مەرەكەلى كۇنگە وراي كەشە بىرقاتار مەكەمە قىزمەتكەرى سالتاناتتى تۇردە قالا اكىمى اسەت يسەكەشەۆتىڭ العىسحاتىمەن ماراپاتتالدى. شاھار باسشىسىنىڭ قۇتتىقتاۋىن اكىمنىڭ ورىنباسارى اندرەي لۋكين جەتكىزىپ, تەكسەرۋ كوميسسياسىنىڭ قىرۋار ەڭبەگىنىڭ ناتيجەسىنە وڭ باعا بەردى.
«سىزدەردىڭ جۇمىستارىڭىز دەنساۋلىق ساقتاۋ مەن ءبىلىم بەرۋ جۇيەسى, قۇرىلىس پەن كوممۋنالدىق شارۋاشىلىق بولسىن, ەكونوميكانىڭ كەز كەلگەن سالاسىن جەتىك ءبىلۋدى تالاپ ەتەدى. قارجىلىق باقىلاۋدى جۇزەگە اسىرۋ بارىسىندا قانداي دا ءبىر زاڭ بۇزۋشىلىقتى انىقتاۋ ءبىر بولەك, سىزدەر سول زاڭسىزدىقتى دالەلدەپ شىعاتىن بىلىكتى مامانسىزدار. جۇمىس ونىمدىلىگىنىڭ قورىتىندىسىن, شىعىنداردىڭ ارتىق-كەمىن, اقشانىڭ قايدا كەتكەنىن ءجىتى باقىلايتىندىقتان, مەملەكەتكە اسا قاجەتتى قىزمەتتەرىڭىز قالا تىرشىلىگىن جانداندىرىپ, بيۋدجەت قارجىسىنىڭ دۇرىس جۇمسالۋىن قامتاماسىز ەتەدى» دەي كەلە, استانا قالاسى اكىمىنىڭ ورىنباسارى اندرەي لۋكين استانا قالاسى بويىنشا تەكسەرۋ كوميسسيا قىزمەتكەرلەرىنىڭ جوعارى كاسىبيلىگىنە العىسىن ءبىلدىردى.
اتالمىش مەكەمە ەلوردا بيۋدجەتىنىڭ يگەرىلۋىن 2011 جىلدان بەرى باقىلاپ كەلەدى.
– تەكسەرۋ كوميسسياسى ينستيتۋتىن دەربەس مەملەكەتتىك ورگان رەتىندە قۇرۋ تۋرالى مەملەكەت باسشىسىنىڭ شەشىمى دەر كەزىندە قابىلدانعان ءارى قاجەتتى شارا ەكەندىگىن ينتوساي, ەۆروساي سياقتى جانە وزگە دە جوعارى قارجىلىق باقىلاۋ ورگاندارىنىڭ بەدەلدى حالىقارالىق ۇيىمدارى ءسوزسىز قولداعان ەدى. ءوز كەزەگىندە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى جانە باسقا دا مەملەكەتتىك ورگاندار جاڭادان قۇرىلعان دەربەس قارجىلىق باقىلاۋ ينستيتۋتىنىڭ قالىپتاسۋى جولىندا ەلەۋلى جۇمىس اتقاردى, – دەيدى استانا قالاسى تەكسەرۋ كوميسسياسىنىڭ توراعاسى عالىمجان مولداش. ونىڭ ايتۋىنشا, بارلىق بيۋدجەتتىك باعدارلاما اكىمشىلەرى, ولارعا باعىنىشتى ءار ۆەدومستۆولىق ۇيىمدار مەن كاسىپورىندار جىل سايىن باقىلاۋدان وتەدى. ماسەلەن, وتكەن مەرزىم ىشىندە ەلورداداعى 500-دەن اسا وبەكتىدە 127 باقىلاۋ ءىس-شاراسى جۇرگىزىلدى. ناتيجەسىندە باقىلاۋمەن قامتىلعان بيۋدجەت قاراجاتى مەن مەملەكەت اكتيۆتەرىنىڭ كولەمى 862 ملرد تەڭگەنى قۇراعان ەكەن.
جيىن بارىسىندا, سونداي-اق استانا قالاسى ءماسليحاتىنىڭ حاتشىسى جانات نۇرپەيىسوۆ جەرگىلىكتى بيۋدجەتتى اتقارۋ مەن وعان قارجىلىق باقىلاۋدى جۇزەگە اسىرۋ جولىنداعى بەس جىل ىشىندە تەكسەرۋ كوميسسياسىنىڭ وزىنە جۇكتەلگەن مىندەتتەردى ابىرويمەن اتقارعانىن ايتىپ, ەلوردانىڭ قارقىندى دامۋىنا ۇلەسىن قوساتىن مەكەمە ۇجىمىنا تابىس تىلەدى.
ءمادينا جاقىپ
