ەلوردا جىلىتۋ ماۋسىمىنا دايىن
استانادا ورتالىقتاندىرىلعان جىلۋمەن جابدىقتاۋ جۇيەسىنە قوسىلعان 2455 الەۋمەتتىك نىساننىڭ 2335-ءى نەمەسە ونىڭ 90,5 پايىزى جىلىتۋ ماۋسىمىنا دايىن. وعان 2146 تۇرعىن ءۇي, 28 دەنساۋلىق ساقتاۋ, 152 ءبىلىم نىسانى جانە 9 مادەنيەت مەكەمەسى كىرەدى.
استانا قالاسى ەنەرگەتيكا باسقارماسىنىڭ حابارلاۋىنشا, 2016-2017 جىلدارى جىلىتۋ ماۋسىمى باستالعانشا ەنەرگوكەشەن تولىقتاي دايىندىق تولقۇجاتىن الادى, ال باسقا الەۋمەتتىك نىساندار مەن تۇرعىن ۇيلەر 100 پايىز دايىن بولادى.
الداعى جىلىتۋ ماۋسىمىنا دايىندىق پەن ەنەرگوكەشەندى تەحنيكالىق اقاۋسىز جاعدايدى ساقتاۋ اياسىندا «استاناەنەرگوسەرۆيس» اق كۇردەلى جوندەۋ جۇمىستارىن قولعا الدى.
«استانا-ەنەرگو» اق باستى ءجانە قوسالقى جابدىقتارىن جوندەۋ بەكىتىلگەن كەستەگە ساي جۇرگىزىلىپ جاتىر. قازىرگى كەزدە جەو-1 – 85%, جەو-2 – 73%, ال اۋداندىق قازاندىقتار 88 پايىز دايىن ەكەن.
«استانا-تەپلوترانزيت» اق كۇردەلى جوندەۋ باعدارلاماسى بويىنشا 1,15 شاقىرىم ماگيسترالدى جەلى قايتا جوندەلدى. قازىرگى كەزدە ۇزىندىعى 1,432 شاقىرىم تاراتۋ جەلىسىن كۇردەلى جوندەۋ جانە 3 698 شارشى مەترلىك قۇبىردىڭ جىلۋ وقشاۋلاعىشى قالپىنا كەلتىرىلدى.
سونىمەن بىرگە, «استانا-رەك» اق-دا 110 كۆ-تىق اۋە جەلىسىن كۇردەلى جوندەۋ, 10 كۆ-تىق جانە 0,4 كۆ-تىق اۋە جەلىلەرى مەن جابدىقتاردى قالپىنا كەلتىرۋ جۇمىستارى جۇرگىزىلۋدە.