قولىمىزعا تۇسكەن جاڭا كىتاپ كۇللى قازاق دالاسىن كوز الدىڭىزعا اكەلىپ, قۇلاعىڭىزعا قالىقتاي شىرقالعان ءان بولىپ ەستىلەدى. كەۋدەنى سەزىم يىرىمدەرىمەن شيىرلاپ, ۇلتتىق ناقىشتاعى سازىمەن ساناڭىزدى سەرپىلتە تۇسەدى. سالقار سارىارقالى تۋعان دالاڭىزدىڭ توسىندە وتىرىپ, ەلىڭىزدى, جەرىڭىزدى بۇرىنعىدان دا بەتەر سۇيە تۇسەسىز دە, سول انمەن بىرگە شابىتىڭىز دا شالقىپ قويا بەرەدى.
جاڭا جيناقتىڭ العاشقى بەتىنە «قازاقستان» تەلەراديو كورپوراتسياسى» اكتسيونەرلىك قوعامىنىڭ باسقارما ءتورايىمى نۇرجان مۇحامەدجانوۆا بىلاي جازادى: «عاسىرعا جۋىق ۋاقىت بويى مادەنيەتىمىزدىڭ مايەگىن, ۇلتتىق قۇندىلىقتارىمىزدىڭ قايماعىن ىركىلتپەي ساقتاعان قازاق راديوسى – حالقىمىزدىڭ رۋحاني بايلىعى شوعىرلانعان ۇلكەن مۇراعات وشاقتارىنىڭ ءبىرى. سونىڭ ىشىندە وتكەن جىلداردان سىر شەرتەتىن التىن قوردى ەل مادەنيەتىنىڭ باعا جەتپەس اسىل قازىناسى دەۋگە بولادى. ونداعى اسا قۇندى رۋحاني بايلىقتارىمىزدىڭ قاتارى – ەسىمدەرى ەل تاريحىندا التىن ارىپتەرمەن جازىلعان زامانا بۇلبۇلدارىنىڭ شىعارمالارىمەن تولىققان. اتاپ ايتساق, امىرە قاشاۋباەۆ, كەنەن ازىرباەۆ, ماناربەك ەرجانوۆ, جۇسىپبەك ەلەبەكوۆ, عاريفوللا قۇرمانعاليەۆ, ال عاسىرلار سارىنىن جەتكىزگەن شەبەر كۇيشىلەر – دينا نۇرپەيىسوۆا, جاپپاس قالامباەۆ, ابىكەن حاسەنوۆ, ماعاۋيا ءحامزيننىڭ ورىنداۋلارىندا جازىلعان شىعارمالار – مادەنيەتمىزدىڭ التىن تامىرى. سونداي-اق, حالقىمىزدىڭ اسىل قازىناسى سانالعان جىر-تەرمەلەر, قيسسالار مەن باتىرلار جىرلارى دا ءوز الدىنا ءبىر دۇنيە».
ءيا, قازاق راديوسىنىڭ التىن قورى كۇلاش بايسەيىتوۆا, قۇرمانبەك جانداربەكوۆ, جامال وماروۆا, ريشات ابدۋللين, روزا باعلانوۆا سىندى كۇمىسكومەي انشىلەرىمىز ورىنداعان تۋىندىلارمەن دە باي ەكەنىن بىلەمىز. اۋە تولقىنىنان اندەرى بەرىلىپ ءجۇر. سونىمەن قاتار, احمەت جۇبانوۆ, نۇرعيسا تىلەنديەۆ, فۋات مانسۇروۆ سەكىلدى بىرەگەي ديريجەرلەر باسقارعان ونەر ۇجىمدارىنىڭ شىعارمالارى, قاليبەك قۋانىشباەۆ, شاكەن ايمانوۆ, ىدىرىس نوعايباەۆ ءتارىزدى تەاتر مايتالماندارى قاتىسقان سپەكتاكلدەر, مۇستافا شوقاي, باۋىرجان مومىشۇلى, راقىمجان قوشقارباەۆ, مۇحتار اۋەزوۆ, ءسابيت مۇقانوۆ, عابيدەن مۇستافين, مۇقاعالي ماقاتاەۆ, شىڭعىس ايتماتوۆ, دىنمۇحاممەد قوناەۆ سياقتى مەملەكەت, قوعام قايراتكەرلەرى مەن اقىن-جازۋشىلاردىڭ, ەل اعالارىنىڭ داۋىستارى التىن قوردىڭ قازىناسىن مولايتىپ تۇر.
قازاق راديوسىنداعى باي مۇرانىڭ ءبىرى – كومپوزيتورلار جازعان شىعارمالاردىڭ نوتالىق نۇسقالارى – كلاۆيرلەر مەن پارتيتۋرالار. «بۇل دۇنيەلەردىڭ قۇندى بولاتىن سەبەبى, – دەيدى نۇرجان مۇحامەدجانوۆا, – ولار اۆتورلاردىڭ ءوز قولدارىمەن جازىلعان, قاعازعا تۇسكەن». التىن قورداعى ۇلت بايلىعىن ەل اراسىندا ناسيحاتتاۋ ماقساتىندا جاڭا مادەني جوبا قولعا الىنىپ, «قازاقستان كومپوزيتورلارىنىڭ كەڭ تاراعان ءان-رومانستارى (كلاۆير)» اتتى كىتاپتىڭ ءبىرىنشى تومى انسۇيەر وقىرماننىڭ قولىنا ءتيدى كەشە. العاشقى جيناققا قازاقتىڭ كاسىبي مۋزىكا ونەرىنىڭ ىرگەتاسىن قالاعان مۇقان تولەباەۆتىڭ «كەستەلى ورامال», «توس, مەنى توس», احمەت جۇبانوۆتىڭ «قارلىعاش», لاتيف ءحاميديدىڭ «بۇلبۇل», «قازاق ءۆالسى», ەۆگەني برۋسيلوۆسكيدىڭ «التاي», «شولپان» اندەرى ەنگەن. بۇلاردىڭ قاتارىندا ءبىرجان سال, اقان سەرى, مۇحيتتاردىڭ ءىزىن جالعاستىرعان ءابىلاحات ەسپاەۆ, ءشامشى قالداياقوۆ, سادىق كارىمباەۆ, بەكەن جاماقاەۆ سىندى سازگەرلەردىڭ تۋىندىلارىنىڭ نوتالىق نۇسقالارى بار.
وسى يگىلىكتى ىسكە دەمەۋشىلىك جاساپ, قولداۋ بىلدىرگەن – «شەۆرون» كومپانياسى.
اسحات رايقۇل
