ءبىر اعامىز سابەت زامانىندا گايشنيك قىزدار تۋرالى ماقالا جازىپ, ونىسىنىڭ تاقىرىبىن «الا تاياقتى ارۋلار» دەپ قويىپتى. تاۋەلسىزدىك العاننان كەيىن, ءدال 8 ناۋرىز قارساڭىندا سوعان ۇقساس تاعى ءبىر ماقالا جازۋىنا تۋرا كەلەدى. تاقىرىبى – «قىزىل تاياقتى قىزدار» (قولداعىنىڭ قىزىلعا اۋىسقان كەزى عوي).
– اعا-اۋ, ەگەر ولاردىڭ ۇستاعانى قارا بولىپ شىعا كەلسە, قانداي تاقىرىپ قويار ەدىڭىز, ءا؟- دەيمىز, ءبىز دە «قۇيىسقانعا قىستىرىلىپ». سوندا اعامىز ەش قينالماستان:
– ەە, ويتكەن جاعدايدا, كەلەسى ماقالامنىڭ تاقىرىبى «قارا تاياقتى قاتىندار» بولادى دا!- دەپ قويىپ قالدى.
قۋانىشقا وراي, بەرتىن كەلە ءبىزدىڭ بيكەشتەردىڭ كوشەدە ماشينە توقتاتىپ تۇرمايتىنى ابىروي بولدى عوي. ايتپەسە, «ەر كەزەگى ۇشكە دەيىن» دەگەندەي…
ەركەعالي بەيسەنوۆ
