باس قالانىڭ 20 جىلدىق مەرەيتويىنا وراي 40 استانالىق جۇپ نەكەسىن ءبىر مەزەتتە قيدى. يگى داستۇرگە اينالعان بۇل شارا وسىمەن 11 جىل قاتارىنان وتكىزىلىپ كەلەدى.
وسى جىلدار ارالىعىندا 350 جۇپ نەكەسىن قيعان ەكەن. ۇيىمداستىرۋشىلاردىڭ ايتۋىنشا, وسىعان دەيىن سالتاناتتى شاراعا قاتىسقان جۇپتاردىڭ اراسىندا اجىراسۋ بولماعان.
جاس جۇبايلارمەن تىلدەسكەنىمىزدە, كوبىسى احات بولىمىنە ءوتىنىش بەرۋ ءۇشىن وسى كۇندى ارنايى كۇتكەنىن ايتادى. ماسەلەن, الىشەر مەن ليليا ەرمۇحانوۆتار بىلتىر جاڭالىقتاردان وسىنداي ەرەكشە نەكە قيۋ ءراسىمى وتكەنىن كورىپ, بيىل قاتىسۋعا ءوتىنىش بەرگەن ەكەن. «قاڭتاردا شاڭىراق كوتەرۋگە شەشتىك. الايدا بۇل ماڭىزدى كۇندى ەلوردانىڭ 20 جىلدىعىنا ورايلاستىرعىمىز كەلدى» دەيدى ولار.
ال اباي مەن ءمولدىر عالىمجانوۆتار بۇل شاراعا قاتىسۋ كۇتپەگەن جاعداي بولدى دەيدى. «ءبىر اي بۇرىن احات بولىمىنەن حابارلاسىپ, وسى شاراعا قاتىسۋدى ۇسىندى. ءبىز بۇل ۇسىنىستى قۋانا قابىل الدىق. ۇيىمداستىرۋ جوعارى دەڭگەيدە: شەتەلدىك جانە وتاندىق فوتوگرافتار كەلىپ, ءبىزدىڭ قۋانىشتى ءساتىمىزدى ءتۇسىرىپ الدى» دەپ قۋانىشىمەن ءبولىستى باقىتتى قالىڭدىق.
ينۆەستيتسيا جانە كاسىپكەرلىكتى دامىتۋ باسقارماسى باسشىسىنىڭ ورىنباسارى رىسگۇل قاۋعاباەۆا جاس جۇبايلارعا ازىرلەنگەن توسىن سىي كوپ ەكەنىن ايتتى. «سىيلىقتاردىڭ ىشىنەن تۇركياعا ساياحات تا بار» دەدى ول.
