نۇر-سۇلتاندا بالالار مەن جاسوسپىرىمدەر اراسىنداعى XV قالالىق «شاتتىق-2022» شىعارماشىلىق بايقاۋىنىڭ جەڭىمپازدارىن ماراپاتتاۋ ءراسىمى ءوتتى. بيىل 115 ءبىلىم بەرۋ ۇيىمىنان 4 مىڭنان استام قاتىسۋشى باق سىناعان بايقاۋدا نۇر-سۇلتان قالاسى ءبىلىم مەكەمەلەرىنىڭ ۇزدىك جاس مۋزىكانتتارى, حورەوگرافتارى, سۋرەتشىلەرى مەن تەحنيكالىق ديزاينەرلەرى جانە ۇزدىك ۇستازدار بار. بايقاۋدىڭ ماقساتى – بالالار مەن جاسوسپىرىمدەردىڭ شىعارماشىلىق الەۋەتىن دامىتىپ, كاسىبي بىلىكتىلىگىن جوعارىلاتۋعا كومەكتەسۋ.
– شاراعا نۇر-سۇلتان قالاسىنداعى 54 مەكتەپتەن 171 بالا قاتىسۋدا. نەگىزگى ماقساتى – بالالاردىڭ ونەرگە دەگەن قۇشتارلىعىن وياتۋ, ساحناعا بەيىمدەۋ. وزدەرىڭىز بىلەتىندەي, پرەزيدەنت تاپسىرماسىنا سايكەس, بيىل بالالار جىلى دەپ جاريالاندى. قاسىم-جومارت توقاەۆ ايتقانداي, بالالارعا ەرەكشە نازار اۋدارۋ كەرەك. سەبەبى ولاردىڭ اماندىعى – مەملەكەتىمىزدىڭ جارقىن بولاشاعىنىڭ سەنىمدى كەپىلى. سوندىقتان دا بۇگىنگى شارا وسىعان بايلانىستى ءوتىپ وتىر, – دەدى نۇر-سۇلتان قالاسى اكىمدىگىنىڭ «№1 ونەر مەكتەبى» مكقك ديرەكتورى فارحاد سابيەۆ.
ال ءدىناسىل ەسىمدى ونەرلى وقۋشى بولسا بولاشاقتا ءومىرىن شىعارماشىلىقپەن بايلانىستىراتىنىن جەتكىزدى.
– مەن جارىسقا ءبىراز ۋاقىت دايىندالدىم, بىراق دايىندىق وڭايعا تۇسپەدى. بۇگىن جاقسى ونەر كورسەتتىم دەپ ويلايمىن. بايقاۋعا قاتىسقان سەبەبىم قازاقستاننىڭ ۇلتتىق دومبىراشىسى بولعىم كەلەدى. وسىنداي جارىستارعا قاتىسىپ, جۇلدەلى ورىندارعا يە بولسام دەيمىن, – دەدى قاتىسۋشى.
قازىلار القاسىنىڭ مۇشەسى, قازاق ۇلتتىق ونەر ۋنيۆەرسيتەتىنىڭ وقىتۋشىسى داۋلەت تاپەنوۆتىڭ ايتۋىنشا, بالالار مەن جاسوسپىرىمدەردىڭ دايىندىعى جوعارى دەڭگەيدە.
– دارىندى بالالاردى قولداۋعا ارنالعان بايقاۋ جىل سايىن وتكىزىلەدى. بۇل بالالاردى شىعارماشىلىققا باۋلۋدىڭ جانە ساحناعا دەگەن سۇيىسپەنشىلىگىن وياتۋدىڭ تاماشا مۇمكىندىگى دەپ سانايمىن. ۇيىمداستىرۋشىلارعا العىسىمدى بىلدىرەمىن, – دەدى ول.
جەتى كۇن بويى شىعارماشىلىق ۇجىمدار مەن جەكە ورىنداۋشىلار «حورەوگرافيا», «اسپاپتىق جانر/جەكە ورىنداۋشىلىق», «اسپاپتىق جانر/انسامبلدەر», «ۆوكالدىق جانر/جەكە ورىنداۋشىلىق», «ۆوكالدىق جانر/انسامبلدەر», «حور», «تەاتر ونەرى», «ۆوكال جانرى / انسامبلدەر», «3d مودەلدەۋ» نوميناتسيالارى بويىنشا قاتىستى.
– بۇل بايقاۋ اپتالىعى قىزۋ ءارى تارتىستى ءوتتى. فەستيۆالدە قاتىسۋشىلار وزدەرىنىڭ جوعارى كوركەمدىك دەڭگەيى مەن شەبەرلىگىن كورسەتتى. مەنىڭ ويىمشا, قازىلار القاسىنا ۇزدىكتەردى تاڭداۋ قيىنعا سوقتى. وسىنداي اۋقىمدى ءىس-شاراعا قاتىسۋ – ۇلكەن جەتىستىك, – دەدى نۇر-سۇلتان قالاسى ءبىلىم باسقارماسى كامەلەتكە تولماعانداردى قوسىمشا ءبىلىم بەرۋ جانە الەۋمەتتەندىرۋ ءبولىمىنىڭ باسشىسى گۇلفارا سارامبەتوۆا.
فەستيۆالدىڭ جابىلۋىنا وراي 30 ساۋىردە گالا-كونتسەرت وتەدى.
