استانانىڭ بىرنەشە جەرىندە سوڭعى جىلدارى تۇرعىن ۇيلەر بوي كوتەرىپ, جاڭا كوشەلەر پايدا بولدى. سول اۋماقتار تۇرعىندارىنىڭ ماسەلەلەرى بىرتە-بىرتە شەشىلىپ كەلەدى. بۇعان قالالىق
ءماسليحات دەپۋتاتتارىنىڭ قوسقان ۇلەسى از ەمەس. ماسەلەن, № 3 سايلاۋ وكرۋگىنەن ءماسليحات دەپۋتاتى بولىپ سايلانعان سايات باتپەنوۆ وزىنە تاپسىرىلعان ايماقتا تۇراتىن حالىقتىڭ ءوتىنىش-تىلەكتەرى, ولاردىڭ قالاي شەشىمىن تاۋىپ كەلە جاتقانى تۋرالى ايتادى.
– ش.قوسشىعۇلۇلى كوشەسىنىڭ تۇرعىندارى اۋماقتى كوگالداندىرۋدى ۇزاق ۋاقىت سۇرادى. الايدا مەردىگەرلەر بۇل جەردەن كابەلدەر وتەتىندىكتەن, اعاش وتىرعىزۋعا بولمايتىنىن سىلتاۋراتتى. سوعان قاراماي, ءبىز مىڭ اعاش ساتىپ الۋعا كەلىسكەن دەمەۋشىلەردى تاپتىق. بىراق بۇعان رۇقسات الۋ ءۇشىن تاعى ءبىراز ۋاقىت سابىلدىق. سارىارقا اۋدانىنىڭ اكىمدىگى بۇل جۇمىستى اتقارۋعا باسقا اۋماقتاردى ۇسىندى. ال ءبىزدىڭ ماقساتىمىز ناقتى اتالعان كوشەنى جاسىل جەلەككە وراۋ بولدى. قالا اكىمى دە بىردە اتالمىش اۋماقتى ارالاعاندا دا اعاشتاردىڭ ازدىعىنا نازار اۋدارىپ, ءتيىستى تاپسىرما بەردى. قازىر كوشە تۇرعىندارى جاسىل جەلەككە عانا ەمەس, اۋماقتىڭ اباتتانعانىنا, بالالارعا ارنالعان ويىن الاڭدارىنىڭ سالىنعانىنا ريزا, – دەيدى دەپۋتات.
ەندى بوگەنباي باتىر كوشەسىندە ورنالاسقان «باتىر» تۇرعىن ءۇي كەشەنىنىڭ تۇرعىندارىنىڭ اباتتاندىرۋعا كوڭىلدەرى تولماي, جاسىل جەلەكتىڭ جوقتىعىنا شاعىمدانىپ ءجۇر ەكەن. ولار ءۇي ماڭايىنداعى قۇلاعالى تۇرعان جەكە ۇيلەردىڭ ورنىنا اعاشتار وتىرعىزىلسا ەكەن دەيدى. «سارىارقا اۋدانىندا بىردە-ءبىر ساياباقتىڭ جوقتىعى سىزدەرگە جاڭالىق بولاتىن شىعار. گۇل باقتارى, ساياجولدار بار ارينە, بىراق وسىنداي ۇلكەن اۋدانعا بۇل جەتكىلىكسىز. قالادا ەسكى, اپاتتى ۇيلەردىڭ ورنىنا گۇل باقتارىن سالۋ جوسپارلانۋدا. سول كەزدە اۋدان دا جاسىل جەلەككە ورانا تۇسەتىنىنە ءۇمىتتىمىز» دەيدى س.باتپەنوۆ.
بۇل تۇرعىن ءۇي كەشەنىنىڭ جوباسى بويىنشا كولىك تۇراعى دا بولۋى كەرەك ەدى. الايدا پاتەر ساتىپ العاندار سەلقوستىق تانىتتى. سوندىقتان بۇل ماسەلە كەزىندە جۇزەگە اسپاي قالدى. دەپۋتاتتىڭ سوزىنشە, ءۇي ماڭايىندا كولەمى اجەپتاۋىر بوس الاڭقاي بار ەدى. جەرگىلىكتى اتقارۋشى ورگاننىڭ ارالاسۋىمەن الاڭقايعا اسفالت توسەلدى. قورىتىندىسىندا 200-گە جۋىق كولىككە ارنالعان تۇراق پايدا بولدى.
ونىڭ ايتۋىنشا, ش.قوسشىعۇلۇلى كوشەسىندەگى №10 قالالىق ەمحانا ماڭىندا دا بۇرىن كولىك تۇراعى بولماعان. سوندىقتان وعان كەلەتىن ادامدار كولىكتەرىن تۇرعىن ۇيلەردىڭ اۋلالارىنا قاڭتاراتىن. ارينە, بۇل جاعداي حالىقتىڭ نارازىلىعىن تۋدىراتىن. دەپۋتات باستاماشىل توپپەن بىرگە بىرنەشە مارتە اۋدان اكىمىمەن, ءتيىستى سالاعا جاۋاپتى قالا اكىمىنىڭ ورىنباسارىمەن كەزدەسكەن سوڭ بۇل ماسەلە شەشىلدى. اۆتوموبيل جولدارى باسقارماسى 30 كولىككە ارنالعان تۇراقتى سالىپ بەردى.
بۇل كوشەدە بۇرىن بالالاردىڭ ويىن الاڭدارى جوق ەدى. قازىر جاعداي جاقسى جاعىنا وزگەردى, ءبىراز ءۇيدىڭ اۋلاسىنا وسىنداي الاڭدار مەن جۇمساق جابىندار توسەلگەن اۋماقتار سالىندى. جاسوسپىرىمدەر ءۇشىن ەكى فۋتبول جانە ۆولەيبول الاڭدارى, جالپىعا ورتاق دالا ترەناجەرلەرى پايدا بولدى.
سايات باتپەنوۆ بۇل كوشە تۇرعىندارى اراسىنان جاقسى كومەكشىلەرى تابىلعانىن ايتادى. ولاردىڭ كوبىسى – زەينەتكەرلەر. سونىڭ ءبىرى ءنۇسىپ قاجىمۇرات ءوزى تۇراتىن ءۇي مەن اۋلاداعى جاعدايدى ۇنەمى باقىلاۋدا ۇستايدى ەكەن.
ارينە, ايماقتاعى بارلىق ماسەلە شەشىلدى دەپ ايتۋعا بولمايدى. كولىكتىڭ ءجۇرۋى مەن جارىقتاندىرۋ جاعىنان ءالى تۇيتكىلدەر بار. دەپۋتاتتىڭ سوزىنشە سارىارقا داڭعىلى مەن ش.بەيسەكوۆا كوشەسى ارالىعىنداعى ءا.جانگەلدين كوشەسى جوندەلىپ بىتكەن سوڭ بۇل ماسەلەلەر شەشىلەدى. بۇعان قوسا, ءارتۇرلى قىزمەتتەر سانى مەن ساپاسى ارتادى.
امانعالي قالجانوۆ
