H توبى: پولشا. سەنەگال. كولۋمبيا. جاپونيا
قۇرامىندا بىردە-ءبىر الەم چەمپيونى جوق جالعىز توپ وسى ەكەن. قالعان توپتاردىڭ بارىندە بار. بىراق سوعان قاراماستان, ماماندار بۇل كۆارتەتكە «شيەلىنىستى شوعىر» دەگەن ات بەرىپتى. مۇنداعىلاردىڭ شاما-شارىقتارى, شىنىندا, ءبىر-بىرىمەن شەندەس سياقتى. بۇدان ءتورت جىل الدىن جارقىراپ شىققان كولۋمبيا بۇل جولى دا قىزىقتى كورىنەدى. قاتارىندا روبەرت لەۆاندوۆسكي سىندى جۇلدىزدى العا ۇستاعان پولشا مەن «ليۆەرپۋلدە» ليدەر بولىپ جۇرگەن مانەسى بار سەنەگال دا تۋرنيردە بارىن سالادى. سول سياقتى سامۋرايلارعا ءتان قايتپاس قايسارلىعى باسىم جاپوندار ءۇشىن دە توپتان شىعۋ ءبىرىنشى كەزەكتەگى مىندەت بولعالى تۇر.
پولشا قۇراماسى
پولياك قۇراماسى 2006 جىلدان كەيىن ءبىرىنشى رەت الەم چەمپيوناتىنىڭ فينالدىق بولىگىنە جولداما الىپ وتىر. بۇعان كوماندا كوشباسشىسى لەۆاندوۆسكي سوققان گولداردىڭ كومەگى از بولعان جوق. وسىنىڭ ارقاسىندا كوماندا وزىنەن كەيىنگى دانيا جاماعاتىنان كوپەنگاگەندە 0:4 ەسەبىمەن ۇتىلعانىنا قاراماستان, 5 ۇپاي العا كەتىپ قالدى.
پولشا وتكەن عاسىردىڭ 1974 جانە 1982 جىلدارى ەرەكشە كوزگە ءتۇسىپ, ءمۋنديالدىڭ قولا جۇلدەسىن جەڭىپ العان بولاتىن. بىراق ەۋروپا چەمپيوناتىنا العاش رەت 2008 جىلى عانا «جولى ءتۇستى».
پولياكتار جوعارىداعى تابىستارىنان بولەك, 1972 جىلى وليمپيادانىڭ التىن مەدالىن جەڭىپ الدى, 1976 جانە 1992 جىلدارى ونىڭ فينالىندا جەڭىلدى. ولار بۇل جولى الەم چەمپيوناتىنا 8-ءىنشى مارتە قاتىسادى.
كوماندانىڭ باس مەرگەنى روبەرت لەۆاندوۆسكي ەۋروپا ايماعىنداعى ىرىكتەۋ تۋرنيرىندە 2018 جىلى 16 دوپ سالىپ, كريشتيانۋ رونالدۋدان ءبىر گول اسىپ كەتتى.
سەنەگال قۇراماسى
سەنەگال بۇل چەمپيوناتقا اۋپىرىممەن كەلدى. سەبەبى ەكىنشى توپتىق تۋرنيردە وڭتۇستىك افريكا رەسپۋبليكاسى جاساعىنان ۇتىلىپ, پوزيتسياسىن ءبىراز السىرەتىپ الدى. بىراق فيفا سول ماتچقا قازىلىق ەتكەن تورەشىگە «ويىن ناتيجەسىن وزگەرتەتىن پەنالتيدى ويلاپ تاپتى» دەگەن ايىپ تاعىپ, كەزدەسۋدى قايتا وتكىزدىردى. سوندا سەنەگالدىقتار مىقتى ەكەندەرىن دالەلدەپ بەردى.
بۇل ەلدىڭ قۇراماسى 2002 جىلى توپتاعى ءبىرىنشى ويىنىندا سول كەزدە الەمدە دۇرىلدەپ تۇرعان فرانتسۋزداردى 1:0 ەتىپ تىزە بۇكتىرىپ, ۋرۋگۆايلىقتار مەن داتتاردىڭ اراسىنان العا شىقتى. بۇدان كەيىن 1/8 فينالدا شۆەدتەردى قاعىپ تاستادى. شيرەك فينالدا تۇرىكتەرگە قوسىمشا ۋاقىتتا جول بەردى. ءسويتىپ, كامەرۋننان كەيىن (1990) چەمپيوناتتىڭ وسى كەزەڭىنە دەيىن جەتكەن ەكىنشى افريكالىق قۇراما اتاندى.
سەنەگال قۇرلىقتاعى بارىنشا جوعارى تابىسىنا 2002 جىلى قول جەتكىزىپ, افريكا ۇلتتار كۋبوگىنىڭ فينالىندا كامەرۋنعا پەنالتي سەرياسىنان ەسە جىبەردى. ول بيىل الەم چەمپيوناتىنا ەكىنشى مارتە كەلە جاتىر.
كولۋمبيا قۇراماسى
كولۋمبيالىقتار 2014 جىلى الەم چەمپيوناتىندا شيرەك فينالعا دەيىن بارعانىمەن, بۇل جولى قاتارعا ازەر ىلىكتى. ول ىرىكتەۋ ءتۋرنيرىنىڭ سوڭعى تۋرىندا پەرۋمەن قوناقتا 1:1 ەسەبىمەن تەڭ ويناۋى ارقاسىندا 4-ورىنعا تابان تىرەپ, چەمپيوناتقا جولداما العاندار ساپىنان تابىلدى. كوماندا بۇعان دەيىن قاتارىنان 4 رەت ۇتىلدى. بۇل قۇراما ليدەرى حامەس رودريگەستىڭ سول كەزدەرى بابىندا بولماۋىنان ورىن الدى. بىراق ليماداعى سوڭعى كەزدەسۋدە ماڭىزدى گولدى سوققان دا سونىڭ ءوزى بولدى.
كولۋمبيا التىنشى كەزەك مۋنديالعا قاتىسقالى تۇر. ول 2001 جىلى امەريكا كۋبوگىن جەڭىپ العان.
جاپونيا قۇراماسى
اسىعىس شەشىم قابىلداۋدان ساق جۇرەتىن جاپوندار چەمپيونات باستالۋعا تۋرا ەكى اي قالعاندا قۇرامانىڭ باس جاتتىقتىرۋشىسى ۆاحيد ءحاليلحودجيچتى الماستىردى. رەسمي حابارلاما بويىنشا, فەدەراتسيا باسشىلىعى بۇعان ۋكراينا (1:2) جانە مالي (1:1) كوماندالارىمەن وتكىزىلگەن جولداستىق كەزدەسۋ كەزىندە بايقالعان باپكەر مەن ويىنشىلار اراسىنداعى كەلىسپەۋشىلىك سەبەپ بولعان.
جاپون فۋتبولشىلارى بوسنيالىق ماماننىڭ باسشىلىعىمەن ازيا ىرىكتەۋ توبىندا ءبىرىنشى ورىنعا شىقتى. ونىڭ ءوز الاڭىندا ساۋد ارابياسى مەن اۆستراليانى ۇتۋى مۇندا شەشۋشى ءرول اتقاردى. قۇراما 1998 جىلدان بەرى وسىمەن قاتارىنان التىنشى الەم چەمپيوناتىنا بارا جاتىر. سونىڭ ىشىندە 2002 جىلى كورەيا مەن جاپونيادا وتكەن دودادا توپتان شىعا الدى.
كۇنشىعىس ەلىنىڭ كومانداسى 1992, 2000, 2004, 2011 جىلدارى ازيا كۋبوگىن جەڭىپ العان.
