اقوردادا مەملەكەتتىك حاتشى قىرىمبەك كوشەرباەۆتىڭ توراعالىعىمەن قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى وتكىزىلدى. وتىرىستا باعدارلامانى 2020 جىلى ىسكە اسىرۋ ناتيجەلەرى جانە الداعى جۇمىستىڭ جاڭا باسىم باعىتتارى قاراستىرىلدى. كەڭەس بارىسىندا اتقارىلعان جۇمىس جونىندە اقپارات جانە قوعامدىق دامۋ ءمينيسترى ايدا بالاەۆا, ءبىلىم جانە عىلىم ءمينيسترى اسقات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا باياندادى.
ءىس-شارا بارىسىندا جاستاردىڭ «رۋحاني جاڭعىرۋ» باعدارلاماسىن ودان ءارى دامىتۋعا بايلانىستى جاڭا باستامالارى تۋرالى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ پەن قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى, ساياساتتانۋشى ەرلان سايروۆتىڭ ۇسىنىستارى دا تالقىلاندى. «رۋحاني جاڭعىرۋ» باعدارلاماسىن ىسكە اسىرۋ جونىندەگى 2020 جىلعا ارنالعان ءىس-شارالار جوسپارىنىڭ ورىندالۋى تالقىلاندى. الەمدىك پاندەميا مەن ەكونوميكالىق داعدارىس كوپتەگەن شارالار مەن جوبالاردىڭ جۇزەگە اسۋىنا كەسىرىن تيگىزىپ, كەدەرگى بولدى. باسىم كوپشىلىگىن كەيىنگە شەگەرۋگە تۋرا كەلدى. كەيبىر شارالاردىڭ تۇجىرىمداماسى قايتا قارالدى.
باعدارلاما اياسىندا ەلىمىزدىڭ رۋحانياتى مەن تاريحىن, ادەبيەتى مەن مادەنيەتىن, ءبىلىمى مەن عىلىمىن تەرەڭدەتۋ, تانىتۋ, زەرتتەۋ باعىتتارى بويىنشا جۇمىستار كەڭىنەن جالعاسۋدا. كوميسسيا وتىرىسىندا مەملەكەتتىك حاتشى قىرىمبەك كوشەرباەۆ «تۇڭعىش پرەزيدەنتىمىز – ەلباسى نۇرسۇلتان ءابىشۇلى نازارباەۆ «جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى. رۋحاني جاڭعىرۋ ۇلتتىق سانانىڭ ءتۇرلى پوليۋستەرىن قيىننان قيىستىرىپ, جاراستىرا الاتىن قۇدىرەتىمەن ماڭىزدى» دەپ اتاپ وتسە, مەملەكەت باسشىسى قاسىم-جومارت كەمەلۇلى توقاەۆ تاياۋدا حالىققا ارناعان جولداۋىندا: «قازىرگى مىندەت – حالقىمىزدىڭ جاڭا بولمىسىن قالىپتاستىرۋ, تۇتاس ۇلت ساپاسىن ارتتىرۋ. قازاق قوعامىندا جاڭا قاعيداتتار جانە جاڭا باعدارلار سالتانات قۇرۋى ءتيىس» ەكەنىن ايرىقشا ايتتى. ياعني, ۇلتتىق سانانى جاڭعىرتۋداعى وسى ساياسي ساباقتاستىقتى نەگىزگە الا وتىرىپ, ءبىز رۋحاني جاڭعىرۋدىڭ ۇلتتىق جاڭعىرۋعا ۇلاسۋىنا بارىنشا كۇش-جىگەرىمىزدى سالىپ, ۇلتىمىزدى جاڭا ساپالىق دەڭگەيگە كوتەرۋگە قىزمەت ەتۋىمىز كەرەك» دەپ اتاپ ءوتتى.
وسىعان وراي, كوميسسيا وتىرىسىندا «رۋحاني جاڭعىرۋ» باعدارلاماسىن ودان ءارى تەرەڭدەتىپ, ۇلتتىق جاڭعىرۋ كەزەڭىنە وتكىزۋدىڭ ارنايى «جول كارتاسىن» جاساۋ قاجەت دەگەن شەشىم قابىلداندى.
