مادەنيەت جانە سپورت ءمينيسترى اقتوتى رايىمقۇلوۆا 20 ماۋسىم كۇنى قازاق تىلىنە اۋدارىلعان تەرميندەردى قايتا قاراستىرۋ جونىندە ۇسىنىسىن ايتتى. ول 3300-دەن اسا جالپىعا بىردەي قابىلدانعان تەرميندەردىڭ 300-گە جۋىعىن قايتا اۋدارۋ كەرەكتىگىن ايتتى. مۇنداي ارەكەتىن مينيستر حالىقارالىق تەرميندەردى قازاقشالاعان دۇرىس ەمەس دەپ تۇسىندىرمەك بولدى. وسى ماسەلەگە قاتىستى ءوزىمنىڭ جەكە پىكىرىممەن بولىسكىم كەلەدى.
اقيقاتىن ايتساق, كوپتەن بەرى قازاقشالانعان تەرميندەر تىلدىك قولدانىسىمىزعا, جازۋىمىزعا ابدەن ءسىڭىپ كەتتى. ولاردىڭ بۇگىنگى قولدانىسىندا ەشقانداي وعاشتىق جوق. ويتكەنى «پايىز», «مۇراجاي», «سىنىپ» سياقتى سوزدەر اباي جانە ىبىراي اتالارىمىزدىڭ زامانىنان بەرى قولدانىلىپ كەلەدى.
مەنىڭ ويىمشا, ءتىلدى تۇقىرتىپ, قانشاما جىلدار بويى قازاق حالقىنىڭ ساناسىنا ءسىڭىپ قالعان سوزدەردى قايتادان اۋدارۋ – قيسىنسىز. دەمەك, باسشىلاردىڭ حالىقتىڭ تالقىلاۋىنا سالماستان, وزىمشىلدىكپەن «تون ءپىشىپ», ءتىلىمىزدى تۇقىرتقانى – تۇڭعىش پرەزيدەنتىمىز, ەلباسى نۇرسۇلتان نازارباەۆتىڭ ساياساتىنا دا قاراما-قايشى كەلەدى. ەلباسى «قازاقستاننىڭ بولاشاعى – قازاق تىلىندە», «قازاق ءتىلى – كۇللى قازاقستاندىقتاردى بىرىكتىرەتىن قۋاتتى قۇرال», «ءوز تىلىمىزبەن ءومىر سۇرەيىك!», «قازاق پەن قازاق قازاقشا سويلەسسىن» دەگەن قاناتتى سوزدەرىن ءجيى-ءجيى ايتىپ قانا جۇرگەن جوق, ول سوزدەر كوپتەگەن ەڭسەلى عيماراتتاردىڭ تورىندە جازۋلى تۇر. «رۋحاني جاڭعىرۋدىڭ» ءبىر بەلگىسى – تۋعان ءتىلىمىزدى تازا ۇستاۋ ەكەنىن دە تۇڭعىش پرەزيدەنتىمىز قاداپ ايتتى. ەندەشە, جوعارى لاۋازىمدى شەنەۋنىكتىڭ مۇنىسىنا نە جورىق؟
سايىپ كەلگەندە, ءتىل – ۇلتتىڭ جانى. ونى وڭدى-سولدى تۇقىرتۋعا, جانشۋعا ەشكىمنىڭ دە قاقىسى جوق. باۋىرجان مومىشۇلى اتامىز: «ءتىل تازالىعى ءۇشىن كۇرەس ەشقاشان تولاستامايتىن ماڭگىلىك كۇرەس» دەگەن ءسوزدى بەكەر ايتقان جوق. ءتىلىن قادىرلەمەگەننىڭ ۇلتى جوق دەيدى دانا حالقىمىز. ولاي بولسا, جاڭا مينيستر اسىعىس شەشىم شىعارماعانى ءجون دەپ ويلايمىن.
رامازان ەلامانۇلى,
ل.گۋميلەۆ اتىنداعى
ەۋرازيا ۇلتتىق
ۋنيۆەرسيتەتىنىڭ ستۋدەنتى
