نۇر-سۇلتان قالاسىنداعى ج.جاباەۆ اتىنداعى №4-مەكتەپ-گيمنازياسىندا كوپتەن كۇتكەن سپورت الاڭى اشىلدى.
بايقوڭىر اكىمشىلىگىنىڭ قولداۋىمەن جۇزەگە اسقان بۇل يگى ءىس اتالمىش مەكتەپ پەن سول اۋداندا تۇراتىن تۇرعىندار قولدانىسىنا سالتاناتتى تۇردە تابىس ەتىلدى. سپورت الاڭىنىڭ اشىلۋ سالتاناتىنا بايقوڭىر اۋدانىنىڭ اكىمى ەرلان جاۋلىباەۆ, «قۇرمەت بەلگىسى» وردەنى, «ىبىراي التىنسارين» ءتوس بەلگىسى يەگەرى وسپان سۇلەيمەنۇلى مەن ارداگەر ۇستاز دامەش ومىربەكقىزى قاتىستى. مەيماندى قوناقتار شارا قاتىسۋشىلارىنا جىلى لەبىزدەرىن ءبىلدىرىپ, جاس ۇرپاقتى سپورتپەن اينالىسۋعا شاقىردى.
«ءاربىر بالا ءبىر جۇلدىز, جارقىراۋىنا جاردەم بەر» دەگەن ەلباسى ۇستانىمى نەگىزىندە قازاقستان رەسپۋبليكاسى پرەزيدەنتى قاسىم-جومارت توقاەۆ 2022 جىلدى بالالار جىلى دەپ جاريالادى. «وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – بۇل ءبىزدىڭ جالپى ۇلتتىق مىندەتىمىز» دەپ اتاپ ءوتتى. سونىڭ دالەلى رەتىندە اشىلىپ وتىرعان بۇل الاڭ بولاشاقتا تالاي سپورتشىلاردى شىڭداپ, الەم ارەناسىنا پاش ەتەتىنى ءسوزسىز. اتالمىش مەكتەپ بوكستان سانجار تاشكەنباي مەن ءزىل تەمىر كوتەرۋدەن ەدىگە ەمبەردى سىندى الەم چەمپيوندارىن 2 جىل قاتارىمەن تاربيەلەپ شىعارىپ وتىر. سونىمەن قاتار, مەكتەپتىڭ ۆولەيبولدان ۇلدار كومانداسى دا ۇنەمى قالالىق, رەسپۋبليكالىق بايقاۋلاردا باقتارىن سىنعا سالىپ, جۇلدەلى ورىندارعا قول جەتكىزىپ ءجۇر.
جۇلدىز قاليەۆا,
ج.جاباەۆ اتىنداعى
№4 مەكتەپ-گيمنازياسىنىڭ
قازاق ءتىلى مەن ادەبيەتى ءپانىنىڭ مۇعالىمى
