وسى اپتادا الەمنىڭ فۋتبول سۇيەر قاۋىمى قازاقستانعا نازار اۋداردى. استانادا ۇكىمەت باسشىسى سەرىك احمەتوۆتىڭ قاتىسۋىمەن UEFA-نىڭ كەزەكتى 38-كەڭەسى ءوتتى. ايتۋلى شاراعا UEFA پرەزيدەنتi ميشەل پلاتيني, FIFA باسشىسى يوزەف بلاتتەر جانە تانىمال سپورت ساڭلاقتارى قاتىستى.
كونگرەستە ءسوز العان ۇكىمەت باسشىسى سەرىك احمەتوۆ اتالمىش جيىن ەل فۋتبولىنىڭ دامۋىنا جاڭا سەرپىن بەرەتىنىن مالىمدەدى. باسقوسۋعا UEFA قۇرامىنا ەنەتىن 54 ۇلتتىق قاۋىمداستىقتىڭ وكىلدەرى كەلدى. ايتا كەتۋ كەرەك, الەمدىك شارا UEFA-نىڭ قۇرىلعانىنا 60 جىل تولۋىمەن تۇسپا-تۇس كەلىپ وتىر. «UEFA كونگرەسى تمد ەلدەرى اراسىندا قازاقستاندا العاش رەت وتكىزىلىپ وتىر. قازاقستاننىڭ FIFA ۇيىمىنا قوسىلعانىنا كوپ بولا قويماسا دا, بۇل شەشىم ءبىراۋىزدان قابىلداندى. بۇل – ءبىز ءۇشىن ۇلكەن مارتەبە. ءجۇز جىلدان استام تاريحى بار قازاقستان فۋتبولى قازىر قارقىندى دامىپ كەلەدى, سپورتتىڭ بۇل تۇرىنە دەگەن قىزىعۋشىلىق جوعارى» دەدى س.احمەتوۆ. ءوز كەزەگىندە ۋەفا پرەزيدەنتى ميشەل پلاتيني بارلىق ەلدە فۋتبولدىڭ دامۋىنا قولداۋ بىلدىرەتىندىكتەرىن ءارى بۇقارالىق سپورت ءتۇرىن دامىتۋعا بارىنشا كۇش سالاتىنىن جەتكىزدى.
