ۇلتتىق ناقىشتى ۇلىقتايدى
ەلوردادا ەل ەگەمەندىگىنىڭ 25 جىلدىعى مەن الداعى ۋاقىتتا وتەتىن «استانا ەكسپو-2017» حالىقارالىق مامانداندىرىلعان كورمەسى قارساڭىندا «Sky Cinema Production» مەن «Tengri Plus-IS» كومپانيالارى كوپشىلىك قاۋىمعا «KazTumar» دەگەن اتپەن كەزەكتى برەندىن ۇسىندى.
بىرنەشە اۋقىمدى جوبالاردى ءبىر ارناعا توعىستىرعان اتالمىش كومپانيا ءتول ونىمدەرىن ۇلتتىق ناقىشتا جاساۋدى ۇيعارعان. ماسەلەن, شارا اياسىندا جۇرتشىلىققا «كوك ءبورى ەلى» جانە «ۋتراچەننىە سيمۆولى كازاحستانا» اتتى كىتاپتار تانىستىرىلدى. بابالار اماناتىنا ادالدىق, ەلگە دەگەن ۇلتجاندىلىق, كەلەشەككە دەگەن سەنىم بۇل كىتاپتاردا جارقىن كورىنىس تاپقان. ال كورەرمەنگە قىزىقتى بولۋ ءۇشىن «كوك ءبورى ەلى» اتتى كىتاپ جەلىسىنىڭ نەگىزىندە جاس اكتەرلەر ساحنالىق قويىلىم كورسەتىپ, ونەرلەرىمەن, ساحنادا ويناۋ شەبەرلىگىمەن ءتانتى ەتتى. سونداي-اق, اتالمىش كومپانيانىڭ پروديۋسەرى ەلەنا گومەردىڭ ايتۋىنشا, بىرلىگى جاراسقان ۇجىم وتكەن جىلى «XXI عاسىرداعى الدار كوسە» كومەديالىق ءفيلمىن ءتۇسىرىپ ۇلگەرگەن. ونى 6 وبلىستاعى 14 كينوتەاتردا قالىڭ كورەرمەن تاماشالادى. ءساتى ءتۇسىپ جاتسا, جىل سوڭىنا دەيىن كينو تۋىندى «استانا» تەلەارناسىنان كورسەتىلەتىن بولادى.
سونىمەن بىرگە, شارا اياسىندا بەلگىلى قازاقستاندىق ديزاينەر قايروللا ابىشەۆتىڭ تىكەلەي اتسالىسۋىمەن بالالارعا ارنالعان ءسان كورسەتىلىمى ءوتتى. بۇلدىرشىندەرگە ارنالعان كيىمدەر زاماناۋي ستيلمەن قاتار, ۇلتتىق ويۋ-ورنەكپەن بەزەندىرىلگەن. وسىلايشا, ونەرى ورگە جۇزگەن ديزاينەر قولىنان شىققان كيىم-كەشەكتەر كىشكەنتاي ۇل-قىزداردىڭ بويىنا قونا كەتتى. ۇيىمداستىرۋشىلاردىڭ ايتۋىنشا, ءسان ۇلگىلەرى بيىل تەك بالالارعا ارناپ دايىندالعان. ال كەلەر جىلى ەرەسەكتەرگە ارنالعان كيىم-كەشەكتىڭ نەبىر تۇرلەرىن ۇسىنۋ جوسپاردا بار.
تۇساۋكەسەر سوڭىندا ءبۇلدىرشىندەرگە جاڭاجىلدىق شوۋ قويىلسا, مەيماندارعا شاعىن كورمە-جارمەڭكە ۇيىمداستىرىلدى.
ءامىر دوسقوجا