇلتتىڭ بولاشاعى ءۇشىن تاربيەنىڭ ماڭىزى زور ەكەنى بەلگىلى. ەلباسى ءوسىپ كەلە جاتقان جاس ۇرپاقتىڭ تاربيەسىنە ەرەكشە كوڭىل قويا وتىرىپ, بۇل ءوز كەزەگىندە تاربيە ماسەلەسى وتباسىنىڭ عانا ەمەس, بارشا قوعامنىڭ مىندەتى ەكەنىن ايقىنداپ بەرگەن بولاتىن. بالاباقشالاردا, مەكتەپتەردە تەك ءبىلىم عانا بەرىپ قويماي, تاربيەنىڭ دە تىزگىنىن تەڭ ۇستاۋدى تاپسىردى. بۇل رەتتە ۇستازدارعا ارتىلىپ وتىرعان جۇكتىڭ سالماعى قانشالىقتى ەكەنى ايتپاسا دا تۇسىنىكتى. ءبىزدىڭ كەيىپكەرىمىز ەل ارتقان وسى مىندەتتى ابىرويمەن اتقارىپ ءجۇر.
«ءوزىمنىڭ قاجىرلى ەڭبەگىمدى كەلەر ۇرپاقتىڭ بولاشاعىنا ارنايمىن. التى جاسار بالدىرعان ەرمەكساز سياقتى. سول سازدى قالىپقا كەلتىرۋدە باستاۋىش سىنىپ مۇعالىمدەرىنىڭ ەڭبەگى زور. ال, ەڭبەگىنىڭ جانۋى – شابىتقا شابىت قوساتىنى انىق. ەڭبەگىمنىڭ ەلەنگەنىنە قۋانىشتىمىن», – دەيدى ۇلاعاتتى ۇستاز ماريا.
ماريا شوقىباسوۆا حالقىنىڭ جوعارى قۇرمەتىنە يە بولدى. كەلەلى كەلەشەك ءۇشىن بىلەگىن سىبانعان ۇستازدىڭ ۇلاعاتتى ىستەرىن ەلى ەلەدى. ءوز ءىسىنىڭ حاس شەبەرى اتانعان مامانداردىڭ سۋرەتتەرىنىڭ اراسىندا ماريا شوقىباسوۆانىڭ دا سۋرەتى ءىلىنىپ تۇردى. مۇنى كورگەن ۇستازدىڭ ارىپتەستەرى مەن شاكىرتتەرى ۇستاز ەڭبەگىنىڭ ەش كەتپەگەنىنە قۋانىپ, ماقتان تۇتتى.
بۇگىندە مەملەكەت باسشىسى ەلدەگى ءبىلىم وشاقتارىنىڭ سانى مەن ساپاسىنىڭ ارتۋىنا بارلىق جاعدايدى جاساپ وتىر. ماسەلەن, ەگەمەندىك العان تۇستا قازاقتىلدى بالاباقشالار مەن مەكتەپتەر وتە از بولاتىن. قازىر ولاردىڭ سانى ايتارلىقتاي كوبەيگەن. بۇل – ءبىلىم سالاسىنىڭ بيلىك نازارىنان تىس قالماعاندىعىن كورسەتەدى.
تاڭداۋلىلاردى ماراپاتتاۋ كەزىندە استانا اكىمى يمانعالي تاسماعامبەتوۆ «سىزدەردىڭ بۇگىنگى جەڭىستەرىڭىز – جىلدار بويعى ەڭبەكتەرىڭىزدىڭ جەمىسى. سىزدەرگە قاراپ, سوڭدارىڭىزدان ەرگەن, ءتىپتى, ۇجىمدارىڭىزداعى ارىپتەستەرىڭىز بوي تۇزەيدى» دەگەن بولاتىن. ايتپاعىمىز, مارياداي مايتالماننىڭ جەڭىسى كوپتەگەن جاس مۇعالىمدەرگە ۇلگى بولۋى ءتيىس. بايگەدە ەڭ باستىسى, ۇتۋ ەمەس, سول بايگەگە ات قوسۋدىڭ ءوزى ۇلكەن جەڭىس ەمەس پە؟! ال, كوپتىڭ ىشىندە اتتىڭ وزىپ كەلۋى – زور جەڭىس! بۇل تۇرعىدا ماريا شوقىباسوۆا جەڭىمپاز دەپ ماقتاۋعا دا, وقۋشىلارى مەن ارىپتەستەرىنىڭ اراسىندا «ءبىزدىڭ ۇستاز وسىنداي» دەپ ماقتانۋعا دا لايىقتى مامان.
تاۋەلسىز قازاقستاننىڭ بولاشاق ازاماتتارى, قازىرگى كىشكەنتاي بۇلدىرشىندەردىڭ جاقسى تاربيە مەن ءبىلىم الۋى – ەل ەرتەڭى ءۇشىن ماڭىزدى ماسەلە. ال, سول ەلدىڭ تۇتقاسى رۋحاني تاربيەدەن باستاۋ الىپ, بىلىممەن قارۋلانعان, دەنساۋلىعى مىقتى ۇرپاقتىڭ قولىندا بولسا, كەلەشەك كەمەل بولارى انىق.
ەركەجان ساتىمبەك
