ەلوردانىڭ قۇرىلىس قارقىنى ەشقاشان باسەڭدەگەن ەمەس. قالا حالقىنىڭ سانى كوبەيگەن سايىن تۇرعىن ءۇي نىساندارى دا كوپتەپ بوي كوتەرىپ كەلەدى. استانا قالاسى ستاتيستيكا دەپارتامەنتىنىڭ رەسمي مالىمەتتەرى اكىمدىك قولعا العان قۇرىلىس جوبالارىنىڭ ۇزدىكسىز جالعاسىپ, پايدالانۋعا بەرىلەتىن باسپانا سانى ۇلعايا بەرەتىنىن ايعاقتايدى.
ماسەلەن, 2016 جىلعى قاڭتار-قىركۇيەكتە استانا قالاسى بويىنشا تۇرعىن ءۇي قۇرىلىسىنا باعىتتالعان ينۆەستيتسيالار كولەمى 99 081,4 ملن تەڭگەنى قۇرادى. نەگىزگى كاپيتالعا سالىنعان ينۆەستيتسيالاردىڭ جالپى كولەمىندە تۇرعىن ءۇي قۇرىلىسىندا يگەرىلگەن قاراجاتتار ۇلەسى 18,3 پايىزعا جەتكەن.
بيىل بارلىق قارجىلاندىرۋ كوزدەرىنىڭ ەسەبىنەن 14 903 پاتەرگە ارنالعان تۇرعىن ۇيلەر پايدالانۋعا بەرىلدى. تاپسىرىلعان تۇرعىن ۇيلەردىڭ جالپى اۋدانى 1 644 497 شارشى مەتردى قۇرادى. 2015 جىلعى قاڭتار-قىركۇيەكتەگى كورسەتكىشپەن سالىستىرعاندا بيىلعى اۋدان كولەمى 29 پايىزعا كوپ ەكەنىن اتاپ وتكەن ءجون.
ەلورداعا ەلىمىزدىڭ تۇكپىر-تۇكپىرىنەن كوشىپ كەلۋشى حالىقتىڭ قاراسى دا كوبەيىپ كەلەدى. بۇل رەتتە جەكە سالۋشىلار جالپى اۋدانى 124 791 شارشى مەتر تۇرعىن ءۇي سالعان. وتكەن جىلمەن سالىستىرعاندا 3,8 ەسە كوپ. تۇرعىن ۇيلەردى پايدالانۋعا بەرۋدىڭ جالپى كولەمىندە جەكە تۇرعىن ءۇي قۇرىلىسىنىڭ ۇلەسى 7,6 پايىزدى قۇرادى.
ەلوردادا 2016 جىلعى قاڭتار-قىركۇيەكتە تۇرعىن ۇيلەردىڭ جالپى اۋدانىنىڭ 1 شارشى مەترىن سالۋدىڭ ورتاشا ناقتى شىعىنى 128,9 مىڭ تەڭگەنى, ونىڭ ىشىندە جەكە سالۋشىلاردىڭ تۇرعىزعانى 105,2 مىڭ تەڭگەنى قۇرادى.
ەسكە سالا كەتەيىك, 2030 جىلعا قاراي استانا قالاسىنىڭ تۇرعىن ءۇي قورىن 37 ميلليون شارشى مەترگە جەتكىزۋ جوسپارلانعان. بۇل تۋرالى قر پارلامەنتى ماجىلىسىندە «نۇرلى جول» باعدارلاماسىن ىسكە اسىرۋ شەڭبەرىندە جالعا بەرىلەتىن تۇرعىن ءۇي قۇرىلىسىنىڭ بارىسى مەن تۇرعىن ءۇي ينفراقۇرىلىمىن نىعايتۋ شارالارى تاقىرىبىنداعى دوڭگەلەك ۇستەلدە استانا قالاسى اكىمىنىڭ ءبىرىنشى ورىنباسارى سەرگەي حوروشۋن مالىمدەگەن بولاتىن. ونىڭ ايتۋىنشا, 2030 جىلعا قاراي استانا قالاسىنىڭ حالىق سانى 1 ميلليون 220 مىڭ بولعاندا, ەلورداداعى تۇرعىن ءۇي قورىنىڭ جالپى اۋدانى 37 ميلليون شارشى مەترگە جەتۋى ءتيىس. بۇل رەتتە ءبىر تۇرعىنعا 30 شارشى مەتردەن كەلەتىن نورما قاراستىرىلىپ وتىر.
«بۇگىنگى تاڭدا استانانىڭ تۇرعىن ءۇي قورى 19 ميلليون شارشى مەتردى قۇرايدى. سوڭعى 18 جىلدا 15,5 ميلليون شارشى مەتر پايدالانۋعا بەرىلگەن. ياعني, 2030 جىلعا دەيىن بەلگىلەنگەن مەجەگە جەتۋ ءۇشىن جىل سايىن 1 ميلليون 100 مىڭ شارشى مەتر تۇرعىن ءۇي سالىنۋى قاجەت» دەگەن قالا اكىمىنىڭ ورىنباسارى سەرگەي حوروشۋن 2015 جىلى قالادا 1 ميلليون 759 مىڭ شارشى مەتر تۇرعىن ءۇي پايدالانۋعا بەرىلگەنىن ايتقان ەدى. جوسپار بويىنشا ەندى بۇل كورسەتكىش اعىمداعى جىلى 2 ميلليون شارشى مەترگە جەتكىزىلمەك.
